Aţap a Hrammi

„Aṭap a Hrammi cu Lung lawmmi nan va sihna dah!

 Pathian nih a in hnemhhna lai“ [Mat. 5:4]

Minung i kan Nunning tawn ningin ruah sicun hika Bia hi amah le amah a iralkah bakmi asi ko. Zeitin dah ṭapna lak le hramna lakah cun Lung lawmmi cu asi khawh lai. A ṭialtu Pa nih a hmanmi Bia zong Grikholh thiam mihna nih an chim ningah a fakngai ngaimi Ṭahnak le Hramnak, kan dawt mihna an thih le an loh i kan ṭah le hram khi asi an ti tawn. Cucacun zeitin dah Ṭahnak le Aihramnak chungah cun Lung lomhnak cu aum khawh kun?

A chung ngaingai i kan luh hlanah Ngaihchiatnak kong hi tlawm tein von chim tarih usilaw; Arab mihna nih hin Phung thlukbia pakhat an ngeihmi cu; Nikhua a ṭhat zungzal sicun Vawlei cu aro aro i These rawnah acang,“ [All sunshine makes a desert] tihi asi. Minung nih zei kan tuah mipaoh le thil ti mipaoh hmanh zongah kan Tlam tlin duahmah sicun Vawlei romi bangin aro carmi si a fawite.

Sifahnak le Retheihnak atuar bal lomi cacun duh tawkin biachim hoihna hi a fawite. Laimi kan Pastor pawlhna lakah hmaizah awk tlakbik arak simi pakhat nih ka Fanu thih hnu lawng lawngin Hawi hramh ka thiam, arak ti. Hawi hramh thiam khawhnak ding caah le an Thilrit chawn khawhnak ding caah Sianginn kainak Mansung mihna pek arak herh ngaichel zong arak um taktak ko.

Bawi Jesuh nih hi Bia arak chim lioah mah ca ngaihchiat le Hawi ca ngaihchiat hein arak chim chih ko lai. A hmasa bikah mah ca ngaihchiat kong ruat usilaw mah ca i Aihramnak chungah zeitin dah Lung lomhnak aum tikha kawl tuahhna usih! Hika zawn Fianternak caah Paul um tuning kha zoh usilaw cunih cun thil a fianh ngairua tiah ka ruah. Paul nih a Cakuat ṭial hmasa bikmi lakah Galatimi sin i a ṭialmi hi itel dawh asi i Galati misin Cakuat hi A.D 48 hrawngah si dawh asi. Cu liocun Paul cu a Krifa cannak zong asau tuk rih lo kan ti ko lai.

Cu a Cakuat kan rel tikah a ithawknak Bia cu; „Keimah Paul, Aposol [Lamkaltu] nih… Ca hi ka in kuathna,“ tihi asi. Hi Caan lioah Krifabu chung Rian ṭuan mihna lakah asang bikin an ruah mihna cu Aposol kha an si. Cu angan bikin asang bikmi Rian ṭuantu cu ka si i hi ka si ruangah Ca hi ka in kuathna tikhi a Sullam i langhter duhmi cu asi. Minung kawhmi siloin Bawi Jesuh Krih le Pathian kan Pa hrihrim nih kawh a simi keimah Aposol Paul nih Ca hi ka in kuathna ati. Cun mah hnu Kum sarih hrawng, A.D 55 hrawngah Paul nicun Korin khuami Krifabu cu Ca ahei kuathna i cu a Cakuat chungah cun; „Kei cu Aposol vialte lakah ahme [nauta] bikmi ka si i Aposol ti awk hmanh ka itlak lo,“ ati. [IKor. 15:9]. Mah hnu Kum riat hrawngah khan Efesa khuami Krifabu sin zongah Ca cu a kuathna i mahka cun; „Pathian mihna lakah ahmet [nauta] biknak hmanh zongin ka hme deuh,“ ati [Efe. 3:8]. Pathianmi rak timi cu Krifami tihi asi ko. Cun athih dengmang i a Ca hmanung bikah, Timote sin i a kuatmi Ca chungah cun; Vawlei cung i Krih Jesuh arung ṭum cu misual mihna khamh awkah asi i mahhna lakah angan bikmi [asual bikmi] cu keimah hi ka si,“ ati. [ITim. 1:15]. Vawleimi vialte nih Jesuh i Sal lakah angan bikmi pakhat cu Paul asi tiah an hngalh mipa nih, kei cu misual mihna vialte lakah angan [sual] bikmi ka si, ati.

Minung nih sau le thuk deuh ngaiin Krih hi kan hngalh i komh paoh tikah kanmah le kanmah kha ifiang deuh chin lemangin kan ihmu. Tahchunh nakah; Dahmei [torch-light] cu an van i aceu ngai. Sihmansehlaw Lam hla piin ka dir sicun ka Kutṭial kha fiangin ka hmu kho dihhna lo. Meiceu cu ka heinaih deuh lemang tikah ka Kutṭial cu fiang deuh lemangin ka hmuh khawhhna. Cu bantukin Bawi Jesuh kha kan naih deuh lemang tikah kan Ṭial kha fiang deuh chinin kan ihmu chin lemang i kan Ṭial fiang deuh chinin kan ihmuh deuh lemang tikah cun mizei dah ngaihchia loin aum kho hnga? Cu Ngaihchiatnak cu Bawi Jesuh nih ati duhmi Ngaihchiatnak cu asi. Kan chim cang bangin hi Ngaihchiatnak cu aleng lang sawsawh menmi Ngaihchiatnak asi lo, chung leiin a faktak takmi Ngaihchiatnak kha asi i Bawi Jesuh i Ceunak thawngin mah Sualthurnak kha a ihmu khomi cacun Lung lomhnak aum!

Cu bantuk Lungput angei cangmi nicun an Hawile caah khan ngaihchiat lo khawh asi lo. Minung hi Pathian nih a kan Serning hrimah khat le khat iherh dingin a kan ser i kan iherhnak hi kan Ngaihchiatnak le Retheihnak hin a Man aum bikcem. Khat le khat ingaihchiatpi cu Minung nih kan herhhrim hrimmi asi ko.

Sualthurnak a ihngal i Ngaih achia i Minung hawi caah Ngaih achia mihna cu Pathian nih a hnemhhna ati. Minung le Minung cu kan Sualthurnak kha kan ingaithiam ko kan ti tik zongah Tlam atlin lonak tampi aum. Na cungah ka sual, ka ngaithiam ko, ava timi Pa nih, ka in ngaithiam kho lo ti zongah arak ti khawh, na Sualthurnak angan tukhring hran timi ningzah lawng rak thlaih zong asi kho, a Ngaih cu ka in ngaihthiam ko lai i sihmansehlaw philh cu ka philh kho lai lo ti zongin asi kho. Sihmansehlaw Pathian sinin Ngaihthiamnak kha ahal tikah cun Hnemhnak ahmu. A Sullam cu Pathian nih a ngaihthiam taktak i a Sualthurnak kha aphilh bakin aphilh. Pathian nih na sual tuk ko nain ka in ngaihthiam, ka in cohlan ti lawng hmanh siloin hmaizahmi le upatmi Bawi bantukin arak tuah. Kan Sualthurnak le Sunghtlaknak hmunah khan a kan thlah ṭhan i Teitu si dingin a Vel khan Ralthuam bangin a kan thuamh.

Cucacun a Lengphaw cun a ikalhmi lo hmanh sehlaw a chung Muru cun Ṭahnak le Aihramnak chungah Lomhnak cu aum taktak i a ilawm mihna cu mah Sualthurnak ihngalh i aṭap i ahram i midang zawnruah le zaangfah ruangah Mitthli chuak mihna cu an si. Ruahti nih Vawlei cu Ti atoih tikah anem i Thlaici zong akheuh khawh bangin Minung i kan Nunnak zong hi Mitthli nih Ti atoih i anem tikah Lung lomhnak le Thanuamnak kha akho i apar i Thei tampi atlai.