Chungkuh le Zawngrual

Chungkuh le Zawng rual an rak um.

Zawngrual nih Chungkuh cu an nehsawh ngai. Chungkuh i Lorawl kung cu an ṭha ngai i Zawngrual i Lorawl kung cu an chia ngai.

Zawngrual nicun Chungkuh i Lofang cu athli tein an eipiak tawn. Zawngrual nicun Chungkuh an nihsawh tuk caah a Thlam chung Cite dur le Makthakhna zongin an thuhpiak tawn i Thlam chung khatin an Ekhna hoihna an ek tawn.

Nikhat cu Chungkuh nih a Thin har a ituar ve ti lo i Zawngrual Kotka hramah a Ekfun achiah i ahngah.

Zawngrual cu an ra, »E, thilfun kan ihmuh« tiah thanuam ngaiin an hun samh.

Chungkuh ekmi Ngasa lawngte asi.

„Aho Safunte maw ma lai thlang didia?“ tiah an au.

Cuticun an au lemang nain mizeihmanh nih an chonh lo tikah Sa cu an ei.

Cucun Chungkuh nih, »Ek eihna, Ek eihna« tiah alang hlatin ahun hauhhna.

„A nuchu, rimnampa, a Ek maw a kan eiter, kan Ek kan eiter ve lo ah maw“ tiah an ti.

Chungkuh Kotka hramah an Ekfun cu an chiah ve i a pawngin an hngah.

Chungkuh cu ahung i Kotka hram thilfun chiahmi cu ahmuh tikah Zawngrual funmi Ekfun asi ko lai, tiah arak hngalh cang.

A char ve i, »aho Safun te maw ma lai thlang didia« tiah a au.

Cucun Zawngrual cu, »khuk, khuk, khuk« tiah an ni.

Thilfun cu ahun samh i Zawngrual i an Ek cu Fangvoi le Thei lawng ngawtte asi.

„Zawng baw, Zawng keu, Zawng senrual Ek“ tiah ati i ahlonh.

Nikhat cu Chungkuh nih Zawngrual i Kotka hramah Bukbau tharte achiah i a chung tang cemah thir Fathul zum ngaimi le Cangal dur a ihunh i aum.

A cungah Puan le Hni hoihna achiah tung.

Zawngrual cu an hung.

„E, Bukbau tharte kan ihmuh“ tiah an ti i thanuam ngaiin an nih he an kheh he a turin an tur.

„Aho Bukbau tharte maw malai thlang didia?“ tiah an au.

Aho hmanh nih an chonhhna lo caah kan Nu, kan phorh lai an ti i an lakah angan cem pa nih aphorh hmasa. Tlawmpal ahun phorh cun thir Fathul zum cun a Keng zawnin ahun sawh i Cangal ahun toih.

„Ai zaw e, a ma ca rei kha, ka cik nih a ko seh“ tiah aiin Bukbau cu angalh.

Pakhat pa nih ahun ithawh ve.

Cuticun Chungkuh nicun ahun sawh ve i angalh ve. Cuticun an ichang lemang i an Keng cu Hma ahmuah dihhna. An takpum cu Thi lawng tein akhat dih. Bukbau cu an kaltak siang ṭung lo i Tarpa te an hnek chan khawh i acelh lo buin Inn tiang a tlikpi.

„Ka nu, Bukbau tharte kan in phorh“ tiah an hun ti.

An Nu cu thanuam ngaiin a Ke cu a ithluan i aṭhut buin Bukbau cu a El cungah athluk i Bukabau cu ahun kau.

Bukbau chung thil cu ahun chuah thluahmah. Zawngrual nicun an zoh ko. Thil ahun chuah thlu dih dengah khin Chungkuh cu Bukbau chungin ahung choi ciammam i Zawngrual nicun Tan boin Chungkuh kan tu an ti cu Chungkuh cu an nganh i an nu Ngalcar lehlam kiak koin an tuk.

An Nu cu ahung ai i an hun zuan hnawh; an nu Ke cu an zual lulhmalh. An nu Ke an tuam hlawm karah Chungkuh cu lo koin azam diam.

Zawngrual cu an Keng zawn Hma avon dam deuh hnuin, cu maw kan duh ve hnga, an ti i Tahrang nganpi an tah i Chungkuh Kotka hramah an chiah ve. Tahrang kharin Zawngrual cu an ṭhu i Mau Fathul le Tithawl kha an ihunh ve.

Chungkuh cu ahung i Tahrang cu ahun hmuh.

Zawngrual cu Tahrang awngin an Hmul chuakfek fukin Tahrang awng cun an Mit tleu leng luangin Chungkuh cu an hun bih.

Chungkuh nicun ahngal lo bantukin ai umter.

„Aho Tahrang therte maw ma lai thlang didia?“  tiah a au.

Cucun Zawngrual cu, »khuk, khuk, khuk« tiah an ni.

A au ṭhan.

Zawngrual cu an nih azual.

A hnupi cun, »ka iphorh kone seh« ati i Tahrang cu aphorh.

Tlawmpal akal hnuah khin a Keng zawnah Mau Fathul cun, »krek rok« tiah an sawh i Ti cu an heitoih ve.

A tei lo nain »ai zaw ve, ai zaw ve« tiah a aiter.

Zawngrual cu, »khuk-khuk-khuk« tiah an ni.

Lampi thluanchuak Mau Fathul sawh cu an ichang. Pakhat te hmanh nih a Keng cu atei lo. A kalpi lemang i khuazei Lungpang dah asang cem lai, tiah Lungpang sangcem leiah a kalpi.

Lungpang a phakah Tahrang cu Lungpang tangah athlak.

Zawngrual cu aicuk makin an vung tla. Farainu pakhat lawng Zun hnom lakah atang. Farainu nih, »silai, silai, ka ti ṭheo lo maw« tiah a iau seklen, a aipah.

Tarpate nih, »aho dah mah lai cu ahngal« tiah a aihram buin ahun ti.

Zawngrual cu an thi dih. Farainu lawng aluat.