Duh Mang le Dar Din

Duh Mang cu Bawi tlangval asi i a Nu le a Farle nicun;

„Aho Fanu ko dah kan ṭhit piak lai?“ tiah Khua an ruat.  Ramuk bawi Fanu kip cu Saduh an that.  Duh Mang cu Ngaknu len awk ahngal lo i Nikhat cu aum har tuk Inn pawngah Va pel dingin a ichok. Va apel nakah Va pel vemi a Hawikom tlangval pa he an itong.

Duh Mang nih;

„Ka kawi, nang aho dah na len tawn?“ tiah ahal.

A Hawipa nicun;

„Ka dua, kannih Ngaknu cu a Muisam achia tuk, a Sam chiat si, a Tungtai rem lo hleiah a Umtu ziaza achia tuk fawn“ tiah ati.

Duh Mang nicun;

„A Mui hmanh chia sehlaw len awk ka hngal lo i tuzan cu ka in zul ve ko lai, rak ka sawm pahte“ tiah ati.

Cuzan cu Duh Mang nih a Hawipa hecun Darte cu ava leng ve. Ngaknu te Inn i an phakah cun Darte nicun;

„Ai! cungai cu, Lung thli ruah loin Mangmang na rak kan leng ve mu“ tiah Awnem ziaimai tecun ahun chonh.

Duh Mang nicun Darte i Aw ahun theih cun a Hmaifang ahun bih i a Hawipa chimning cu sihin loin dawh le Sam ṭhat le a Tungtai rem le a Hmurka ṭhatning cu chim awk aṭha lo. Dar tithlet cio te alo ko.

Duh Mang Hla   Dar Din, Luput le Sam thlairem; a Nu hawi nih an iang lai lo; Tlang i Zur tidil an chim bang.

Acu zan thawk cun zawngte tikhor hmuh chain Duh Mang cu Dar Din te Inn lawngah aleng cang. Chun zongah cuka lawngah cun aleng. Zan khat cu Dar Din a Tlangval pawl nih Duh Mang cu paih an zuam i Duh Mang nih atei dihhna caah Dar Din cu a Lung asi tukhring hran.

Dar Din Hla   Paihbuan ser hlah u, Val ran nih; Val nih vun thluk lo Khuang Hliang ṭa; kam lo Chuncha bang dirleng lung.

Dar Din le Duh Mang cu an hun iduh ai cang. Dar Din cu michia Fa asi caah Duh Mang a Nu le Farle nih an duh lo. Duh Mang cu Dar Din leng kho hlah seh, tiah a Farle nih Innka an hrenh khanh. Cu zanah cun Dar Din te Inn leicun Pa ṭialṭum lo pathum an chuak. Dar Din cu Duh Mang arat lo tik a Lung aṭha lo i Tlangval pawlhna hmanh cu ṭhiṭha khin Bia zong a ruahhna lo.

Dar Din   Tuzan zan  hi zei zan thla maw;  pen dingdeng nih kan tlawng ti lo;  puar pempum lawng pathum rilhna. 

Tlangval   Puar pempum cu kan kal ai lai; pen dingdeng nih in tlawngte seh; kim cingceng te rung zau ai u, tiah an ti tak i Tlangval pathum cu an lawi.

Duh Mang cu amah Phun tluk a simi ngaknu Sai Ki cu a Nu le Farle nih an ṭhit piak. Duh Mang nicun Sai Ki cu duh lo tukah le huat tukah hin a Zun apuam tuk ati tawn. Dar Din ṭheo cu aleng tawn. Dar Din nicun Nupi angei cang ti ahngalh i ṭhiṭha hmanh khin achawn ti lo.

Dar Din   Zei ce, Zakkeh le Puan thuan maw; kha hlan bang ti cu ti ṭung lo; ṭhat fawn Leng dang Rim kai ai cang e.

Nikhat cu Duh Mang le Sai Ki bawinak ding caah Ṭang an su. Dar Din zong cu ahung chuak ve. Duh Mang a Farle nih Dar Din cu an huat tukah Hawi sin zongah umter loin amah lawng Tual parah Thirsum le Thirsum khalin Fang cu an sukter. Duh Mang cu Inn chungin ahung chuak i Dar Din cu a ngiatlen i ahmu lo. A hnuah Inn tualpar leiah ava ichok i Dar Din cu ahei hmuh. Dar Din sukmi Fang cu athlet dih i Vawlei he acawh hnuah an pahnih tein an ikup i Dar Din te Inn leiah an kal.

Duh Mang te Lo le Dar Din te Lo cu an inaihte i nikhat cu Lo leiah an kal ṭi. Zan lei tlunzat nawnah khin Dar Din cu ahei vioh i atheih cun Inn leitlun cu hmanhhmawh tuk cang kaw a Lo thlawh Tha zong a nuamset ti lo.

A Nu nih;

„Tlun aza rih lo“ tiah Dar Din cu asik.

Dar Din   Ka Nu phun hlah law zei hngal lo;  kan pin tlangin mi kui thei ing; sing Lo an duahlen lioti hna e.

Duh Mang arak tlung chung i Tlaitlan tuin arak hngah i Tlaitlan cungah cun arak it ko. Dar Din le a Nu cu an hung tlung ve. Dar Din nicun a Nu cu zah nawn kaw Duh Mang ṭhangh ngam loin akal pahin a Ke tucu ahei chuih pah.

Duh Mang   Dar Din a hlengin Val deuh hmang; khan rak dir law Tlaitlan dawh ah; zeizong khin kan ihal hawl lai e.

Voikhat cu Duh Mang cu kawllei Ram hranah akal i Ni saunawn arau.

Dar Din   Duh Mang Kawl ah Ram hrang Thla maw; avun tam cang maw Rawl loin; ka zun thil le Dairial kua lang e.

Duh Mang far   Nang zun thil le Dairial seksuk; ṭa khan kan dawt tluang ce dangin; kan ban thlum hman heitei ti lo.

Dar Din cu Tlangval rual nih an len.

Dar Din   Sangsang, kai hlah u Val ran nih; thlalang Kheng dawh Ngun Mang zaunnak; Bawi ai rim nan hlo lai lo maw.

Duh Mang cu ahung tlung i a Far lerual nih an rak don. Dar Din zong cu ava kal ve i a Far le nih;

„Nang Chumpurnu hi, kan ṭa don awkah na tlak lo, tiah an donh nain an hnu leiin ava kal ve. Duh Mang cu a Far lerual nicun pakhat hnu pakhat;

„Ṭa ṭa, keimah Zu ding hmansa“ tiah an tilen nain ading duh lo. Dar Din sin a phakah cun Darte arak putmi Zu cu adin i Inn leiah an tlung ṭi. Mah lio hrawngah cun Dar Din cu mikip nih an rak ham.

Duh Mang   Dar Din, ham hlah u Val rual nih; aMman khan tuak nan sem lai lo ngeih lo Mar caan Limsia nau hna.

Duh Mang nicun ka kal ve ko lai a tilen nain a Nu le Nifar pawl an Hna atla rihṭhiam ṭhiam lo.

Dar Din   Duh Mang, a Nnu nih kheng tla maw; khen sual um seh law Khua thawngin; Fapa sem kan cawi ṭi hoi lai e.

Duh Mang   Dar Din ham hlah u Val ran nih, an corua ding lo Mar bangin; kei khom tom hrukin ham ve lang e.

Duh Mang   Dar Din, ham cio hna Val ran nih, an King ṭial Nam an bah cio lem; kei khom tom hrukin ham ve lang e.

A Nu le a Far le Hna tlana lo buin cun amah Nawl lawngin Dar Din cu ava ham. Dar Din cu a Nu nih Arsa kheng he Duh Mang sinah a hunter.

Duh Mang nu nih;

„Nang rimnamnu nih hin maw ka fa Duh Mang cu na vat lai“ tiah arak ti.

Duh Mang nu   Duh Mang than dai lo Dar Din ṭhi; a Valhawi hmai del lai dek maw; ngeih lo Chaw ṭha pumpa ve kha e.

Duh Mang far   Duh Mang pakhat nih Dar Din ṭhi; chiahhrin Lengnu zulh ko thlakah; rang le rual ṭhi panin e.

Duh Mang le Da Din an iṭhit hnuah cun a Hawi le nih Duh Mang cu Ram hran an rak sawm. Dar Din kaltak sian loah a Hawi le cu;

„Ka imanh lo“ tiah a tihna. A Hawi le nicun ngawl loin an sawm tuk caah akal ve. Duh Mang nicun a Nu le Far lecu a zumhhna lo caah a Salpa sinah;

„Ka um lo karah Dar Din hi ṭha tein na rak zohkhenh lai“ tiah a chimhtak. Dar Din cu a Nu le a Far lerual nih Faar hlam an fial. Duh Mang i Salpa nicun, „ka zulh ve lai“ tiah a itim.

„Zul hlah“ tiah an thloh.

Sinain Duh Mang i Salpa nicun Tithawl hme tein Ti aken i Duh Mang i Nu le Farrual hngalh lo karah athli tein azulh. Ram lakah cun Dar Din cu Faar ahawl lemang. A Ti ahal i a Salpa i Ti phurhmi cu adin dih. A Ti cu ahal ṭhan. Ti um lonak Tlang carnak asi caah a Salpa cu Ti hawl dingah avak.

Salpa nicun;

„Ti ka va hawl lai i ka rau lai lo, khiang Ti hi maw rak ding hrihrim lai ci!“ tiah a chimhtak.

A Salpa Ti hawl karah cun a Tihal acelh ti lo i khiang Ti cu a dinsual. Cucun a Pumcheu bang cu Vui pumah arak icang.

A Salpa arak kir tikah Dar Din cu a Pumcheu bang Vui pumah arak ican cu ahun hmuh tikah zeitin tuah awk ahngal lo. A vansan le ngeihchiat bin Mitthli lawng atla lemang.

Salpa  Khi maw, kan Mei tlanfar hlamnak; nang Keneh hun khirh ti loin; Sai aw ka ṭap lai nichun hlan e.

A Salpa cu Inn leiah avung tlung. Inn phak hlanah Duh Mang cu arak tlung ve. Duh Mang nih;

„Ka nu! Darte ta, tiah ahal. Ka fa, Zuhui hi ei rih law ka in chimhte lai“ tiah  ati. Mah lioah cun a Salpa cu Inn ahung phan i a Sining vialte cu a bawipa Duh Mang cu achimh dih.

Duh Mang   Ka nu, Rawl ka ronh kal ai lang; vang zirziarte maw liam tal lai; vung dawn lai e zo tung rawnin.

Duh Mang   Ka nu, Rawl ka ronh kim ciuceu; vang zirziarte Hmun liam tuan kun; dir hmun zawl in ka dir te lai e.

Duh Mang cu Dar Din i a Far hlam nakah cun avung kal i avung phak tikah cun Dar Din cu Vui pumah arak icang dih cang.

Duh Mang ahun hmuh cun Vuipi cu a Mitthli atla.

Duh Mang   Sai aw, ni zerh in bual sual um seh law Khua thawngin Khua nih thiang seh tihna lai lo maw.

Vuipi nicun   „Duh Mang aw vung kir ko cang law“ tiah ati lemang.

Duh Mang   Duhte, duh bik cem vun ṭian cu; Sia bang kan dang hram har lo maw; tlangtlai Vaca bang zuang ṭi sih. 

Duh Mang cu Inn leiah kir duh hin loin Vuipi sinah cun aum i Vuipi nih cun;

„Vung kir cang ko law zeibang ti awk kan si ti lo cuta“ tiah a tilen nain Duh Mang nicun aduh lo. Duh Mang cu Vuipikeng cungah acuang i Vuipi nicun Fing le Tlang kipah Lung leng ngaihchia Mitthli he a hrawnpi lemang. Duh Mang cu Va phunkip onh le Tikhing thehreng onh lawng Lung leng le ngaih chiain atheih lemang.

Cuticun Saipi (Vuipi) cu lilen ngaih chiain Rawl ei lo le Ti ding loin Duh Mang cu angai i athi ve.