Hlawn Dawh Thang le Ţial Ciang

Hlan lioah Nuva nih Fapa pakhat te an ngei i a Min cu Hlawn Dawh Thang an sak. Hlawn Dah Thang cu ahung tlangval i tlangval dawh ngai le mi ṭhawng ngai ahung si. Khua khat chungah Ngaknu dawh ngai aum ve i a Min cu Ṭial Ciang asi. Ṭial Ciang hecun an hun iṭhi i Fapa an hun ngei. A minah Ngun Kar an sak. Hlawn Dawh Thang cu Khual atlawng i Khua pakhat aphan. Cu Khua chungah cun Lai Hri te Nufarual nih Hlawn Dawh Thang ti kan Hna lawng nih pei atheih lai tina lakah Hla aphuah lo tete cu Tuha koin kan idawi lai tiah an ti.  Hla cu an phuah cio i ahniang cem cu an hun thiah ve. A hniangnu te nicun, „Hung ka tu rih hlah u, ka hngak rih u, ka iruat rih lai“ ahun tihna.

1.  Rawl ka ei le ei lo zeilem thla maw, Zunhri kungah awk ai lai Ṭial Kar vangah.

2.  Ni te lingleng zoh in kaw, liam tim riangmang; vai pingpeng khua thla maw e dar kai ṭa.

Hlawn Dawh Thang cu Ngaknu aleng lemang. „Ngun Kar nu, zan khat tein Chiar hngak“ tiah Hlawn Dawh Thang nih ahei ti.

Ṭial Ciang   Ngun Kar ka pom phei e chiar thing hngak hei ti cu; kan tlung theih ngaknu an hung maw lian lai. 

Hlawn Dawh Thang cu Ngaknu dawh ngai Ni Ka he an iduh i aṭhit. Darkhuang a manhhna. Darkhuang cu an tum lemang.

Ṭial Ciang nih, „Ngun Kar dar cu ka Hna theih hnganah tum hlah u“ a tihna.

Nika ta   Ngunnu man darte beng lai vai haw parin; angai duh lo nan hnachawl hruk u.

Ṭial Ciang cu a Thin ahung i apa Lai Za Hre sinah akal. A Pa muihmuh lonak asau tuk caah Lam i Kuang arak sailen komi a Pa cu ahngal ti lo.

„Ka pa, ka pa, Lai Za Hre Inn hung ka chim“ tiah ati.

A pa nicun; »Hi Sia hmairangpi Mei hi itlaih law, na pa Lai Za Hre sinah a in tlunpi ko lai. Na pa Lai Za Hre i Inn cun a ipaina, a ivuana, Thiam takna, Ti thanna, sumsuna, Rawl chumna an si lai. Na fapa cu a pu Lai Za Hre alo hnga maw? Kuang saih hun ka chawng tuah seh« tiah ati. A fapa Ngun Kar nih Kuang saih cu ahun chawn i a Thingzal choimi nih Vate zalkhat achoih. Cu tikah „Aaa… Pu Lai Za Hre alo lai“ tiah ahei ti. Cu hnuah cun Ngun Kar le a Nu cu Sia hmairangpi cu an zulh i an kal. Apa Lai Za Hre cu Lam hlengin akal i Ṭhinṭhang cungah vatek Peng sau piin Pakuak arak zu hluah mahlen ko cu a Fanu nih ahun hmuh tikah, „Ka pa na si ko nain na ka hlen“ ati i anuar.

Lai Za Hre   Na hmet tein thlang khun na dim Ni ve kha, Lai Za Hre na pa ka min palh tla ci, ngun hri ser par ka sian lona hnawh ai maw.

A pa nicun Ṭial Ciang cu a Sam ṭha tein a hriahpiak i Cawicin parah a Maw le panga he Thiam a tahter hna. Hlawn Dawh Thang cu Ṭial Ciang te Inn pawngah a Hawi le he an va ichok.

A Hawi le cu;

„Ka duale, Cawicin par Thiam a takmi Ngaknu dawh ngai khi aho dah asi?“ tiah a halhna.

„Ka dua, na hngal ko nain na kan hal“ tiah an ti.

„Ka hngal hrim lo, ka chim ko u“ tiah a tihna.

„Ngun Kar nu asi ko hen khi“ tiah an chimh.

A heikal hnawh i;

„Ngun Kar nu“ tiah a heiauh. Hoih duh loin Inn chungah a luhtak.

A nu nih, „Ka fa, aho hme asi, ṭha lo pital cun heihawi hme“ tiah ati.

„Hawi-hawi-hawi“ tiah serhleih hawih khin a heihawih. Hlawn Dawh Thang cu a fapa Ngun Kar hecun chun nitlak an ipom. Ka kal lai ati tikah Ngun Kar nih, „Ka pa“ tiah aṭah. Ṭial Ciang zong cu a Mitthli atla ve. A Hawinu rual a Maw le nih, „Ṭial Ciang nih ava ṭah, »Hi-hi-hi« tiah an ti.

Ṭial Ciang:   Sem chin hrin thar kan cawi nih e ka Pa ti e, rung law ti chum Kot lengin za in chan hna.

Lai Za Hre nih;

„Ka fanu Ṭial Ciang duh nih ka Tual cungah thir khuan rua bunh u“ tiah ati.

Ni Kung Tlai Hlawn Khar nih;

„Keimah seh, ati i thir khuan rua cu abunh. Ṭial Ciang pa nih Vokthau sum nga athah i Ni nga an cam. Hlawn dawh Thang nih ka Nupi ti a ihngal nacun“ tiah ati i Kot leng leiin Nam hein a bawhhna.

Ṭial Ciang pa nih;

„Ka tupa, na kan duh ti lo kha, kal, kal, kal“ tiah aṭhawl. Sinain Hlawn Dawh Thang cu kal duh loin aum. Zeiti biachim awk an hngalh loh caah, »Ngun Kar nu nih chim seh« tiah an ti.

Ṭial Ciang   Ni Kung Tlai Hlawn Khar cu Phun nau ṭhek a ingai, kan cungah Lai Za Hre bel Ni bang tlang.

Mah acun Ni Kung Tlai Hlawn Khar cu a Thin hunin Thirfung cu aphawi vurmar i akal. Hlawn Dawh Thang le a nupi Ni Ka cu Bawite an bawi. Ni Ka nih Uico, Vok, Arkhong pawlhna cu Vawhla thawh a fialhna.

Uico nih Vawhla a ithawh   Cua law, nan ka ti e, Ektan tan khat ka koh hlanah Hngerhtlei hma thum nan ka thawi e.

Arkhong Vawhla   Tual i zingngo Buh fang nan pho ah khin e, Kaa khatte cuk ka zalh ah, Mu le Sahngar nan ka kawh piak e.

Vokthau Vawhla   Phiang le Mum hawng ka thlet ulaw, keimah thaupa dah ngai hriah hluan sawm ai a tleuhtu e.

Hlawn Dawh Thang nih Ṭial Ciang cu akawh ṭhan.

Lai Za Hre nih;

„Hlawn Dawh Thang cu Ngunpher kan man seh“ tiah ati.

Hlawn Dawh Thang nih;

„Nu nu khat cacun Ngunpher cu ka man kho lo“ ati. Cucacun Ṭial Ciang pa cu a Thin ahung i Tlangval cu a Inn khat tein asawm dihhna i an it. Ngun Kar pa cu Ṭial Ciang i Inn chungah cun avung lut i Tlangval vialte cu asih lemang dihhna i an lawi dih. Cu hnuah Ngun Kar nu cu Pokhlat awngin a zuanpi i an kal. Ṭial Ciang nih a Pa cu »Ṭhihni ka kalh« tiah ati.

„Nu nu khat caah Ṭhihni cu ka in kalh kho lo“ tiah a Pa nih ati i Ṭhihni cu a Taw tangin a iṭhutnenh.

Ṭial Ciang nu nih;

„Ṭial Ciang pa, »tho-tho-tho« na Taw zawnah Arek aum“ ati i Ṭial Ciang pa cu ahung tho. Cu tikah Ṭhihni cu Ṭial Ciang nu nih alak i Ṭial Ciang sinah a heihlonh. Ṭial Ciang pa cu a Thin ahung i »An nuchu, khuazeiin thla an kalte lai« tiah ati i Kotka cu ahrenh khanhhna.

Ṭial Ciang   Mi lian ka pa ha tlai lo rung chuak ai law; thor ah zo sung nu man dang ka hal ṭhan; Na fapa Thla Khar lennak thur rak thiam law.

Ṭhihni cu a pa sinah Ṭial Ciang nicun a heihlonh hnawh. A pa cu a Tha anuam i »Haw-haw-haw« tiah ani. Mah hnucun Kotka cu a hunhhna.

Nikhat cu Hlawn Dawh Thang le Ṭial Ciang cu Bawite an bawi. Hlawn Dawh Thang le Ṭial Ciang cu an izul thluaimai. Cu liocun Ni Ka nih an laicerin a ṭhen rihhna.

Ṭial Ciang nih;

„Aho Chumpurnu dah“ ati i Ni Ka cu a Ṭhi zong cat viarin anam. A Hawi nurual nih, »Maw Ciang nih a Pasal aham, hi-hi-hi« tiah an ni.

Ṭial Ciang   Ham hlah in za cut bual ah, kei chan ah leng ai titer, thang na seh ti ka siam hram.

Hlawn Dawh Thang cu thin chiatin a Chawn fung he Buallai i an Lamnak laicer bakah a it ko, a Zang chawn fang zong ka khiah dih lai“ tiah ati.

Hlawn Dawh Thang   Ho valpa ai hram ka lu ah chawn phawi zal, khua lul khom tlung cio hna, Lian ling bel ka min tlawm lai.

A Ke achaih vurmar i atho.

Khuangcawi arak zawh vemi Mikeipa nih Hlawn Dawh Thang cu;

„Ka dua, kan izuam lai“ tiah ati. Cu tikah Hlawn Dawh Thang nih Fei aleh i Fei cungah alam, Nam aleh i Nam cungah alam.

Mikeipa cu azuang vurmar i Farkung cungah Bongte alak.

„Ka dua, kan itluk ceo, kan ikawi lai“ tiah Keitlaupa nicun ati.

Mikeipa nih;

„Ṭial Ciang hi na Far maw asi, na Nupi dah?“ tiah ahal. »Ka Far asi« tiah ahlen. Chun nitlak an lam. Hlawn Dawh Thang cu Rawl anuar i Rawl loin aum.

Ṭial Ciang  Thor le Zokhua nu vangah na va hram cu, ka kut rawl na nuar maw? Hlawn Dawh mi thang.

Hlawn Dawh Thang   Thor le Zokhua na ti cu na tawk thla maw, Anmah cang cun bawi ve ngai Chuntei le vankhawng.

Hlawn Dawh Thang cu chun nitlak a nupi Ni Ka sinah aum.

Cu liocun Mikeipa nih Ṭial Ciang cu arak len. Ṭial Ciang cu Inn lengah Thiam atak. Mikeipa cu Ṭuang awngah a Mei ithlai zuarin Ṭial Ciang a Siang cungah a Lu khin zauin Ṭial Ciang cu arak dailen.

Hlawn Dawh Thang cu ahung lawi tikah Keitlaupa cu a Nupi pawngah ahnger koin arak ihnger ko cu alang hlatin ahun hmuh. A thliin Inn tang a heizoh. Keitlaupa Mei cu Rrpi farual nih, »rik-rik-rik« tiah an awn an zam, an naih pahlen ko cu a heihmuh.

Cu tikah Innchak leiah akal i;

„Aho hranchia tang dah, milai Nupiliang cungah a ihnor seklen ko“ tiah ahun auh. Mikeipa nicun;

„A Nupi damu asi ka hngalh lo, a Zangvan ṭha lai, ahei ka hlen mu“ tiah a Thin hunin aper vurmar.

„Hmeinu nu Inn tangin seh ka rak bawh, ka sehhrim hrim lo acun ka duh lai maw“ tiah a cerin a icer.

Hlawn Dawh Thang nicun Mikeipa nih a ka bawh ti ahngalh tikah;

„Khan e, a ka chim lo, a ka ruah lo ti lai uci law; Hmuichon ka isel lai hi e“ tiah Hmeinu nu Inn tang leihoih zawnin Meithal a itinh i a au.

„Keimah ka um e, keimah ka um e“ tiah Mikeipa nih ahun ti. »Hau kain seh ka bawh« tiah Mikeipa nih Hau kain abawh.

„Hau zawnah Hmuichom ka isel lai fawh hi e, a ka chim lo, a ka ruah lo timaw um lai uci law“ tiah avon au i Hau leihoih incun Meithal a itinh.

Mikeipa nicun, »Keimah ka um e, keimah ka um e« tiah ahun ti ṭhan. Cuticun ati lemang i Mikeipa cu a Khua tiang tlung lakin atuah.

Hlawn Dawh Thang cu Ṭial Ciang hecun Fanu te an hun ngei i Mang Dang tiah Min cu an sak. Ahung Nungak hnuin Ni Kung Tlai Hlawn Khar nih a Nu hmanh ka ṭhit khawh lo, tiah a Fapa caah aṭhit.

Ṭial Ciang nih an salpa Hawl Kom cu, »Mang Dang manmi Sia vung kan ne« tiah afial.

Hawi Kom cu Ni Kung Tlai Hlawn Khar te Inn leiah avung kal. Hawl Kom sinah Mang Dang cu kal a itim.

Ni Kung Tlai Hlawn Khar nih, »Ka vahau, kal-kal-kal, Hawl Kom duh sikun ka Man kir seh« tiah ati. Mang Dang nicun Hawl Kom cu azulh i a pa Inn fuh ngam loin saihremin Buk cu an isak i an um. Mang Dang pa nih a fanu Man cu akherh dih.

Hawl Kom cu Ram hran a itimh caah Mang Dang nih a Nu cu Zal ava hlan.

Ṭial Ciang nicun; »Mang Dang cu, Zal cu heihlan u« tiah a Salle cu ahei tihna. A Salle nicun; »Keh leiin Sal, vorh leiin Sal, Zal khat tein Ṭhiṭial rual hun phorte seh« tiah serhsat zawmhtaih ngaiin Zal cu an heihlonh hnawh.

Hawl Kom cu Ram hran nakin ahung tlung Ṭhiṭial rual Zal khat le Sal rual Zal khat bakin ahun phorh taktak.

Mang Dang nicun thil ṭhit nakah tiah a Nu cu La ahal lemang.

A nu nih; »Cu reru na thil ṭhit tam cu« ati i La tompi apek. Ṭhi cu rualtam ngaiin athil dih.

Hlawn Dawh Thang nupi Ni Ka cu athi i lamserh dingin an timh. Khuavang ngeinu sinin Ni Ka cu thil an kuat. Ni Ka nicun Mithi khuain lamserh Ni tikah Cangcel le Vok ek ṭhing lam ahun thiahhna. Lamserh Ni tikah cun Hla an sa i an lam.

Vok ek Hla   Ni Ka a thing kan dim ni ah hin, van rialruah aw rung surh hlah, lai cerh ni aw rung tlang law.

Ni cu ahung tlang tungmang. Vok ek cu nakhut matin an lam i Cangcel carngir ngerin an um.

Cangcel Hla   Ni Ka a thing kan dim ni ahhin laicerh ni awm rung tlang hlah; van rial ruah aw rung sur law.

Cu acun Ruahpi ahung sur urmar i Cangcel cu tleuvur marin an lam. Vok ek tucu an parh tunman.

Hla an sa i chun nitlak an lam. Nu pawl cu Lukhimh an ikhimh, Hnika an ifenh, congnak Puan an iaih i Ruakha an tla.

Hlawn Dawh Thang le Ṭial Ciang cu Khuangcawi dingin an itim. Cu tikah Khual tlawn nakah Marnu sinah arak ngeihmi fanu le fapa zong an kawhhna. Kan nu le kan pa nih zeitin dah an kan ti lai, tiah an Thuam ṭha ṭha cu an chiahta i Hnipuan chia an ihruk. Marpuan chia an ikeih.

Ṭial Ciang nih Inntual parin a Fa le cu ahei don hna. A hawi Nurual nih; »Maw Ciang, na Fa le cu an idawh maw?« tiah an heihal.

„Ai, an Muisam cu aza ko nain an Mar fa hngalh nakah an Fenhhruk bel achia“ tiah ati.

„Mah ticun an hei kan tihrim hrim, Ṭhihni a kan pek lo sicun kan Lung aṭha lai lo“ tiah an nuar.

Ṭial Ciang nih Ṭhihni cu a pekhna.

A Fale   Ka nu maw Ṭhihni veng ka pa thla maw, cumci awih zen lo Mar te ka pu.

Marpate   Lai cin ka u le inn ah rawl ka hrawnnak, a ṭhitnak puan ka ngei lo, za te dawn lai.

Nungak rual   Marpate aw, na mui na hmel ṭha pen, biar i menh law khuaza na thang hnga.

Marpate cu Nungak rual sinah cun alam ve. Nungak rual nicun Hla an heiphuah lemang.

Mang Dang nicun zeitin dah an ka ti lai, tiah Hnipuan chia a ihruk i Puan chiain a Fa apuak.

Ni Kung Tlai Hlawn Khar nih, »Ka vah nu, mah ti khan maw na va si ve« tiah ati. Inn leiah avung kir i Ṭhiṭial rual a Hngawng khat tein a ioih, Hnika a ifenh, Congnak puanin a Fa apuak i ahung. Ni Kung Tlai Hlawn Khar nicun azoh hmanh azoh ngam lo.

Hlawn Dawh Thang le Ṭial Ciang cu nuam tukin le ngawl sian loin chun nitlak zanvar an lam lemang.