Hrang Cal le Pa Thir

Khua pakhat chungah Milianpa nih Fanu dawh ngaimi angeih i a Min cu Khum Or ti asi. A Fanu cu azoh thlangai ngai. Nungaknu cu a idawh ngamsam i Tlangval rual nihin an duh tukah rawlṭam le tihal hmanh hngal loin an helh.

Ngaknu cu a izum ngai ve i Tlangval rual cu zeirel loin ahei um hnawhhna. Tlangval nih ṭhit dingin an hal zongah Pasal ngeih duh lo phunin aum. A pa zong nih a Fanu cu a iuang ngai i a zohthla ngai.

Apa nicun, »Ka Thirsum, Inn tualin Inn lengah akhing khomi cu Chawva loin ka Fanu hi ka pekhna lai« tiah ati.

Tlangval rual cu mahtluk Nungak dawh ngai Chawva loin hun co lai cu an ruah tikah, »keimah, keimah« tiah an icuh i Thirsum cu an cawi khona loin an pang Hri zong cat dih viarin an cawilen cu ahninh hmanh an hnin kho lo. An Keng tha zong an ichat dih viar, an hrum he an ai he a zawtlam azawt dihhna.

Cu Thawng cu Khua dang Tlangval zong nih an hun theih cio i an izuam cio nain an cawi kho cio lo. Sinain an Khua pawng ummi Keitlau tlangval nih atheih ve i ahung tlung ve.

Nungak te Inn cun ava leng.

Tlangval rual hmaika cun Thirsum cu Inn lengah akhin khawh. Nungak pa nicun, »Ka biakam pei asi cu« ati i Vokthau sum nga athah, Zupu tam ngai adah i nungak Tlangval pawl cu zanvar an lam.

Athai zingah a Nu le Pa nicun Buh fun milu ngaw, Sa fun milu ngaw an funhhna i Khum Or le a Pasal cu a Pasal te Khua leiah an kal.

Cu Ni i Tlangval pawl cu an Zaang azun ngaihna i Lo leikal rianṭuan zuam loin Puan an itung thlerh i chun nitlak an it ko. Kothau an heilonh vial hrawngah a Pasal nicun, »Khum Or, ka Rawl aṭam« tiah ati.

Cu kar »rawlṭam cu« tiah Khum Or nicun ahun ti.

Tlawmpal an kal hnuah, »Khum Or, ka rawlṭam« tiah ati ṭhan i Buh le Sa cu apek i a ei.

Ahnu tlawmpal an kal bakah, »Khum Or, ka rawlṭam« tiah ati hoi.

„Cu reru rawlṭam cu Keitlau maw na si, Thianhring hme na si“ tiah Khum Or nih ahun ti.

„Aw, Keitlau ka si hi na ka hngal lo maw“ tiah Keitlau pa nicun ahun ti. Khum Or nicun Keitlau asi lai ticu azum lo nain a Lung ahring pah.

An Khua cu an phan.

An Khua phak hnu Ni tlawmpal arauh hnuah Keitlaupa nicun, »Thaizing cu chiarchak chiarthlang ka vel lai« tiah ati i Lam hla ngai aphan i arau ngai.

Cu hnuah, »Thaizing cu Kawlkil vaikil ka deng lai« tiah ati i Inn pawng kamah akal, chiarchak chiarthlang avel.

Nikhat cu chiarchak chiarthlang ka vel lai ati i Kawlkil vaikil atlawn karah Umpu chung i a chiahmi Sathu cu Khum Or nih ava zoh tikah cun minung Lu le Ban lawngte ahmuh. Aṭih tukah zawt a itim, raihrang fanh tein afanh. Keitlau maw asi ka hngalh lo ati i »Ka pa le nih hung ka la hna seh« tiah Bia a cahhna.

Cu tikah a Pa nih, »Ka fanu Khum Or ala khomi cu Chawva loin ka pekhna lai« tiah ati.

Mizeihmanh nih an la ngam lo.

Hrang Cal le Pa Thir nih, »Kanmah nih kan lak lai« tiah an ti.

Keitlaupa Lo leiah arak kal kar lakte hrawngah an vung tlung, Khum Or lawng cu arak um.

Khum Or cu arak um. Khum Or cu a Tha anuam ngai nain an kalnak ding a Khuaruah ahar. Sinain Hrang Cal le Pa Thir cu Meicum cungah Nurel nganpi a khuhhna i Tithawl a hunhhna.

„Ka vapa ahung tlun tikah Meicum ahun dah sicun Tithawl chung Ti hi tlawmpal tlukin rak thle te u. Cun chiarchak chiafthlang ka vel lai ati tikah hin, Lam hlapi leiah hin akal i arau ngai. Kawlkil vaikil ka deng lai, ati tikah hin Inn pawng kamah aum tawn.

„Cucu rak hngalte u“ tiah a chimhhna.

Keitlaupa cu zan leiah Lo leiin ahung tlung.

Inn chungah ahung luh cang kain, »Humm, Laimi rim anam« tiah a thil ṭhumh pah buin Inn chung cu angiat.

A nupi nih, »Keimah pei Laimi ka si ko cu, keimah Rim teh na theih ko lai« tiah ati tlawmpal aṭhut tlukah, »Humm, Laimi rim anam« ati i Meicum cungah a Kut incun a heidah. Hrang Cal le Pa Thir cu an Thin zute lemnak aum lo, umtu awk an hngal lo.

Hrang Cal cu pa Lung ṭhawng deuh asi i a ining deuh. Pa Thir hrimhrim cu pa ṭengṭong mi ralchia deuh asi i aṭih tukah a Taw, Ṭhim tlum loin a isim raihrang fanh bantukin ather.

Khum Or chim bantukin Tithawl chung Ti cu tlawmpal an hun thlet.

Khum Or nicun, »Cu chimh na ngaih lo cu aw, Zuhui fati lam na thlet dih cu« tiah thin ka mangin ahun rak i angawl.

Zanriah an ei i »Thaizing cu Kawlkil vaikil deng ka tlawng lai« ati i chiarchak chiarthlang avel.

Athai zanah cun, »Thaizing cu chiarchak chiarthlang ka vel lai« ati i a Nupi cu a Tha anuam ngai.

Keitlaupa Hau leng achuah cang kain Hrang Cal le Pa Thir cu a auh zau hna i »leklak« tiah an hung ṭum.

An thil an timh zok zokhna i an kal.

Lam tanṭim an kal tlukah Khum Or nih, »Ee, ka Ngunchin khup ka philh« tiah ati. Hrang Cal nih, »Keimah nih ka vung lak lai, khan Pa Thir, a ichok chukcho mizeipaoh nih aho Nupi tiah in halhna kun, Hrang Cal nupi tiah na ti lai« tiah a chimhta.

Lam pawngah cun an ṭhu ko. Khuachia khuari rual nih, »Aho nupi dah asi?« tiah an hal.

„Hrang Cal nupi“ tiah a tihna i an lan. Khuachia rual cu an hung i cuticun an hal lemang.

A hnuah cun a Thin ahung ve i »Keimah nupi« tiah a tihna. Cucang kacun Pa Thir cu an tlaihhrem i a Lei an tan i Khum Or cu an kalpi.

Hrang Cal cu ahung, »Pa Thir, Khum Or teh?« tiah ahal.

A holh kho ti lo.

„Lawl-lawl-lawl“ ti lawngin ati i a Kut dongin Khuachia rual luhnak Hngerhteka bantuk a Kuami cu a sawhpiak.

Hrang Cal nicun Vawlei kua cu Chemphut incun achem i Vawlei tang cu ahun bih. Khuari rual cu ahei hmuhhna.

An vung ṭum.

Khuachia rual nih Khum Or cu Hnipuan chia an hrukter i a Lu an kongh.

Hrang Cal nicun, »Khum Or sampeh zokzok u, a Hnipuan hun pe dih u, Pa Thir Lei hi hun bunh zokzok u« tiah Khuachia cu ahro dihhna i rianrang tein an hun tuah dih.

Hlei an donh i Pa Thir le Khum Or cu a kaiter hmasa colhhna.

Vawlei cung an phakin Pa Thir nih Hrang Cal cu Hlei aphelh khanh i Khum Or cu Inn leiah a tlunpi.

Pa Thir nicun Khum Or cu, »Pa Thir nih a ka lak, Hrang Cal cu a umnak hmanh ka thei lo na ti lai. Cu bantukin na chim lo sicun ka in thah ko lai« tiah Lampi thluangthluan aṭhih phaih, a soilem pah i Khua cu an phan.

Khum Or pa nih, »Ka biakam asi lo maw« ati i Pa Thir hecun Ṭhitumnak atuah piakhna.

Pa Thir cu lungawi ngai le hnangam domin aum ko.

Hrang Cal cu Hlei aphelh khanh caah achuak kho ti lo i Khuachia nungak aṭhit i Khuachia sinah aum ve.

Fa pahnih angei.

Leng atuh i »Khum Or co kho ding ka si sicun Kum khat chungah Vawlei chun law« tiah ati.

Leng (Ṭekbu) cu akheu i Lengzun cu Kum khat chungah Vawlei kua cu aphak. Leng zunin cun rianrang tein akai. A fale nih dawi an hun timh paoh Lengzun cu aphelh khanhhna.

An Khua leiah cun avung tlung i Hmeinu Inn chungah alut. Cu lioah cun Pa Thir le Khum Or cu Bawite bawi an rak itimh liopi asi.

Khum Or cu Chang fun nakah Hnah ahal.

Hrang Cal nicun Hmeinu cu, »Bukpi chungah ka um lai i Khum Or nih Hnah a hungin hal tikah, Buk chungah va zoh ko, na ti lai« tiah achimh.

Khum Or cu Hmeinu Inn cun ahung taktak i Hnah cu ahal. Buk chungah cun Hnah ahun dah khin Hrang Cal nih a Kut ahun tlaih. Khum Or cu alau ngai.

Hrang Cal nicun, »Keimah maw na ka duh deuh lai, Kawi Thir thla?« tiah ahal. Nangmah pei a ka Latu na si cu, na thi cang rua, tiah pei ngaihchia ngaiin ka um peng ko cu, nangmah ta ka in vat ko lai« tiah ahun ti.

„Sinain Bawite bawi cu tuah ne ko kun rih u“ tiah Hrang Cal nih ati.

A thaizing cu Bawite bawi cu an tuah i Inntual khat tein Zupu an dap, Sa an that. Inntual khat tecun an lam. Pa Thir cu Pawngpi a iponh, Biarpi a ikaih, tawn lo Puan a iaih, Chawn a itonh i Inntual laicer cun izum ngaiin a iher luar ko.

Cu lioah cun Hrang Cal nih azuan hnawh i Vainam harin Tan hnih bakah achuah.

„Aw, zeibia dah?“ tiah zapi tein an hun zuan hnawhhna.

Cu tikah Hrang Cal nicun a Sining vialte cu achim i Khum Or zong nicun ahun chim ve.

„Aaa, a Ruak zong fim awk atlak lo; Hauhruang chia lakah heihlonh u“ tiah an ti.

Cu hnuah Hrang Cal le Khum Or cu an ium ṭhan.