KAN HERH PATHIAN TI A IHNGALMI

 „Kan herh Pathian ti a ihngalmi cu,

Lung lawmmi nan va sihna dah!

Van cung Pennak cu nanmah ta asi.“ [Mat. 5:3]

Bawi Jesuh i Tlang cung cawnpiak nakah hin „Lung lawmmi nan va sihna dah!“ timi Biatlang (sentence) hi kan hmuh lemang i mah Biatlang hi zei dah a Sullam asi ti kan hngalh hmasat hin adang zong hi afiang deuh kho lai. Bawi Jesuh nih arak cawnpiakhna i „Lung lawmmi nan va sihna dah!“ ati tikah hin Aramaik Holh arak hman lai sikaw, cucacun Jesuh i Lungput tak takah hin zei Sullam dah hi Biatlang nih arak ngeih ti hngalh khawhnak ding caah hin cu Biafang (Word) cu kan von zohta hmanh lai. Biakam hlun chung kan zoh tikah mah Biatlang hi kan hmuh lemang. Salm 1:1 chungah;

„Mitha lo mihna Khuakhannak chungah

a itel lo i misualhna Lam zong azul lo i

Pathian kha a nihsawh mihna sinah aṭhu lomi cu

Thluachuakmi kha an si,“ ti kan hmuh.

Cun Salm 32:1.2 zawnah;

„A Sualthurnak ngaihthiam asi i

a Palhnak maimilh a simi cu

a Lung kha a ilawm.

BAWIPA nih Sual phawt lomi le

a Lung chungah

Hlennak ngei lomi cu

a Lung kha a ilawm,“ timi aum.

„Thluachuakmi“  ti le „Thluachuahnak hmumi“  ti le „Lung lawmmi“ tihi Sullam khatte an si, an Sullam a ikhatmi lawngte an si. Biakam hlun kan von zoh nakin thil pakhat avon fiang ngaimi cu; „Lung lawmmi nan sihna, Thluachuakmi nan sihna, Thluachuahnak hmumi nan sihna“ ti tikah hin hmailei a site lai ding khi siloin asi cangmi le asi liomi asi tihi asi. Atu nan Sining hin „Lung lawmmi nan va sihna dah, atu nan Sining tein nan si ruangah hin Lung lomh awk nan sihna ko, tinak asi ko.

„Kan herh Pathian ti a ihngalmi cu…“ tihi a Biafang incun Thlarau leiin siloah Lungthin leiin sifakmi cu tinak asi. Hi zawnah hin Biafang ruah awk tlak a simi Sullam cu „Sifak“ tihi asi. Sifah tihi „ngeih lo, pam“ ti asi i zeitin dah mi cu Thlarau leicun kan pam khawh lai? Thlarau pam cu aṭha lomi cupei a sikun hnga cu! Cucacun Lung lawm mihna nih an ngeih lomi, an Pamnak hi Phun dang asi ko lai. Bawi Jesuh nih a Pammi cu Lung lawmmi nan va sihna dah ati tikah hin an ngeih lomi thil cu Lung lomhnak a chuahtertu thil asi lai.

Minung hi mizei Miphun hmanh kan si zongah ṭhan a kan dawntu bikcem cu ka si ve, ka hngalh ve, ka thiam ve, ti i Ruahnak rak ngeihnak Lungput hi asi. Voikhat cu Guitar tum thiam ngaimi Pa sinah hin Tlangval pakhat ava kal i na sinah Guitar tum ka cawng lai ava ti. Mahti ava ti tikah cun; kei cu ka thiam nawn cang i tampi cawn ka herh ti lai lo. Cucacun Hawi nih Cawnman i zakhat an in pek sicun kei nih sawm ngan ka in pek sicun aza ko hnga lo maw, ava ti. Cu tikah Guitar tum thiam ngaimi Pa i Sayapa nicun; „Thiam taktak na duh sicun, ka thiam cang tiah na iruahmi hrawh nakah khan zakhat na ka pek lai, cun cu hnuah thiam taktaknak dingah Hawi pek cio ningin zakhat na ka pek lai. Cu locun ka Sianginn cawnnak chungah nang cu na lut kho lai lo,“ tiah aleh. Kha tlangval Pa nih a ngeihmi Thiamnak asi ṭung lomi Thiamnak kha thiam taktaknak hmuh duh acun ngeih lo i a hramin ithawk ṭhan ahau. Hibantuk ṭhiam ṭhiamin hi Pathian le Minung i kan ipehtlaihnak zongah hin asi ve. Kan chungah Pathian i Pennak aum khawh nakhnga dingah hin kan chung i arak um cangmi miṭha ka si ti Lungput kha achuah hmasathrim hrim awk asi i kha Lungput khan kan pam hnu lawngah Pathian nicun a kan uk khawh lai.

Cu Lungput le Ruahnak cu „Van cung Pennak“ timi Biafang chungah hin alang ngai. Judah mihna nihin Pathian hi an upat tukhring hran i an ṭihzah tukhring hran caah hin Pathian tiin an ko ngam bal lo. Tahchunh nakah a ṭhami cu kannih Laimi nih Min fang kheh tein ikawh kha ihmaizah lo le iserhsat (despise) i kan irel bantuk hi asi. Cucacun Pathian ti nakah hin Elohim tite hnain an ti, El-Shadai tite Adonai tite hnain an ti i an Sullam cu zeizong vialte tuah khotu ti hoihna an si. Mahban tukṭhiam ṭhiamin Pathian nih Minung a kan Uknak ding kong chim duh tikah hin Pathian tikha cu hmaizah lo le upat lo Biafang kha asi caah Van titu kha Jesuh nih khan ahman i „Van cung Pennak“ ati tikah khan achim duhmi cu „Pathian i Uknak“ ti asi ko. Hi Bia nihin Sullam dang pakhat a heifianh rihmi cu; Bawi Jesuh nih; „Bawipa, Bawipa tiah a ka timi paoh menin „Van cung Pennak chungah an lut dih lai tinak asi lo, sihmansehlaw Van cung ummi ka Pa nih tuahhna she ti a duhmi atuah milawng lawng kha an lut lai,“ [Mat. 7:21] tiah a timi khi asi. BAWIPA, BAWIPA, BAWIPA tirum roin Pathian hoihna kan auh lemang hi BAWIPA ti achim kan tamh ruangah hin Pathian nih a kan theih deuh lai kan ti sicun kan ipalh riureu lai. Cucacun kan herh Pathian ti ihngalh cu zei dah asi? Kanmah Ṭhatnak, Fimnak, Thiamnak le thil ti khawhnak kha zeihmanh an rak si lo i kan herhtak takmi cu Pathian asi tikha asi i kha Lungput angei mihna cu Pathian uk mihna kha an si i Pathian uk mihna cu Lung lawmngai ngaimi an si. Bawi Jesuh nih amah a Zultu pawlhna caah a chiahmi Lam cu nanmah nan Sining kha hlonh ulaw Pathian kha iukter u, Pathian a iuktermi cu Lung lawmmi nan va sihna dah! tihi asi.

„Kan herh Pathian ti a ihngalmi cu, Lung lawmmi nan va sihna dah! Van cung Pennak cu nanmah ta asi.“