Lung a Thiangmi

Lungthin a thiangmi cu

Lung lawmmi nan va sihna dah! [Mat. 5:8]

Lungthin a thiangmi tiah Bawi Jesuh nih arak ti tikah hin mizapi Lung chungah khan kha Bia nih zei Sullam dah angeih tikha kan von ruatta hmasa lai.

Biakam hlun chungah kan hmuh lemangmi cu Saram thiang le thiang lo [Lev. 11]; cun Mithi [Miruak] tongh cun thian lo asi [Nam. 19:11-13]; Rawl eilai Kut ṭawl tite pawlhna an si. Cun thil dang pakhat kan hmuh rihmi cu Tlangbawi si awkah khan Aaron tefa si aherh i mizeimaw cu zeitlukin a Ziaza thiangin ṭha hmanh sehlaw Aaron tefa asi lo sicun Tlangbawi si awkah athiang lo. Mipa pakhatkhat cu misual ngai, Nu le Pa cung Sualthurnak zongah duh tawkin a ummi, a Hawile zong deh le ahleng zungzaltu asi ko hnga, sihmansehlaw Aaron tefa asi paoh sicun Tlangbawi thiang sinak kha zeihmanh nih adawn kho lo. Cucacun chim duhmi cumi nih khan Thiannak tikha aleng leilawng lawngin an rak ruah i Phunglam zulhhna, Aaron tefe site pawlhna kha Thiannak asi tiah an ruah caah annih Ruahning he khan cun Bawi Jesuh Krih nih ipehtlaih kha a duhhrim hrim lo ti cu alang. Anmah Judahmi nih an iti tawn bantukin, „Mithiang“ mi cu Lung lawmmi nan va sihna dah! tikha Jesuh nih ati khawh vemi asi. Sihmansehlaw Jesuh nih thian a timi le Judahmi nih thian an timi an idang ngaingai i cucacun Jesuh nih „Lungthin a thiangmi cu,“ a titheng thengmi cu asi. Leng leiin thian le chung leiin thian cu an idang ngaingai.

Jesuh cacun Thiannak cu leng leiin Thiannak kha asi lo i chung leiin Thiannak, Lungthin, Ruahnak le tinhmi vialte Thiannak kha asi. Lungthin thian cu tah zei dah asi? Lungthin thian ti tikah hin a Sullam tampi aum lai nain a biapibik a simi cu Lung chung i tinhmi le thil ṭha lo cawh chih ṭhup lo [unmixed] hi asi. Lung chung i tinhmi cu thil ṭha lo he cawh chih lo von ti tikah hin ahar bik cemmi thil asi i hi Bawi Jesuh chimmi Bia hi mizeihmanh kan caah mah le mah icek le ihlat, kan Lung chung taktak von ibih le izoh aherh tertu asi i cu bantukin kan von ibih le izoh tikah Ning azak lomi le Hmai achia lomi mizeihmanh kan um kho lai lo. Mah zawnruat hleng lo a lomi thil kan tuahmi te pawlhna zong khi a chungah mi thang ṭhat duh nakhna mah nih rak Miak [credit] ve duh nakhna, arak itel tawn. Cucacun Bawi Jesuh i Duhmi cu kha bantuk a itel lomi Lungthin thiang kha asi ṭung tikah hin zeitin dah kan tuah lai i zeitin dah kan um lai? Phung chim awk kan itimh le chim hmanh zongah kha thil thur kha kan Lung chungin alo dih taktak maw? A hman tein kan iti sicun, ziah Phung kan chim dihhna i mizeimaw nih na Phung chim aṭha tiah an kan ti tikah kan ilawm ngaingai i na Phung chim aṭha lo an kan ti tikah, „aa cuticun kha tikhan asi caah peimaw aṭhat lonak cu asi cu kan ti tawn“. Bawi Jesuh nih a chiahmi tahnak Fung hmangin kan von itah ciammam sicun mithiang bikah pakhat i kan chiahmi Paul hmanh nih, „Misualhna lakah angan [sual] bik,“ ka si ati ko. Kan thiang nawnrua tihna i kan rak iruah tawn hicu Thiannak he cun kan va ihlathring hran dah! Voikhat cu John Bunyan kha Phung achim dih hnuah mizeimaw nih an thawh, „Nihin na Phung chim cu aṭha ngaingai,“ an ti. Cu tikah anih nih, Pulpit cungin ka rung ṭum pah lioah khan peimaw Satan nih khan a ka ti diam cang cu,“ [the devil already told me that as I was coming down the pulpit Stepps] tiah a lehhna. Ka piangthar tihna hi mah le mah kan ihnemhnak Bia hoihna asi mensual hnga maw? Kan pianthar tikah hin kan Lungput tah athiang taktak hnga maw?

Cu bantukin Lung a thiangmi lawng nih Pathian kha an hmuh lai, ati. Minung i kan nun ningah hin thil pakhat afiang ngaimi cu kan hmuh khawhmi lawng hi kan hmuh i kan hmuh khawh lomi thil cu kan hmu kho hrihrim lo [we see only what we are able to see]. Tahchunh nakah Van athian zanah khin Arfi khi va zohhna hmanh. Arfi tampi na hmuhhna ko lai, an ceu lulh ko lai, Arfi kong ahngal lomi le acawng lomi na si sicun cu tiang Lawng cu na hmuh khawh lai. Sihmansehlaw Arfi kong a hngalmi le a cawngmi nicun Arfi cu an Min tiangin an hngalh dihhna i an Hawikom zong an Min tein an auh khawhhna bantukin Arfi zong cu an Min tein an auh khawhhna i mahhna zohchih cun a Lawng kha him tein Lawng i Dinhnak kha a phakter. Cu bantukin cun Thiannak zong hi kannih nih kan hngalh ve ahau. Na Ruahnak cu Ruahnak thur le Ruahnak ṭha lo le mirawi Duhnak le nahchuah nakin na khahter zungzal sicun na hmuh khawhmi cu Ṭhatlonak le Sualtuahnak lawng lawngah asi ko lai. A thiangmi tuahlio hmanh ahhin thil ṭha lo tuah ding lawng kha na rak kawl ko lai. Pathian sin Biakinn pekchanh lio hmanh zongah mi report ding lawng na rak ngia ko lai. Cucacun kan hmuh duhtak takmi cu Pathian si loin Ṭhatlonak le Thurnak deuhtu kha arak si. Pathian hmuh naktu nicun kha vialte an Sining taktak ahun langhter i kan sual le ṭhat loning kha ahun kan hngalhter i Mithiang Paul nih arak ti bang, „Mi lungrethei ka va si dah! Thihnak i a ka kal pitu Pum chungin hin mizei dah a ka khamh lai? Kan Bawipa Jesuh Krih thawngin amah Pathian lawng nih a ka khamh lai; Pathian cu lawm ko usih,“ ti loin kan um kho lo [Rom 7:24-25a].