Man Bo le Than Cer

 

Nuva an um i Fanu pakhat an ngei. A Min cu Than Cer asi.

Lo leiah an kal tawn. Lo leiin an hung tlunah a Pa nih Than Cer cu meiluah afial. Than Cer cu an Innpa hmeinu Inn leiah ava kal.

„Ka pi, Mei ka in luak“ tiah ahei ti.

„Na Pa he kan ium lo asicun“ tiah ahun ti.

Than Cer cu a Pa sinah ava tli i »na Pa he kan ium lo sicun ati« tiah a Pa cu achimh.

„Kan ium ko lai ati, tiah vung ti ko“ tiah ati. A va kal ṭhan i »kan ium ko lai ati« tiah ava chimh hnuah Mei cu ahun luahter.

Zanriah ei khawh hnuin Hmeinu le a fanu Man Bo cu an thilri he an hung ipong. Than Cer pa nicun zeiti tuah awk ahngal ve lo i a Nupi dingah a ituah ve ko.

Nikhat cu Than Cer nu le pa cu Tiva leiah an kal. Nga an tlaihmi paoh cu, »Than Cer caah« tiah ati lemang.  A Pasal nih a ing kho cawk ti lo i »Nga tlaih mipaoh Than Cer ca ti lemang« tiah Nam tongin tuk azalh. Cu hnuah cun a Nupi cu Ti chungah lo koin apil i Lim nganah a icang.

Than Cer cu a Nuei nih ahuat tuk i Rian hrang lawngte a ṭuanter hleiah tuksop Cangngal lawngte a eiter. Man Bo tucu adawt tuk i rianṭuan loin Rawlthaw thaw lawngte apek.

Cu tikah cun Than Cer cu a rawlṭam le retheih acelh lo i Tiva leiah akal tawn i »ka nu, ka nu« tiah aṭap tawn. A ṭah Thawng ahun theih cun a Nu cu ahung chuak i Rawlthaw thaw apek tawn. Man Bo nu nicun Than Cer hi khuazei Rawl dah ava ei hnga, hitluk thau liar luarin aum. Na fanu Rawl petu hi na thah lo sicun ka kal lai, tiah a Pasal cu ati.

Nikhat cu Than Cer kalnak cu a Pa nih athli tein azulh. Tiva kamah a Nu nih a pekmi Rawl cu ahmuh. Athai zingah a Pa nih Than Cer cu Tiva leiah a kalpi, »Than Cer, na auh tawn ningin au« tiah ati. »ka Pa, zeiti hmanh zongin ka au bal lo« tiah ahun ti.

„Au ko, na auh lo sicun ka in thah lai“ tiah a Nam tongin avon dir onh. Zeiti awk ahngal lo i »ka nu, ka nu, ka Pa nih« ahun ti tikah, »ṭha tein au, thah maw na duh« tiah a Nam harin tuk ahun timh.

„Ka nu, ka nu rung chuak“ tiah ngaihchia tein a Nu cu ahun auh.

Limpi cu Ti kamah ahung chuah vial khin a Pa nih namin tan thumah achuah.

Inn leiah a Sa cu aphurh dih i Than Cer cu an chumhter.

„Ka nu, na zei hmin cang“ tiah Than Cer nih ahal.

„Ka fa, ka Ke hmin cang“ tiah ahun ti.

„Ka nu, na zei hmin cang“ tiah ahun ti ṭhan.

„Ka fa, ka Paw hmin cang“ tiah a Nu nicun ahun ti.

„Ka nu, na zei hmin cang cang“ tiah ahun ti ṭhan.

„Ka fa, ka Lu hmin cang. Khan, ka Sa maw hun ei laici, ka Ruh vialte hi hun khawm dih law Tiva kamah hun phum te. Ni thumnak Ni tikah Changvut dil sarih he hun veng te“ tiah a chimhtak.

„Sa ahmin cang“ tiah a chimhhna i Rawl cu an ei. Than Cer cu a Ruh lawng ngawtte an phawt. Than Cer nicun a Ruh lak a Tit tlawm tete a ummi cu akhoih i Inn tang awngah athlak dih.

Arkhongpa nih, »tikti didi, Than Cer nih Satit hlumpi a ka thlak i thaw hrim« tiah ati. A pa nih, »Than Cer, zeica dah Satit hlum cu Kawm tangah na thlak« tiah thin kamangin ahun ti.

„Ai, ka thla nemman lo, Arkhong cu alih asi ko cu!“ tiah ahun ti.

Rawl an khim dih cun a Ruh vialte cu a khomh dihhna i Tiva kamah ava phum. Ni thumnak Ni tikah Changvut dil sarih he ava ven tikah Ṭhihlawn, Saka, Ngun Lawngka, Ṭhirual, Ngun Kuthrolh viarah a icang dih.

Than Cer nicun Ṭhihlawn cu a ivenh tawn. Man Bo nih ahlan tikah asianh lo. Man Bo nu nih Than Cer cu, »na Nau hlan ve« tiah akingh avuak.

Cu tikah Man Bo nicun a ihlan ve tawn. Sinain Man Bo i a ivenh sicun Leitlak a icang dih i a idawh lo. Than Cer nih a ivenh tucun a idawh ṭhan dihṭhiam ṭhiam.

An Khua pawng Khua ramukbawi fapa »A Lal« nih Than Cer cu ṭhit dingin ahal. Sinain a Nuei le Pa nih Man Bo cu Than Cert thuamin an thuamh i »A Lal« sinah kalter dingin an timh.

„Kei cu Pasal ka ngei lai, a duh nih Ṭhim kiak Sio kiak hung ka ṭhen u“ tiah a au i Khua lakah Man Bo cu a ichok huar. Than Cer cu Man Bo thlahtu dingah an kalter.

Khua an phak laiah Than Cer nih Man Bo cu, »nangmah maw an ṭhitmi na si« tiah ati i a Ṭhihlawn hlanhmi cu alak dih, akingh avuak i Man Bo cu an Khua leiah aṭah buin akir.

 

 

 

 

 

 

Man Bo nu le pa cu an thinhun ti awk aṭha lo. Than Cer cu kan thah loah maw kan duh hnga, tiah a cerin an icer.

„Than Cer kha e, a Pa athi e, hung tlung sehlaw“ tiah an hlen i Bia an cah. Tisa khap kuain an sat. Than  Cer cu a pa Ruak humh dingah ahung tlung. Kawm tangah a Nuei nih thil char afial. Kawm tang aluh lioah Ti tlokin an toih i athi.

A Hnukum an hleh i Huaka thingkung cungah an thlai.

Man Bo cu Than Cer thuamin an thumh i »A Lal« sinah an kalter.

»A Lal« le a Sa lerual nicun Than Cer asi lo, ti an hngal ko nain zeiti awk hngalh lo tukah an umter ve ko.

A Lal nih »Than Cer, Thiam va tak« tiah ati. Thiam tah cu athiam lo nain a iawh ve i »purh suk purh suk« tiah ati i Thiamtleng cu a heikhawn tlurtler.

Than Cer i Hnukum cu Langakpa nih alak i a Bu leiah a zuanpi. A camh i Than Cer cu anung ṭhan. Langak pa nih a Farual cu a umhter. Langakpa cu Rawl kawl dingah akal tawn. Than Cer cu Langakpa fa a ipuak i nau Hla a awi tawn.

A hlanah cun, a hlanah cun A Lal nupi ka rak si;
Atu ahcun ka pu Langakpa fa ka um lio,

tiah Hla asa tawn.

Nikhat cu »A Lal« salle pawl Ram lak an vah lioah a hlasakmi cu pakhatpa te nih ahun theih.

„Aih! ka duale, ngai tuah hmanh u, cu hlasakmi cu“ tiah a Hawile cu a tihna.

A hlanah cun, a hlanah cun A Lal nupi ka rak si; atu ahcun ka pu Langakpa fa ka um lio;

tiah a hlasak cu an hun theih ṭhan. Rianrangin an Bawipa cu an chimh.

A Salle cu, »Rianrangin vung la u« tiah a tihna i an va kal hnawh. Langakpa umnak Thinking cungah cun an heizoh i »ka pu Langakpa, kan pi kan hung la« tiah an heiti. Langakpa nicun, »Hnapkher. Keuku khat, Meihawl tlangrel khat nan hun put sicun nan lak ko lai« tiah ahun tihna.

A Salle rual cu Inn leiah an kir i khuapi Hnapkher an khoih i Keuku khat le Meihawl tlangrel khat cu an phorh. Langakpa cu an pek i Than Cer cu Inn leiah an tlunpi.

A Lal le a Salle rual nih, »nihin cu Than Cer le Man Bo an itu lai« tiah an ti i Buhthaw thaw le Sathaw thaw an eiter rihhna. Arti an dinhhna. Man Bo cu thil chiahru an hrukter. Thingnam an puter. Than Cer cu thilthuam ṭha ṭhain an thuamh. A chah khawh chungin Puanbu an aih chih. Nam har zirziar an putter.

„Man Bo, »ka tu ka tu, Chawlkung« tiah Than Cer nih ahun ti. Man Bo nicun ahun tuklen nain Thingnam nicun atei naisai lo i a zeite hmanh apoi lo. Than Cer »ka tu, ka tu, Tlamsuai« tiah Man Bo nih ahun ti. Than Cer nicun tlamsuai maiin ahun tuk. Man Bo cu »A Lal«  salle nih a Sa cu an can i Umpu chungah an thutter.

Athut pah dengah khin a Salle nih a Nu le sinah an phorh.

„Man Bo pasal nih Sathu hi a in kuathna“ tiah Inn chungah an ṭhumh i »A Lal« salle cu an Khua leiah an kir ṭhan.

A Lal nih a Inn kainak Hlei pelh dingin atuah i a tangah Uitum ahren.

Man Bo nu le pa cu Umpu kau an ingaih ngang. Man Bo nu nih Umpu cu ahun kau i Sathu cu ahun suah i Rawl he an imeh. Ahun suah ṭhan i Kutdong ahun hmuh.

„Man Bo kutpi ko dah alawh“ tiah a Nu nih ahun ti.

„Ah! ei ko, zei Man Bo kutpi va si hlah“ tiah a Pasal nih Savo tuh pahin ahun ti. Ahun suah ṭhan i a Kedong ahun chuah.

„Man Bo kepi ko dah alawh“ tiah ahun ti ṭhan.

„Ah! hnasen tla loin, hna na chet, ei ko, zei Men Bo kepi dah asi lai“ tiah a Pasal nicun ahun raklen.

Ahnu bikah a Lupi cu ahun chuah i Man Bo lupi cu asi ko.

„Ka fanu Man Bo pei asi ko hi, Man Bo an thah ko hi teh!“ tiah an Thin hunin an ihram sek i an ṭap an ai.

An nuva tein »A Lal« te Khua leiah cun hnawh chih nam chanin an kal.

»A Lal« salle nih Khua pawngin an rak bawhhna i Man Bo pa cu Li le Thal zumin ril ko an kah. Man Bo nu cu »A Lal« Inn leiah atli uahmah i Hlei ahun kai. Hlei nicun a pelhpi i atla.

Cucun Uitum nih arak seh i a itiau seklen. Ruak zong phum loin Hau lengah an hlonh.

Than Cer le a Pasal cu nuam tein an um i Bawite an bawi, Khuang an cawi.