Mang Hau le Dar Cer

Mikei tlangval Mang Hau aum i Lai ngaknu Dar Cer aṭhit.

Kum thum tluk an um hnuah Mang Hau nih mi pakhat a sehmi Ruak cu Inn chung Pindan pakhat chungah achiah. Cu Pindan chungah cun luh lo dingin a Nupi cu a tita i Lo leiah akal.

Ni khat cu a Nupi nicun zei dah sihnga tiah ava zoh.

Miruak ei bangmi cu ahmuh. A ṭih tukah thi dengin, adang dih. Mang Hau hi Keitlau asi atu lawnginavon hngalh.

»Zeitin dah kan Khua leiah ka zam khawh lai«, tiah Khua aruat.

Ni khat cu Mikeirual cu Lamnak an tuah i anmah Mikei phungin aho dah choiper acak deuh, tiah an Mei an izik i an choiper, an zuang dulmal. Mang Hau nu nih Dar Cer cu Lam vazoh usih tiah asawm.

„Ka zoh lai lo, ka Pasal nih rak kan zoh hlah“ tiah a ka thlauh ai, a tina lenin le hran hramin Lam cu a zohpi. Keitlaurual cu aṭih tukhna i rianrangin alawi i azaw colh.

„Zeicaah dah Lam hi na hung kan zoh, na zei dah ati?“ tiah Mang Hau nih ati.

„Keimah duh menin kan rakin zohhna lo. Ka pi nih ka banin a ka hnuh chih caah ka in zohhna ko“ tiah ati.

A Pasal nihcun, »zei Sathin dah ei na duh bik?« tiah ahal.

„Sakhi le Nengpi a Thin ei ka duh bik“ tiah ati.  Sakhi le Nengpi cu ava sehhna i a Thin cu arak phurh.

„Zei Sa dah ei na duh rih?“ tiah ahal ṭhan. »Saram phun tling Thin ei ka duh« tiah ati. Saram cu aseh khawh chungin aseh i a Thin cu aphorh lemang.

Cu hnuah, »zei Sa dah ei na duh rih?« tiah ahal ṭhan.

„Atu cu Saram phun tling Thin ka ei dih cang nain ka dam hlei lo. Rulhreu a Thin belte ei ning law ka dam ko lai“ tiah ati.

Mang Hau cu Rulhreu thah awkah akal.

A Pasal kal cang kacun, »Ka pi, kan Inn thlang Hraliam khi na Hrukpi khan vung co law, ka chumhpiak law ka duh ko hnga« tiah ati.

A fial bantukin a Pi nicun avung cawh i thiang tein aṭawl hnuah achumh.

A hmin tikah, »Ka fa, ahmin cang, tho law na ei lai« tiah a Puan cu ahun kau. Puan tom lawngpi cu asi ko. Ka fapa nih a ka mawhchiat lai hita, tiah thinphan khuaruah chiain aum.  A pi Hraliam cawh karah cun Minung bantukin Puan tom a aihter i Puan akhuh hnuah a Pa le Khua leiah atli diam.

Mang Hau cu nitam nawn arauh hnuah Rulhreu i Thin he ahung tlung.

„Ka nu, Dar Cer teh! khuazeiah dah asi?“ tiah ahal.

„Ka fa, na nupi Dar Cer nih Inn thlangah Hraliam vung co ta, ei ka duh“ tiah a ka fial i ka cawh karah a kalnak ka hngal lo, a Pa le Khua leiah atli korua dah“ tiah achimh.  »Ṭha tein rak hngak ka in ti lo maw?« tiah a Nu cu asik.

Cu tikah Mang Hau nicun keimah Mikei ka si hi ka nupi Dar Cer nih a ka hngalh cang i Mual ka pho ko cang lai hiteh, ka vung seh dihhna lai, tiah a Thin hunin a Mei cu a izit i Dar Cer te Khua leiah achoi thluahmah.

Dar Cer nicun, »ka pa, ka pasal Mang Hau cu Mikei asi caah na sinah ka rung zam, ahun ka dawi ṭheo lai. Keimah seh duh asi lai caah Meithal he ralring tein rak bawh« tiah achimh.

Mang Hau cu Mikei ningin ahung phan i Dar Cer seh dingin an Inn car Ruaphur hramin abawh ko.

Cucun a Pa nih Ruaphur hramah keitlau Mang Hau ahei hmuh.

Hmakhatte bakah ril koin a Pa nih ahei kah.

Mang Hau a Lu cu Inn leng Salu tarnak Vam pangah atar.

Zanṭim hrawngah khin Mang Hau a Lu nih, »Dar Cer aw, ka Lu pangah ka tar hlah, ka Ha fak rumro ai, Bual leiah ka tawnpi law, Cerh chungah ka phum“ tiah ati.

Dar Cer nih, »Ka pa, ngai ve hmanh« tiah ati.  Mang Hau a Lu nicun cuticun ahun ti ṭhan.

A thaizing Khua dei hnuah Sia le Vok cu an thah, Zupu tam ngai an dah, Bual rawnah a Lu fimnak an tuah hnuah a Lu cu Cerhcet lakah an phum.