Maw nufa

Khua pakhat chungah Nungak pahnih cu an iduh dawngai i Lo i an kal zongah hmun khatte khin an kal tawn. Lo tlunzat incun an iau i an tlung ṭi tawn.

Nikhat cu a Mawnu cu Thlam chungah a it i tlolh lakin a ihngilh sual.

Zan leiah a Hawinu nicun, »tlun aza cang« tiah ahun auhlen i athei lo.

A tlung cangrua, tiah aruah i amah lawng tein atlung.

Zan leisang nisen zuarah khin ahun iṭhang i Ni atlak deng cang ṭung, tlun ka tlolh ko lo maw, tiah thin phanin a Mawnu cu rianrangin ahun auh.

A Mawnu »Aw le an“ ruam aleng ti lo.

Sinain Keitlaupa nih ahun viuh.

„Ni atla deng cang, rianrangin hung law kan tlung lai“ tiah a Mawnu cun aruah i ahei ti.

Cucun Keitlau cu ahei hmuh tikah aṭih tuk.

Ka thi cang kone lai hi teh, zeitin dah ka tuah lai tiah Khua aruat.

A Kerek i a ithlaihmi Khiing cu aphoih duak i Maingiang zawnah akhih i Lo taw leiah ahrilh.

Keitlaupa nicun Lo taw leiah atli rua, tiah adawi. Cu karah cun Inn leiah aran nakin le rianrangin atli. Keitlaupa nih Khiing cu ahei dawi i Lo taw aphak tikah Maipum asi kha ahmuh i »kek« cikcekin atengh.

„Laimi rimnam pawh“ ati i ahun dawi.

Khua phak laiah atleih. Nungak cu athi deng, a dang dih viar.

„Ka bawipate, hung ka seh hlah, ka zangfah ko“ tiah ati.  »Sicun na ka chim kun lai maw?« tiah ahal.

„Ka in chimhrim hrim lai lo“ tiah Nungak nih ati. »Na ka chim asi sicun ka in seh ko lai« ati i athlah.

Nungak cu atli i Inn chung Tlangval aṭhu tungmi lakah avung ihlonh.

Zan tlainawn asi cang.

Tlangval pawl cu Nungak lenah an rak chuak cang i khuaruahhar ngaiin an von um liote asi.

„Zei dah cuticun“ tiah Tlangval rual le a Nu le Pa nih an hun zuan hnawh.

A chim kho lo.

Mangchan hnu ceoah, »ka chim lai lo« tiah thei ual, thei ual loin ahun ti.

A hun ihrim.

Tlangval pawl nicun, »kanmah kan um ko, ṭih hlah, zei dah asi chim ko« tiah an ti lemang. Tlangval pawl cu thih ngamh bakin an ikam.

„Asi sicun Inn awng vialte an phih dih.

Keitlaupa i a tlaihnak kong achim. Cu lioah cun Keitlaupa nih chiarchak leiin arak ngaih ko.

Tlangval pawl nicun Inn awng cu an phih dih nain Tappi awng phih an philh. Zanṭim hrawngah khin Keitlaupa nih mitkuh Si ahun vorh hnawhhna. Tlangval vialte cu an Mitkuh an celh lo. Lu taw hngal loin an ril dih.

Keitlaupa cu athawh, Ngaknu nicun aṭih tuk nain chim awk ahngal lo.

„Tho, kan kal lai, tiah Keitlaupa nicun ati“ tiah ahlen.

La cu akher.

Keitlaupa nih acamh i »luklak loah akher dih. La na kher dih cang, kan kal lai« ati.

„Ka nu le ka pa nih Lungtat hi hun cuar ulaw a hminin kalte u, an ti“ tiah ati ṭhan.

Lungtat cu acuar.

Cu chung vialte acun Tlangval rual cu a isih sekhna i zeihmanh an thei lo. Thir fahul linin a duahhna zongah zeihmanh an thei lo.

Zeiti tuah awk ahngal ti lo.

Lungtat cu ahmin kho lai lo i Khua nih a kan deiphuat lai tiah a Ruahnak aṭhanh deuh.

Sinain, Keitlaupa nih acamh ṭhan hoi i luklaklo ah Lungtat cu a hminter. Hrukpi hmurin Lungtat cu asawh, »ahmin cang, kal cang usih« tiah ati ṭhan.

„Ka nu le ka pa nih Lahmum hi hun peh law adih tikin kalte u, an ti“ tiah ati ṭhan.

A camh hoi i Lahmum cu luklak loah an peh dih hoi.

Keitlaupa nicun, »Lahmum na peh dih cang, kan kal cang lai« tiah ati.

Zeiti tuah awk ahngal lo i Tungsut cungah La aṭem.

Keitlaupa nicun a kalpi i a Lu thluakin adawp i a Thla hawm cu a Thuam ningin a dirter.

Khua deiah Tlangval pawl cu an hun iṭang.

Nungak cu aum ti lo.

Inn lengah an chuak i Tungsut i a La khihmi cu an hmuh.

Tlangval dih lakin Lahri cu an zulh i Thingkung nganpi an phan. Thingkung cungah cun Nungak adir ko cu an heihmuh.

„Mahka khan aho nih dah an in kaipi, hung ṭum, kan tlung lai“ tiah an auh.

Zei Bia leh hmanh aum ti lo.

Tlangval pakhat cu avung kai i a Kut zawnin ahun tlaih khin a Thla hawm cu atla dih.

Hi Thingkua chungah hin Keitlaupa aum ko lai, tiah an ti i an dum.

„Thingkung hau nakah tiin Inn leiah hreitlung va la“ tiah Zak Sung an fial.

Zak Sung nicun, »pakhat he locun« ati.

„Pakhat hecun vung kal ne u“ an ti.

„Pahnih he locun“ ati.

„Pahnih hecun vung kal ne u“ an ti. »Pathum he locun« ati.

Cuticun ati lemang i a hnuah cun an zapi tein an kal.

Uite an hngahter.

Keitlaupa cu ahung ṭum rutmat.

Uite ahun hmuh i, »Uite, Saruh bote in thlakning law ṭumning« ahun ti.

Uite nicun, »hung ṭum, hung ṭum, na Zang ngalte pet ro« ahei ti.

Maw ka ṭih aw ati i Thingkua chungah lo ko apil.

Cuticun ati lemang lioah Tlangval pawl cu an hung phan.

Thingkua chungah cun Makthak le Cumṭing an khangh i an khut hnawh. Keitlaupa cu a khuh he a khak, a Mitthli le a Hnapduk he a iciah i a turin atur.

Ngaidi pua le Thinghnah an hun khangh chih i a Ha zong puak viarin akang.