NGATAINU

                 
Hlan lioah Khua pakhat chungah Nufa an rak um. A Fanu cu a minah Ngatai tiah an auh. Nga Tai cu a idawh tukah hin a hmumi paoh nih aduh lomi an um lo, zoh cim arak sihrim hrim lo. Mikip nih an dawt, a Pumrua ṭhat le a Tungtai rem lengah a Hmaithlak hrim hi arak mak tuk ti asi. A Mitmu hrihrim hi Ṭhipum fang dawh bangin a idawh  a Mit au nih zing Niceu bang arak idawh ti asi. A Sam thlai nih le a irem i a Ziaza le ṭha kaw, Nu sinak atlinh lengah a Aw anem i a Pawngkam ummi paoh nih an lomh dih tawn.

Kum khat cu Ruahpi asur ciammam i ahan kho ti lo. Atuk chin lemang i Ti nih alian thluahmah. Cu tikah an Inn le Lo vialte zongin aphum thluahmah. Mi vialte cu an Inn le Lo chuah takin Ti nih aphak rih lonak Tlang cungah an kai dih. A kai kho lomi cu Ti nih aphum dihhna i an thilen cang. Ti cu aṭhang chin lemang i Tlang vialte zong phum dih atimh cang. Saram pawl zong Tlang sannak leicu an panh cio. Minung le Saṭil pawlhna cu Tlang sannak bikah cun an isuallen lulhhna.

„Zei dah acang hgna?“ tiin zapi cu Khuaci muiin an ṭap, an ai, an ihram seklen.

Ti cu aṭhang chin lemang i „tai, tai, tai“ tiah Ngatai numin chim pah buin Tlangpar cu ahun naih chin lemang.  Tithawng cu an theih tikah „Ti nihin Ngatai hi arak duh caah asi ko“ tiah an ruah.

A Sam fang pakhat an phawi i Ti lakah an thlak. „Tai“ ati i Ti cu tlawmpal avung zor. Sinain arauh hlanah ahung ṭhang ṭhan.

A Angki an thlak ṭhan.

„Tai“ ati i Ti cu avung zor deuh nain „tai, tai“ ati i ahung ṭhang ṭhan lemang. Cuticun Ngatai i Sam le thilri le a Hnipuan cu an thlak dih cang.

Ti cu „tai, tai“ ati i Tlang leiah ahung kai chin lemang. Khua khan awk an hngal ti lo i a Donghnak cun mi vialte thihnak chacun Minung pakhat thih aṭha deuh lai, an ti i Ngatai cu thlak an timh.

Sinain a Nu nih, „Kanmah sual ruangah kan tonmi asi ṭung lo, zeiruangah dah ka Fanu theng cu kan thlakin kan thither lai“ ati i asiang lo.

 

 

 

 

 

Cu tikah a Fanu cu fek tein a itlaih i zapi he an ichutlen, dongh nakah an chuh khawh i Ngatai  cu aṭah aituk buin Tilian chungah cun an vun paih. Tilian chungah cun Ngatai cu avung pil zuahmah.

Cucun a Nu nih ṭahhram buin, „Ka fa dawt sian lo, Ngatai aw… nang »Ngami« tuin vung icang law“ tiah a cahta, ti asi.

Ngatai cu a nu Bia bang »Ngami« cun a icang taktak. Cucaah »Ngami« cu Minung bantukin Hnuk angei i Taw zong a ingeih venak asi, an ti.

Ngatai nu cu a Lung aleng tuk.

A Fanu zunin azaw zungzal, ti asi.  A fanu Zun cu atuar i ei le din zong zuam lo le Ṭuanzaang tlung loin aum. Mitthi he Fing le Tlang kip acul tawn. Cuticun a ichokvak lemang i Tlangsang kipah hin Khuaza acuan tawn.

Voikhat cu a umhar le lilen celh lo tukah Thiam tal ka bang lai ati i Thiam ṭial bannak dingah Tlang sang le dawh akawl i adongh nakah Tlang dawh ngaimi pakhat cu ahmuh i cukacun Thiam tah cu a ithawk.

Thantlang peng Khualhring tlang chungah Tlang sang ngaimi pakhat aum i cu Tlang cu „Ngatai nu Tlang“ tiah atu tiangin auh asi. Pupa chanah cun Ngatai nu Thiamruak zong arak um, an ti. Ngatainu nih Tlang cungah Thiam arak tak i atu Falam peng Ramthlo Khua luzawn Zinghmuh tlangah khin a Thiam tlang arak sih.

Ngatai nih a Nu i Thiam tah le lilen kha atheih tikah Minung hringin ahun ilangh i a Nu cu ahung veh tawn, ti asi.

Cu tikah le a Nu sin aphanh tikah a Tai tang cu Nga asi i a Tai cung cu Minung asi. Minung bantukin Minung sinah um awk aṭhat lo caah Caan sau um loin Ti chungah akir ṭhan tawn.

Cuticun a Nu thih hnu zongah Ngatai cu Tlang cungah akai tawn i a Nu um tawnnak kha Lung leng le Ngaih chiain arak cul tawn. Kha ti Tlang cung i akai kha Minung nih an hmuh tawn tikah Ngaknu dawh tuk asi fawn, a Tai tang Nga le asi fawn tikah a Hmumi kip nih an Khuaruah arak har i a Min cun »Ngatainu« tiin an auh colhthai ti asi.