Ngunnu le a Nau            
 

Hlan lioah Ngunnu le a Nau an rak um.

Voikhat cu Ngunnu nih, „Ka nau, Lo leiah kan kal lai“ ati i a Nau tecun Lo cun an kal. Chun nilinh lingpi khin, „Ka nau alin tuk, Zil kan kawl lai“ ati i Zil cu an kawl. A Naunu nicun Zil sairang ahmuh i a Utu nicun Zil kermi te lawng ahmuh. A Unu nih a Zil cu aei i adih colh.

A Naunu i Zil sairaangte cu azoh i a Mit athi tuk, „Ka nau, na Zil kha ka cheu ve“ tiah ahal. Sinain a Nau nicun asiang lo. „Ka nau, na Zil kha na ka cheuh lo sicun Chuntlung hlum ka isenghter lai“ ati.

A Naunu nicun, „Na duh le isenghter ko“ ati.

A Unu nicun, „Chuntlung aw, ka seng, ka seng, ka Naunu nih Zil a ka cheu duh lo e, ka seng, ka seng, ati i a Kerek tiang asengh“ tiah a Naunu cu ati.

A Nau nicun asiang hlei lo.

A Unu nicun, „Chuntlung aw, ka seng, ka seng, ka Naunu nih Zil sairang a ka cheu duh lo e, ka seng, ka seng“ ati ṭhan. Chuntlung nicun a Khuk tiang ahun sengh.

„Ka nau, rak ka cheu ve ko, ka Khuk tiang apil cang hih“ ati ṭhan.

Sinain a Naunu nicun acheu siang hlei lo.

„Chuntlung aw, ka seng, ka seng, ka Naunu nih Zil sairaang a ka cheu duh lo e, ka seng, ka seng“ ati ṭhan. Chuntlung nicun a Tai tiang aphum cang. „Ka nau, rak ka cheu cang“ ati i tlawmpalte khi a heicheuh.

„Ka nau, rak ka cheu rih“ ati ṭhan.

A nau nicun acheu siang ti lo.

A Unu nicun, „Chuntlung aw, ka seng, ka seng, ka Naunu nih Zil sairang a ka cheu duh lo e, ka seng, ka seng“ ati ṭhan. Chuntlung nicun a Thin tiang asengh cang. „Ka nau, na Zilte cu ka cheu rih ko mu“ ati.

A Nau nicun acheu siang hlei lo.

A Unu nicun, „Chuntlung aw, ka seng, ka seng“ ati ṭhan i a Hngawng tiang adolh cang.

„Ka nau, ka cheu ko cang“ ati nain asiang hlei lo. Chuntlung cu a auh ṭhan i a Khabe tiang adolh.

„Ka nau, rak ka cheu cang“ ati. A nau nicun a pelte a heicheuh ṭhan. A Unu cu a iza hlei lo, avun hal ṭhan. A Naunu nicun asiang ti lo.

„Chuntlung aw, ka seng, ka seng, ka Nau nih Zil sairang a ka cheu duh ti lo e, ka seng, ka seng“ ati i a Pumpu lukin Chuntlung nih asengh dih i Vawlei chungah apil.

A Naunu cu a ingaichih tukah a Lung lenin aṭap zungzal.

Voikhat cu aṭah lioah a cungin Vacarun an rak zuang. A Naunu te nicun,
„Ka cung i Vaca zuang… ka u Ngunnu nan hmu lo maw?“ ahei tihna.

Vacarun nicun;

„A hmuh cu kan hmuh ko nain thlangah Cawek, Naek athai lio ee“ an ti. Run dang an ra ṭhan,

„Ka cung i Vaca zuang, ka u Ngunnu nan hmu lo maw?“ ahun ti ṭhan rihhna.

„A hmuh cu kan hmuh ko, thlangah, thlangah Cawek, Naek athai lio“ an run ti.  

Tlawmpal hnuah Vacarun dang an ra ṭhan.

„Ka cung i, ka cung i Vaca zuang, ka u Ngunnu nan hmu lo maw?“ tiah a auh ṭhan rihhna.

Cu vial cun, „Ei! ka Nau awte alo ko e“ ati i tangah an run ningin an ṭum. Ngunnu nicun a Hawile pawl kha, „Nan Thla iphawi cio ulaw ka Nau hi Thla kan bunh lai“ a tihna.

An Thla cu an phawi cio i Ngunnu anau cu an bunhter i an zuan pi.

A Unu nicun,

„Khah! ka nau, kan Thla hi kan pharh lai i kan Umnak leiah kan zuang lai, kan zuan pah i Tivapi na hmuh sicun, cu Tiva te cu na ti lai. Tivate na hmuh sicun, cu Tivapi cu na ti lai“ tiah Bia achimh.

A u chimning tein Tivapi ahmuh tikah a Thin aphang, „Ei! acu Tivate cu“ avun ti. Tivate ahmuh tikah, „Ei! acu Tivapi cu“ ati.

Sau nawn an zuanah khin a U chimmi kha aphilh i Tivapi cung i an zuan lioah a Thin aphang tuk i, „Ei! acu Tivapi cu…" a tisual i Tiva chungah cun atla i Ngapi nih arak dolh.