NUN A NEMMI

 „Nun a Nemmi cu Lung lawmmi nan va sihna dah!

Pathian nih a in kamh mihna kha nan co lai.“ [Mat. 5:5]

Nunnem tihi „Mi toiah a idormi“ ti zongah Sullam a ikhatmi an si ko. Nunnem ti tikah nem hninghniang, zeihmanh tuah ngamh lomi, mah ca zongah dir ngam lomi, mi ca zongah dir ngam lomi ti duhnak asi lo. Thin hun lo ti zong hi nunnem asi lo. Thin hun hmanh ahngal lo mihna cu nunnem ti awk tlak an si lo.

Pathian leikapin kan zoh tikah nunnem cu Pathian ibochan i zeipaoh i Pathian a Nawl siko seh ti Lungput ngeih ngam kha asi. Job nih; „BAWIPA nih a ka pek i BAWIPA nih alak ṭhan; BAWIPA a Min cu thangṭhat siko seh,“ arak ti [Job 1:21]. Bawipa Jesuh nih Ngakchia bantukin bochannak Lungput kha nan ngeih lo sicun Van cung Pennak chungah nan lut kho lai lo, ati. Ngakchia bantukin Pathian ibochannak Lungput ngeih hi nunnem timi cu asi.

Voikhat lio Zalam tlangah Ngakchia pakhat a ichawk i cucun Rang tumpi pakhat arung le ciammam i Ngakchiapa nih aṭih tukhring hran i hehlemaw tiah azam. Inn leng cungin a ṭhumi apa Phei cungah cun ava hlonh i a Pa sin aphak cang kain cun Hmunphiah kha a ilak i Rang tumpi cu tuk azalh an ti; Ngakchiapa nih a Pa ava ibochan khawh ning cu! Cu bantuk cu Nunnemmi cu an si. Pathian an Pa, an va ibochan khawh ning cu! Bochan ti tikah bochanmi Nawl zulh tinak asi. Kan ibochan mihna i an Nawl kha kan zulhhna lo sicun kan ibochan rihhna lo asi. Kanmah Nawl i kan um sicun kanmah le kanmah kha kan ibochan asi. Cucaah bochan hi nunnem lawng lawngah aum khomi asi.

Cun nunnem cu Minung leikapin kan zoh sicun a hmanmi Caan i thinhun asi kan ti lai. Paul nih Efesa khuami Krifa mihna sinah Ca akuat tikah; „nan Thin cu hung u, sihmansehlaw sual hlah u,“ ati [Efe. 4:26]. Thin hun ṭungin sual ṭung lo cu nunnem le mitoidor timi cu asi. Bia hi Minung i acan tikah Sullam hngalh afawi deuh caah nunnem mihna kong tlawmpal tein kan chim hmanh lai. Biakam hlun chung Nambar Cauk chungah; „Moses cu Vawlei cungmi vialte lakah mi lungnem bik asi,“ ti aum [Nam. 12:3]. Moses cu a Thin ahung kho lomi asi maw? A Miphun hawi Israel mihna a hremtu Izipt mipa a Thattu kha mizei dah asi? Kha a Thinhunnak kha amah caah asi maw? Biakam thar chungah, Biakinn chungah Tangka thlengtu, Caw le Tu le Ṭhuro [Laileng] Zuarmi, Miak akawl i sifak retheihna le zei hngal lo mihna sinin Chawva hmuhnak le Miaknak lawng akawl i cu miaknak Phung le Lam tampi aser mihna, zaangfahnak Lungput hmanh angei lomi Farasi mihna le Cazi pawlhna le Tlangbawi rualhna kha a hmuhhna tikah Jesuh nih Hri kha a ihrual riangmang i adawi dihhna i an Cabuai vialte kha aleh dihhna [Joh. 2:14-15]. Kha Nazareth khuami Jesuh kha miralchia asi na ti khawh lai maw? Kha Nazareth khuami Jesuh kha amah caah maw a Thin ahun i midang caah dah a Thin hi ahun? Cun kanmah ahun kan naih deuh mipa kong hun chim rih usilaw; Americaram i Negromi minak pawlhna cu Sal i an zuathna lioah, Americaram nih ka Fapa ti awkah a izahpi lo bikmi Pa pakhat nih; Hi thil ṭha lomi hi dennak Caan ka ngeih sicun fakngai ngaiin ka den lai,“ ati i aden taktak i a Donghnak cun amah Lu zong ahloh phah. Abraham Lincoln cu miralchia na ti khawh lai maw? Abraham Lincoln cu mah zawnruah ruangah Salluatnak atuah na ti khawh lai maw? Abraham Lincoln cu mi nun nemngai ngaimi asi. Cucacun Bawi Jesuh nih nunnem arak ti tikah mah caah siloin midang caah fak piin a Thin ahung khomi ati duhnak asi.

Hi thil pahnih kan fonhhna tikah nunnem timi cu Pathian ukmi le mah zawnruat loin mizawnruat tuin a nungmi ti duhnak asi. Bawi Jesuh nih a Zultu pawlhna cu khuazei Miphun an si zongah zeitik Caanmi an si zongah hi bantukin nun ding cu a kan duhmi asi. Kan Lairam hmete le Minung tlawmte hi zohhmanh u! Zeicah dah Krifa hmasa le Hruaitu pawlhna nih Sal bangin a kan hrengtu Man te pawlhna hi an rak doh. Anmah ca an iruah caah asi lo, Laimi luatter an rak duh caah asi. Zeicah dah ṭih le hruh nakah Thong i a kan thlatu Zumhnak hruthna hi fak piin tei an rak izuam. Hi Thong thlaknak chungin luat i Ceunak bantuk a simi Fimnak chungah um ve kha an kan duh caah asi.

Hi bantuk mihna nih zei dah an co? Pathian kamh mihna cu an co. Pathian kamh mihna cu zei dah asi? Hi Bia fianh nakah Israel mihna kong tlawm tein kan von chim tak rih lai. Salm 37 chungah hi tihin aum;

„Miṭha lo mihna ruangah

Awlok chongin um hlah,

Ṭhatlonak tuahmi kha

hngar pekhna hlah;

a romi Ramkung bangin an lo lai i

Belhhring bangin an uai lai.

Sihmansehlaw mi toiah a idormi cu

Ram chungah himin

an um lai i

Daihnak kha Tlam tlingin

an hmuh lai.“ [Salm 37:1,2,11].

Mi toiah a idor i nun a Nemmi cu Ram co ding kha Pathian nih Bia kha a kamhhna i an co taktak. Lung nemin Pathian i Nawl siko seh ati mipaoh nih mah Pum iuk khawhnak kha an co i mah Pum iuk khawh cu Phung thluk Bia nih;

„Thin hun leiah a Khul nuarmi [Thin fualmi] cu

Thazaang ṭhawngmi nakin

aṭha deuh.

a Lungput a iuk khomi Khuapi

a Latu nakin aṭha deuh,“ a timi kha asi.

Cucaah nunnem cu Chiandeih Thazaang ngeih asi nain Thazaang cu Chiandeih bantukin hman lo kha asi. Thazaang le Nemnak hi komh khawh an si i cucu Thazaang ṭhawng bikmi, Ti bantukin anem i Ti bantukin aṭhawng ṭungmi cu asi. Cucu kan Bawipa Jesuh si u! ti a kan duhmi cu asi.