A

A bia mai hang bang  

A biachim a koktlong tuk, a bocal tuk, a bultan tuk fawn, a hnunhnang lo tuk.

A bingtalet cangal thlor  

A ningcang lo tukin thil tuah.

A cawi bal lo khuangcawi in 

Midang tuah khawh lomi ka tuah khawh ti bang iporhlawt, chimpi le chimte dirh.

A cep na sol lai 

Ruat cungcang loin biachim hman cu i chuasualnak asi. Fiangte na theihmi kha chim tawn.

A ceih nih a ei tluk

Va tuah taktak lo ding le heico khawh lo ding si ko zong ah chim le ceih hmanh anuam tuk.

A dil na, a sat na

A iphehmi um, arak phuangtu zong rak um. Mah carei cioin rak chimrel cio. Mibu rianṭuan nakah Lung irual lo.

A ruh tum hlah, a haang na hap lai

Hakkauh tuk cu sungh dihnak, tlawmte lawng tinconak asi. Na co tawk ihngal ikpak tuah.

A thla kung in a kan huh 

Amah thawngin mi nih an kan hramh, an kan dawt. Mi nihsawh le thlanglamh kan tong lo.

A ram tuk sa phaw hlah 

A duh tuk lawmmammi, a awr tuk mi cu pe hlah uh.

A hngal nih sa ei

A thei le hngal nih thil ṭha an co deuh; cun ningzah pantuk cu tinco lonak asi.

A hrut nih a fim chim

Mah nak fim deuh le thil thei deuhmi ruahnak va cheuh.

A mui in zoh hlah, a aan in ngai 

Muisam pumruain zoh hlah, Lungput le Ziaza a biapi.

A sa lo chem hlah

Duh tuk ko nain duh lo bantukin i um ter hlah, na cei lak lai.

A firtu ningzak hlah, a hmutu ningzak

Thil sual a Tuahtu cu an zei apoi lo nain a Hmutu cu an ning azak.

A thi hmasa puan zual tong 

Mi hmaisa nih thil ṭha an tinco deuh.

A tappi le a lungthu si  

A khuasaknak, a umnak Khua le Ram, Hmun le Hma, le Inn le Lo asi.

A thi hmasa thlan ṭha hlawh  

A thi hmasa cu thlanhmun ṭha ah vui an si. A hmasa paoh nih an duhnak hmun an ithim tawn.

A lut lei vaipuan in pua, a chuaklei mautlor in tu

     Mipem sathlai cu lawm tein dong hna.

A do hmasa rian lim 

Rianṭuan athawk hmasami nicun Hawi hlanah a dih.

A paam nihlawh ting lo

Mi sifak caah manh le dinh Ni aum kho lo. Kan pum hmanh cheu kan duh.

Aa zum lo nih ṭum lai or hlah 

Ngamh setsai lomi Rian iot hlah, na mual apho lak lai.

A ṭial le a ngaan lawng ti hlah 

Hni le Puan lawng ruat hlah. Thil duh rap tuk hlah.

A bonbok le a mantaat 

Zeihmanh idannak aum lo. A ikhat bak ko.

A si hmun si, a saar hmun saar 

A ding le ei kel nih eidin, a ṭuanmi le rethei vial nih ei lo, tinco lo.

A rang va duh, a chum va tla

Rianrang tuk le hnawhnam tukin thil tuah le biachim cu palhnak aum duh. 

An chim Hranhring, an tlawn Tiphul

Mi hlen a hmangmi. Chimmi le tuahmi aa dang tuk.

Arpi dakmak sahngar tei lai bang

Tuah khawh ṭung hnga lo dingmi a tuah kho pi lai bang chim.

Ar bia duh in 

Mi bia an iruah lioah rak ithlak lengmang khi.

Ar cawngthai in

Kutṭial achia tuk tinak. Zawndam le daithlag ngaiin heituah fukfak.

Arpi ṭapna, sahngar hnina

Mi nih Harnak, Ningzahnak, Ngaihchiatnak an ton lioah rak inuamh ziar khi.

Ar hma cuk in 

A dai cangmi biaṭhing na phorh

Ar hla fungkhat theih in

Theihmi dang ngeih ve lo, chim cia le chim cia lawng nolh zungzal.

Ar le sanawng bang in 

Rian pakhat dih khawh ti lo. Tuaitam peng khi.

Arla ti tit in

Thil ṭha voikhat te tuah khawhmi i hngalsak tuk, an ka theisual lai lo ti phan.

Ar fa ro cuh in 

U le nau nih Ro an icuh i Taza tiang an icuai khi.

Ar ngor  bang in 

Na Mithmai apanh lo. Na dam pah rua lo.Tla fiam fuamin na um.

Arfi thlapa nih zua hna seh  

Karhso hna seh, dam tein um hna seh. Himbawm hram hna seh.

Ar le thlaiberh kawi tlaih in

A iphilh kho lomi Hawikom ṭha. Harnak a itheihpi pengmi.

Awr zungkhat vang ah

Awr isum lo tuk ruangah Thangchiat huah, Harnak ton.

B

Ba khaih in khaih  

Atu le atu chimh lengmang, nolh chih peng.

Ba laak in laak      

Bia lutaw tuak hmasa loin mi va hro, sual va phawt.

Ba hnah cung ti thlet bang

Mi bia lung chungah pil bak lo, chimh le cawnpiak zong nih hlanh lo.

Banhla bia duh, ar bia duh

Bia duhmi Minung. Hngalh ṭung loin a ithlak tukmi Minung.

Banhla fahrin in

Fa khat ngeihin thih ngual.

Banhla kung khuaiseeng benh bang

A zeiti leihmanh Hmun khat um kho lomi, kawp awk aṭha bak lomi.

Bantlang hmanh nih mi fimtawl

Thil tenau (santlai loah ruahmi) hmanh hi san an rak tlai ko.

Bapi nih thak kaw bate tiang

Bawi nih tihna tiah michia zong nih mi va tilen ve.

Bawi bia al nganh, vui lu cuar nganh

Bawi chmmi Bia cu al khawh asi lo, aṭha lo.

Bawi nu hrulh le fang zu hrulh

Bawi le Milian fanu hrulh laklawh mi cu ahlawm awk an tlak ti lo. An lo ko.

Bawi nu le phaiphur, chia nu le uipok

Bawi cu an Man le Cingcuai atam caah ṭhit ahar. Michia fanu cu ṭhit an fawi.

Bawi taw le fang zu

Bawi fanu cu mihnabei asei khun. Mit an thi khun.

Bawi vel le khua vel

Khuazing le Bawi cu mizawn an ruat cingcing, Vel an ngei cingcing.

Bawi pawng ṭhut le cerh kam thlawh

Bawi pawng kan um sicun an Ciangzar kan tem, kan Orti anim.

Bawipi lung le thingpi hram

Bawi lungthin cu aṭhawng i afek. Lung an ṭhial lo.

Bawipi van le keipi van

Bawi cu midang nakin Lung duh an tlinh khawh deuh.

Bawi zahlo le chia zahlo 

A chia tuk asi lo, khuazei paoh hman tlakmi asi ko.

Behrum ci tuh hnu hlah, nupi cia auh hnu hlah

Nupi khua tlitham cu duh tik paoh auh khawh an si ko, ahnu ti um lo.

Behrum puar le michia puar

Michia cu an ṭhancho tikah an iporhlaw i an Ruam akai.

Belchin khar lo

An cetco lio te asi. An fale an tarual ngai.

Belte keem pam nak, lote keem ṭhahnem

Rawl hlei chuan cu Pamnak, Rian hlei ṭuan cu a ṭhathnem tuk fawn.

Bia hri vel le zun hri hnok

Tawifiang tein chim ko dingmi tam tuk chim cu aṭha lo. A buaithlak meimei.

Bia kaa khat nih bia za phan

Bia ka khat hi a biapi tuk. Biaza ahrin khawh. Biachim iralrin ding asi.

Bia ṭha kaa khat nih vanni kuai

Bia ṭha bia thlum-al kaa khat nih thluachuah vanni tampi a tlunter

Bia le lam phan

Bia kan iruah tikah Bia dang, Bia dang kan va chim chin vima khi.

Bia le thli

Bia cu thli nih aphuan, theih lo ti aum lo.

Bia chia tluninn tong lo mah sin kir

Bia chia, Holh chia kan chimmi khi kanmah lila cungah atlung tawn.

Bia thlum-al hna ah lut

Bia ṭha, bia dawh cu ngaih a nuam i lungthin ah a caam khun.

Biachim thiam lo mah cung tlung, sur vorh thiam lo mah lu khuh

Bia chim kan thiam lo tikah kan rak chimmi bia lila nih harnak a kan pek tawn.

Bia duh hmur ah bia tang hlah

Bia duh le hmursau nih cun biathli kha dep dep dep tiah mi dang an chimh colh hna.

Bianem chim le lamphei kal

Bianem chim cu a ngaih a nuam i mi lung a dai.

Biathli thingpar in au

Biathli cu thuh khawh asi lo. Thli tein tuahmi zong an puang ṭhan ko.

Bia ṭhing phawrh le hma ṭhing khawn

Bia adai ko cangmi le philh ko cangmi an vun chuah ṭhan cu afak tukin theih asi.

Bungtuah holh le lentecelhnak

Bungtuah cu an holh a nem, a tluangtlam.

C

Ca le cafung, sobul le cengceh

Pakhat lawng in tuah khawh lo dingmi, hawi bawmtu locun a si kho bak lo mi.

Cakei hmanh nih ka seh rua, seh rua lo a ti

Zeipaoh hi mah le tawkzawn, le a ruaram aum ko, cucu i theih a herh.

Cakei kaa pur lai bang

A ṭhawng ṭung lomi nih an i hrocer, an i tengvo len ve khi.

Cakei mei tlaih in

Rian i ot zing ṭung i tuah khawh ti i lo, ngol le duh fawn lo.

Cakei sul hnu uico bo

Ṭihmi um lio ah daidep um ṭung i a kal hnu tu ah hei i hrocer len.

Cakeipi haa fah bang

A fah celh lo tuk ah heh tiah i lawngh chih.

Cal saruh chonh in

Ngamh lo bu tein a herh caah ralṭha ngai bantuk in i umter i va tuah.

Cangai hawi bia zawng lo sir kal

Hawi he lung aa rual lomi. Hawi nih cho an ti ah thlang a rak timi minung.

Cangai khor chung hrang in

Mah umnak vial i ngamhsaan ngai ṭung i hmundang ah ralchiat ngai.

Cangai lam kal in

Khikhi an zia te a si, an nu le an pa zia hlikhlek te an keng ko.

Cang-ai sa zong sa

Sa dang umlo vansan le fimhawt tuk ahcun cangai sa zong sa ciote a si ve ko.

Cangcel le khaubok bang in

Voikhat i hmuhnak bak in I uar i par i ṭawh colh.

Caangpa hmanh nih bel kil

Mizei te hmanh hi ṭhathnemnak le santlaihnak kan ngei dih cio.

Cangpin a kong in, saphai a lam in

Minung kan si tikah kanmah le zulh phung ningin nun ding asi ko.

Cangpin pahra cangon pakhat tluk lo

Mi derthawm 10 nak in miṭhawng pakhat a ṭhahnem deuh.

Cangvat tikut toih bang

Mi va ti len lio i vun hro tik ah a condup colhmi, mi ralchia.

Capo biatak ah tla

Capo hi nihchuak bia asi ko nain a caan cun biatak ah atla ṭheo tawn.

Caw khat ruang ah caw za ba

Mi pakhat nih palhnak a tuah sualmi ruang ah mi vialte harnak ton.

Caw run naa pang

Lam kal tikah khua zong zoh loin mi kar lakah itenh. Mi pah dih timh.

Cawtar ramno duh

Tar hnu le upat hnu ah mino tete lawng va duh, va uar khi.

Cengkol pawpi tei in

Neek tukmi, lamhchihmi nih a phu aa hlam khawh.

Cepa tluangkhawn in

Zei si hleng ṭung lo na in vaa hro cer len ve.

Cepa na duh ah cepa, varit na duh le cepa

Mah ṭaangka huih in um. Mah nih a ṭha deuhmi co zungzal duh.

Cepa nih a der tuk ah a ek aa ceh

Derthawm tuk le santlaihlo tuk ruang i mualpho khi.

Chan chankhat ah pei le zaa bang kan i let

Chan khat chung ah rum khawh, sifah khawh a si. Kan i letthal kho.

Chemphut chung uimei hrolh bang

Camping crusade dihka lawng zia ṭhinh, a rauh deuh cun mah keel le bon.

Chiachin na hawi soi hlah

Mah chiatnak i hmu lo in mi dang va sawi len khi

Chiar dot le hmai chuum

Aa naih tukmi inn le pa kan si.

Chi le khuai bang in

Aa kom tukmi, aan aa tlak tukmi, ṭhen awk a ṭha lomi, aa lo tukmi

Chim ka um ah chim nun ka cawng, zo ka  um ah zo nun ka cawng

Kan umnak nunphung le sining cawn le theih a herh vet awn.

Chingchih e beengbeh e tiah

A chapchap lo ah amah tu nih a ka nolh, a ka ti ṭhan. Keimah hmanh nih zei ka ti lo.

Chizawh ngasa duh in

Duh tuk lawmmam I kaltak zong sian lo, hngah peng.

Chizawh kawrong oih timh in

A chim le a ceih vial tlo ngai i tuah taktak ngam lo.

Cho ṭia lo nih tha ka la, ka co lo nih zaang ka zuun

Kan duhmi kan co lo tik ah kan tha a chia i zaanguai ngai in kan um tawn.

Chuncaw heu le cangpal cim

Zeihmanh tuahmi um lo hlei ah a hrawktu le a heu tu rak si.

Chungkhar thurual rem lo paamnak, khuakhat thurual tlu lo ṭionak

Chungkhar lung rual lo cu paamnak asi. Khuakhat irem cu ṭionak asi.

Chungthu lengnal

Zohnak ah ṭhat dawh ngai si ko ṭung i lungthin put chiat ngai, zir ngai khi.

Circik tlawh thawh duh lo bang 

Rianṭuan aa ziaphelmi cu an lam a tluanglo, harnak an tong.

Cirhdawt vate bang

Zawndamh rumro in thil kawl a hmang mi.

Cik le ngerh kan si

Vun i zawt ahcun mi le mi kan si lo. Cingla rualchan pei kan si cu.

Conghrang lusuk bang

A zei an chim paoh ah um..ee..um ee ti peng. Pekmi paoh i laak.

Cupi khate va ti hlah

Santlailo va nehsawh hna hlah. Cun na duh cee tuk hlah seh.

Cung zoh ah sang, tang zoh ah pit

Awlokchong le chimpit  vansaang in khuasak. Bawmtu le chaantu ngeih lo.

D

Daithlang haang din lo

Mi daithlang cu tihang din awk hmanh an ngei tawn lo.

Dawh duh lo ho um  hlah

Vawlei cung ah hin mui dawh a duh lomi an um lo.

Dawh lo hlei ah ing chiat

Dawhlo hlei ah zia chia takmi pawl.

Der ah der khat, thau ah thau khat

Lungkhat tein rianṭuan le lungnge tein um. Chiatnak, ṭhatnak i hrawm.

Der pheh chia, paam pheh chia

Kan sining hi kan i cohlan khawh a hau. I pheh len ding a si lo.

Deh lengmang ah tlahpuk hmanh nih mi aat

Zei tluk mi ṭha hmanh thinhun an thiam ve ti theih ding

Dir cung kal lam

A dam cu a dam ko cang na in a thazaang a fekfuan deuh rih lo.

Dir tlo kal heu

Kan kal ceomao, kan ṭuan ceumao ah cun rian kan tei.

Dingthlu le lairel

Ding le hmaan tein, aa tluk le aa ruang tein biaceih khuakhan

Duhnak mit caw

Duhmi cu an chiatnak le a ṭhatlonak hmuh khawh a si lo

Duh zoh le huat zoh aa lo

Kan duhmi zong, kan huatmi zong zoh lo in kan um kho hna lo.

Duhnak mitcaw

Kan duh mihna cu an chiatnak, chamhbaunak hmuh khawh asi lo.

Duhmi zakhat, nupi pakhat

Duhmi cu an tam liangluang ko nain nupi cu pakhat te lawng ṭhit a si.

Duhtu zaazat, huatu zaazat

Mi nih duh dih, dawt dih ti a um kho lo. Huat dih ti zong a um kho lo.

Dul le tlaang ri ah aa thawn

Rian ṭuan lo zong ah a duhduh in an nung kho ko.

E

Ei duhtuk paam nak, hur duhtuk liamnak

Ei lawng ruah cu paamnak a si, hur tuk i nu mit lawng au cu liamnak a si ve.

Ei ding in nung hlah, nun ding ei

Mi dang thazaang lawng i rinh hlah, na paw ca cu nangmah tein ṭuan ve.

Ei hre ṭuan daw

Thathut ngang ṭung i awr khut ngang.

Ektum ka ral roih

Mi zei ruaram lo kaa sawm sual ai.

F

Fa hrin hnut, ngakṭah tuan

Tar lei sang i ngeihmi fale cu an ngakṭah atuan. An thihtak zau hna.

Fa hrin long, thlai thlak long

A tlawttlau le a vaivuan an um pah ko zong ah a zuangtaang an um cingcing.

Fa khat ngeih le pangpar tonh

Nu cu fakhat an ngeih bakin an i ser ciammam i an i dawh chin.

Fa ṭha lo ngeih kam tlam

Fa ṭha lo ngeih cu kan chimhhna nakah kan ba, Kam lam aze.

Fale  tlak hnu hlei donh in

A hlankan tein rak i ralrin ding a si. Na daithlang tuk hme cu.

Fahniang thih le ngalcar khawn

Fahniang thih cu tuar awk ahar ko. A fakhring hran ko.

Falai le hreh peh

Falai cu u le nau he an i kom kho tuk lo. Phun dang deuh tein an chuak.

Falai chia le lo lai chia

Falai cu zei ro le rah hmanh tinco ding a ngei ve lo.

Fanu kir le sal lei tlak

Fanu akir sicun man vialte khirh dih ahauh caah sallei tlaknak asi.

Fanu ṭha le loram ṭha

Fanu ṭha cu inn kong lo kong a tuak, ṭuan le thawh a duh. Va a ngeih hnu zong ah nu le pa a daw, a kilhkamh hna.

Farhmui bir hlah, khangca par hlah

Sining nih a phut bak lomi, a tlinh ngang ve lo mi.

Fanu pakhat thawng, lopil pakhat thawng

Fanu ṭha le fel nih cu chungkhar a cawmken, a sersiam, a tunmer.

Fimnak dang lawng, hruhnak dang lawng

Mifim ruahnak le mihrut khua tuakdan mi cu aa dang hrim ko.

Fimthiamnak nih mit a auter

Fimthiamnak a ngeimi nih kau deuh le thuk deuh in khua an hmuh.

Fir thang chia, hal thang ṭha

Fir cu aṭha hrimhrim lo, thangchiatnak asi. A hal tein hal ding asi.

Fir fir khat nih fir za kuai

Voikhat te kan fir cun a hnu thil tlau vialte zong kanmah puh kan si peng cang ko.

Forhforh ah nam khiaktu, phaihphaih ah ngal kiak zaam

Vun forh cang ahcun ho kian lo, vun ṭhihphaih ah cun zaamnak hmanh i theih lo.

Furpi ni le pa hnawm thin

Furpi nilin cu a teek khun, pa zeirua lo zong an thinhun a thah in a thak.

Furpi ti hal le lungchung pa duh

Furpi ahcun ti a haal ko zong ah ti a nawi caah kan ding ngam lo. Lungchung tein duhmi ngeih i chimh ngam ṭung lo cu a fawi lo.

Furpi tihal le tluang zuun ngaih

Ram dang le khua dang i a ummi an zuun ngaih cu a fak khun.

H

Hakha holh le ral hronak

An aw hringhro a chia, mi hronak le mi raaknak ah a rem tuk.

Hakha dawt le mithi dawt

Mi dawtnak an thei lo. Lehrulh an hmang lo.

Hawikom ṭha le liangdanh ṭha

Hawikom ṭha cu kan harnak le kan thilrit a kan changtu an si.

Hawrha bang ka tla zo cang

Ka thawk cang vevek, a dih hlanlo ka tuah lai.

Hlawhleng sia khalh in

A herhlo le a huaha lo ah na caan liam ter hlah.

Hmachia dam fawi, minchiat dam har

Hmachia cu a loh a fawi ko. Minchiat balte a lo kho ti lo.

Hmaṭhing khawn faak, sual ṭhing phawrh fak

Hlanpi tuahmi sualnak, a tharin an kan holhtei nak lengmang ahcun tuar ahar tuk.

Hmuh duh ko nain zoh duh lo

Hmuh duh ko bu ah ka caah zei va ṭhahnem lai hlah tiah zoh lo tein um.

Hmuh lo thei kawl in

A um ma um lo, a si ma si lo ti ruat hmasa lo in hawi chimmi poh zumh i kawl.

Hmur fong bia la, zaang fong ṭhahnem

Biaduh hmursau cu dan cawinak a si. Ṭuan i hrek le zaanghlei cawi cu a ṭhahnem.

Hnak kar tenh nuam, mi kar tenh har

Mikar itenh i va cuhlen cu ahar. Hnakkar tenh mi situ cu anuam.

Hngakchia rai khat ṭhing lo

Hngakchia cu an fah thlulthalh a tam. Ka cu faak, ka kha faak an ti peng ko.

Hngakchia thingfung cuh in

Upa pipi nih zeihuahalo te i cuh, i  biatak tein i siik.

Hngerhte ka lung umpu tia

Mah lung lawng irinh, mi dang ruahnak zei hleng te ah rel piak lo.

Hniarlawn lung le vomkhuai lung

Anmah lung pi lawng an i rinh. An lung a ngan ti nak.

Hrangngawn nuva bang

Hmunkhat ah umkal ṭi peng, i zulhdawi peng, i thlah bak lo.

Hriktida hmanh thak hlah

A cu tehna cu ka zei hmanh a poi lo. Zeihmanh ah ka rel lo.

Hruhnak dang long, fimnak dang long

A hrut cio cio zong an i lo lo, a fim cio cio zong an i lo lo.

Hruh tuk cu mah caah faak

Mah ca le mah kongkhan hmanh i tuaktaan khawh lo cu afak ko.

Hruh hmasa, fim hmanung

Herh lioah hngalh ṭung lo i herh ti lo hnuah lungpem i vun hngalh ṭhan.

Huho lu huai in

A huaitaam tukmi, a chiakha tukmi, ṭih a nung tukmi

Huho liang leh in

Zei taktak hmanh chuahcanh lo in lawngkaro in kir.

Huiraw rual bang in

A ruun pi in hmunkhat ah um le kal, i zulh lulhmalh

Hun la law hun chia ṭhan

A lung a tam tuk mi. A tu le tu aa leet lelek mi.

I

Inn tinh lo ramh

Ruah cikcek, tuah cikcek le timh ciammam tein thil tuah mi.

Innpa cuar tlaih in

Inn le pa cu rualchan kan si lo zong ah rualchan tluk te in i dawt a si.

Innpa nungak le lam pawng thei

Innpa nungak cu len kal pah, lawipah hei ti bantuk ah vun bih pah lengmang an si.

Innpa sik le ṭhal khuadawm

Innpa he ruahlo piin sik a fawi nain lungriak thin riak um lo in a ṭian zau.

Inn rawl a ṭaam lo

Inn rian nak cun lo rian nam hmasa ding a si. Inn rian cu duhsah deuh ah.

Inn zu nih lo zu a pawnchuah

Hmundang in rat riangmang i a um ciami lehlam ṭhawl, dawi, chuh, cuh.

Inn zu ti tla bang in

Ma mui le na sam ziapzuap pi cu, thurh fiamfuam in.

Inn zu na si ri lo

Na zirtiang tuk, na phe tuk, na depde tuk

K

Ka biachim le ka tlah ṭem

Ka chim cangmi cu ka let ti lai lo. Ka chim bang in ka tuah ko lai.

Ka chaw duh le ka ralchiat

Hawi duhmi duh ve ko ṭung i hawi tuahmi tuah ngam ve lo.

Ka chu chap ah ka zubel

A ka ti hmasa hleihlei ah keimah lehlam dan ka cawi.

Ka chun tum le ka zaan tah

Ka lungthlitum le ka saduhthah a si zungzal.

Ka daw ta hlehlem ka cum ta kungkung

A ka dawt ko ruah tiah ka ruah nain ceilak a ka tongh ko he teh.

Ka duh tuk ah ka zah

Duhmi cu kan zah hna. An hmai ah umtu zia hna kan thiam tawn lo.

Ka ek hnial nganh, ka fa hnial nganh

Tuah lo awk le ti lo awk a ṭhat lo ruang ah tuah.

Ka fa ka chimhnak ah mifa fim

Chimh ci ka phih ko cang. Keimah tluk fa chim an um lai lo pei tiah.

Ka fa thi kaw sonh lo kaa sonh

Sungnak le harnak ton paoh ah hin sonhtarhnka bia chim awk a um peng.

Ka hnakhat ah dar tangka

Thil pakhat kong rumro ka lung ah a chuak peng, kan ruat peng ko.

Ka hawi caah nizarh, kei ka caah nithiang

Hawi an i dinh lio zong ah kei cu dinh mui ka hmu lo.

Ka hawi ngata fuan zawng

Hawi tuah cio, hawi kal cio, ka tuah ve lai, ka kal ve lai.

Ka kawi ka ral ah tla

Hawikom ṭha timi zong hi a ruahlo ah kan ral an si kho ko.

Ka lun lo nih chi ka barh

Kan i ruah lo le hnabeisei lo bu in thil ṭha kan hmuh khi.

Ka mi tei cu ek

Tei ciami kha heh tiah neek ngai in ti chih lengmang.

Ka naih le ka hua, ka kian le ka ngai

Umṭi lio ah i rem ṭung lo i, i hlat hnu in ngaih fawn ṭung.

Ka ngeih cia nih lei ka la

Ngaihchiah ruang ah harnak ton tikah chim tawnmi a si.

Ka nu phu chim in ka bia dai

Kan ngaihchiatnak hi kan nule kan chimh hna tikah cun a hung dai deuh.

Ka pa thi kaw kei lian laang

Ka pa ro le rah in kei ka lian ve cang lai.

Ka pu chi duh ka pi chi duh

Lung aa rualmi innchungkhar.

Ka siapi man ka zal bei

Tam ngai hmuh le ngeih i ruahchan lio ah tlawmte lawng hmuh le ngeih.

Ka sir a ka sik lo

A zei lei hmanh in a ka tluknak a um lo.

Ka lungthin, ka hriamnam

Lungnih a duh tuk hrat le a ngamh hrat ahcun hlawhtlin cingcing a si ko.

Ka tuah cia nih ka thal

Mah nih tunmer ciami lila nih harnak rak pek.

Ka tua ceo nih ka tha

Keimah bantuk zeirualo le santlai lo nih a ka hloh ko hme cu, cu ngai cu.

Ka tun law ka tun, ka ben law ka ben

Ka ṭanhmi cu ṭanh law law, a ka huatmi cu huat law law si ko.

Ka zu lunlak, ka fa lunlak

Kan fale cu an ṭhang lai i bochan tlak an si te lai tiah kan i ruahchan ngai hna nain kan ruah ning in a si tawn lo.

Kaite cio na si ko

Laam na thiam ning cu na mak ko. A herh bak in naa herh ko.

Kan chim voi hra, kan tlawn Hranhring

Kan rak chim cia kha nolh ṭhan lengmang a hauh tik ah hmanmi a si.

Kan chim bia van ah kai seh

Kan chimmi hi kan cung ah tlung hlah seh. Kan bia nih kan nenh hlah seh.

Kan i ngaih ah khum le khal, kan i hmuh ah zu le zawng

Hmuh lai kan ingaih tuk nain hmuh taktak tikah zei pipa arak si lo.

Kan i ngaih le sakhaang dar     

Kan rak i ruah ning he cun aa van vawlei. Aa dang tuk lawmmam.

Kawl chaw a cotu van

Kawl paoh le hawl paoh in ngeih le rum a si lo. Mi van ngei an um.

Kawl sa vuai lo bang

Tlok sabur in bia i ruah, tlok sabur in rak holh cio.

Kawlki le mardeng

Lam hlatpi ah.

Kawlrit arpi tiat in

Asi kho lo tuk ding le tuah hngalo dingmi i ot.

Kawlvai hlen ṭha, nu hlen ṭha

Hngalh bal lomi cu hlen an fawi deuh, nu zong hi hlen an fawi ve..

Kawl tlawng bia le tipil bia

Mah nih hmuh ve lo hrat cu, zei paoh hi i zumh dih tak awk ah a har.

Ke kiak sumsu, kut faak ti than

Mahle ṭuan khawh mi tete cu kan rak ṭuan cio a hau ko.

Kei fapa neih kum ah puul tlung

Kan voikhat thil ti caan thengah sungh le zatlak hna kan tonah khin chim asi.

Keimah pi lawng chumhmui bang

Hiti hin keimah pi lawng ka hmei ko hih.

Khat ka phei, khat ka liang

Aho hlei ṭanh deuh awk an ṭha lo, ka caah cun an i khat, an i tluk

Kheng chung ca tlolh

Tinco hnga ding a fiang tuk ko cangmi tlolh diam.

Khuapi bia thing-nge tuar lo

Khua tung cul in ceih le phai cun minung fa nih celh ding ruam asi lo.

Khuataw voih ceh khualu ah ekceh in thang

Bia hi a vah lengmang tikah bialo pi ah a vaa chuah tawn.

Khuate fa le lo ar

Khuate fa cu an fodawng tuk, mi zoh an pang tuk, mi hmu ballo an lo.

Khuazing kan to kan ti mei ṭheoṭheo

Lamhlat ummi nakcun pawngkam ummi cingcing nih hna an ngamh deuh ko.

Khuahri rual nan bang

Hna nan chet tuk lawmmam, dai deuh tuah u.

Khuaingal bu lamh bang

Kaa ralring kho bak lo, kaa chuahsual bak ko.

Khuangbai laam bang in

Mah umnak vial ah i nuamh ngai i hmundang ah i nuamh khawh ti lo.

Khual pa duh le va zuang chaih

Khualpa he cun i duh ko zong ah i co khawh lo a tam.

Khuhlu dah na bang ai

Tar na thiam lo hi teh, no churh in heih na um peng ko hi.

Khuaza rawl tep

Hlumhmi khua set ngei lo in a peemvaak pengmi.

Kinglang puanbu tah in

Ka tuah, ka tuah lai ti lengmang i tuah bal hlei lo.

Kum vui lai thih, inn tlun lai ruah surh

A deuh maceo te ah sungh, tlak.

Kurbungbel bang in

A mui a chia tuk. Aa dawh lo kho taktak.

Kutte zawngza

Rian hi kan i bawmh cio awk a si. Amah rian tiah rinh ding asi lo.

L

Laam lang ka ti, bel phul ka cok

Puai ah laam ding i timh ve ngang i chungṭuan diam. Mah lung duhmi le huammi tuah thiam lo in a herhmi lawng kan ṭuan tinak.

Laihna le tumbu bang

A tu le tu te i ton lengmang

Langak le thlanthla leiba cawh in

Ngol hngal lo in leiba cawh hman. Hmuhnak kip ah cawh chih peng.

Langak nih ka fa rang cang lai pei ka ti rang hlei lo

Ṭhatnak ka hmuh cang lai, ka hlawhtling cang lai ti zong ah hlawhtlin hlei lo.

Langak rawlṭhing dau in

Mi ta hal lo chimlo pi in laak le ei hman

Langak ral chia, nunkhua sau

Nunnak, damnak caah Lung fim le ralring tein um cu nunkhua asau hlei.

Langking kuak-ek hmawm bang

A tlawmte, a pelte din zong i rit, tlawmpalte i khawn zong i ai len.

Lawmh tuk ar ek

Kan lawmhpi tukmi thil pakhatkhat nih ningzahnak a chuahpi tikah chim tawnmi a si.

Lawmh tuk vawrvok ek khur tla

Lawmh zia a thiam lomi minung.

Lei le dang hmanh aa seh

Nuva, Unau, cingla rualchan, dawtmi he hmanh isik sual aum ṭheo tawn.

Leengleh ser le kuak lai ṭawl

Leengleh nu a hun i ṭamh cang ah cun lung a hring bak ko.

Lem malum thi, ṭiangmaṭuang nung

A nih a nih timi tu an thi hmasa le zumhreih lomi tete tu an va nungdam.

Li chuk thal cho

An nu le pa zeiruaramlo an si nain an fale cu an fim, an ṭhawngṭha

Lobua tlat le zurua tlat

Lobua tlat ahcun ṭukṭak le supsaptal phurhtlunh lo ti a um lo.

Lo cephnep le tar tlokciar

Tar tlokciar sin um cu anuam lo taktak. An dai bal bak lo hme cu.

Locuul kal le nu khual tlawn

Nu pawl khual tlawn cu zei le zek dek tawr le cheng in cawk an hmang.

Lo lam pial in pial

Temtuar lo te in a poih, a cat, a thi tinak

Lo nuar le rawl nuar mah ca fak

Rawl nuar le lo nuar cu rawlṭtaam tihal in umnak a si ko.

Lopi nee le khengpi nee

Zei huaha atang ti rua lo ti zongah vun khomh ah cun a rak tam cingcing ko.

Lo rawl le sal chu

Vansan i hei ti luamlaam awk ah cun a poi lo cuh.

Lo riak chamh in chamh

A zei le zong in kan cham cikcek. Kan thiang kirkiar.

Lo laak kum khat ca, nupi laak chanchung ca

Nupi ding cu ciamciam tein kawl awk a si. Ṭha tein i ruat ta cikcek.

Lo zuu nih inn zuu a pawnchuah

Mah le ram, mah le khua ciacia ah ram dang, khua dang minung nih an rak ra i a lengmi tu nih a chungmi tu chuh, dawi, uk, umnak ngei lo in chiah.

Lote kem ṭhahnem, belte kem paamṭhi

Zaang hlei ngeih cu a ṭhahnem, ei khawh lengin Rawl chuan cu pamnak asi.

Lung chung paih zuam in

Pek hlan lo, ngah hlan lo hal chih peng, ngiar chih peng, nawl chih peng.

Lung cung cuang le thingpar va

Umnak le dornak reprai kan ngei ti lo, thinphang dailo kan si ko cang.

Lunglak thlawh le til thak kheuh

Huah thai awk le kheuh awk ah aa laklawh tuk.

Lungte nih lungpi kamh

Sifak santlai lo zong nih mirum arum khawhnak dingah a bomhchanh ve ko.

Lungthli ruah lo vok ke

I ruahlo tuk in thilṭha tuk tinco.

Lungthli puam le zak hle

A leng in cun aa fimter, a ning aa zahter ko nain a lung chung cun mi zei ah a rel lo, a ning a hngal, a ruam kai.

M

Mah mi duh, mah ba duh

Minung cu kan duhmi aa khat dih kho bal lo. Kan duh ci le kan uar ci te a um cio ko.

Mah bu thaw, mah voih thaw

Mah thil tuahmi cu a chiain kan hmu kho tawn lo, ilunghmuih ziarcio asi ko.

Mah fak le sakhi ngal

Mah le mah i fak tuk cu mual i phoh a si.

Mah le cangai khor

Mah nih tuahmi kha a ṭhatnak zong a chiatnak zong mah nih hmuh le co a si ko. Mah te cio in tuah ding tinak. Midang hrawmh sian lo.

Mah tilzang cumh

Mah chungkhar chiatnak mi sin ah va chim, mah le mah harnak ipek.

Manbo pasal ngeih bang

Hawi ngeih lo ka ngeih ti bang i uang ngai, i lung sii ngai.

Manbo rit donh in

Rianṭuan tik i daithlang tuk le zozawt tuk i ṭuan, fel lo tuk lawmmam.

Mang e mui e tiah

Mang le mangchin bang ka lo ko.

Mar pa ka biar kaa phoih vekvek

Ka tuah lai ka timi cu a har zong ah ka tuah ko lai.

Mei tuai thi, zang tuai nung

Hei thei thiam ko. Mi ṭhapa a thin hun ahcun thlachiat aruat bak lo khah.

Mi bia chim faak, ar hma cuk faak

Mi nih kan kong an ceih tik ah a faak in kan theih khun i kan i fahsak ngaingai.

Mi chia eek le valah eek

Zei cu hme a va si rua hnga, a khi bantuk minung hrat nih khin.

Midawh thlan le kikawng hnar, muichia thlan le tibungkur

Mi dawh cu an thlan a pawt, muichia cu an thlan a luang.

Midawh sawikhat phur

Mi dawh timi zong hi an zeite tal dek sawi an si ve ṭhiamṭhiam ko.

Mi har ah Dar Al

Mi hlei an um locun san kan tlai cio, an ṭhahnem cio, kan sunglawi cio.

Mi khaap va tah hlah

Mi sining kha va chekhlat tuk hlah. 

Mikei pi khual tlawn bang

Ka um ka kal lai ti nak zong ah kal lo, cutik khatik timi caan zong ah tlun lo.

Mi kut cung ah savo puam

Aa tluk cio le aa zat cio in tinco bu ah keimah ta nak in midang ta hi a ṭha deuh, a ngan deuh, a tam deuh ko rua tiah ruahnak ngeih khi.

Mi le mau hram.

Hrih le hram vun izawt cun chungkhat rualchan kan rak si dih ko tinak.

Mi le hmaifa

Hmun a bitte zong ah kan vun i tenh lai i kan i tlum kho ko lai.

Mi cu mi ko, mah cu mah ko

Midang pi nak cun mah chungkhat cu kan zawn kan i ruat deuh cingcing ko.

Mihrut forh le nam hnol tat

Mi hrut cu forh an ziak. An tuah taktak ngam ko.

Mihrut kaa ah khuato

Mi hrut le mi-aa bia hi khuazing nih a theih i a tling duh kho ngai.

Mihrut umnak khua nuam, buluk umnak ti nawi

Mihrut nakin ka fim a timi hi mi tuaihrok tu an si tawn.

Mi nih bialo an chim lo, ar nih hmalo a cu lo

A si lo rumro mi cu mi nih an chim lo. Biahram zeital cu aum tawn ko.

Michia lianh le vate lianh

Michia cu an rum tik ah an i porhlaw, mi an neek, an lung a puam.

Michia zei thei lo, tlahpuk zei tei lo

Mi cheukhat cu azei taktak hmanh von bochan awk le rinh awk an tlak lo.

Mit caw hnabei sei in

A si kho lo tuk ding rumro i ruahchih peng.

Mitkuh nih zah a hngal lo

Mi a vun kuh tuk cangah cun zei thlachiat hmanh ruah khawh asi ti lo.

Milian duh tlong, vanruah duh sur

A rum le a ngeimi cu an duh paoh in khua an sa. Thlauh le kham khawh zong an si lo.

Miru le thawlthu

Leng zoh nakah miṭha lawh ngai i chunglei lungput chiat ngang, ziarngeimi si.

Mi siing nihchuah, mah chung ningzak

Sual kan huah tik ah mah chung cu ning a zak.  Mi cu an rak i nuam ziar.

Mi zohnak ah chiakuk, mah zohnak ah ṭhavang

Mah chiatnak ihmuh cu ahar. Fale zong nu le pa mit cun an idawh kho tuk.

Mi dang kut in rul tlaih timh

Mah nih ngamh hleng ṭung lo i mi dang vial tuahter timh.

Mileng le khual bang in

Chungkhar rian bawmh hman lo, ei lawng i chuah peng.

Mi lut dawn hlah rul lut dawn

Fuukfonhtu an um dik ah kan i duh lo tiah donh le khirh phung a si lo.

Minung nunnak van in tla

Awlokchon vaansan lio caan i ruahlo in bawmchantu an um khi.

Minsak le ai kah

A min saktu ziaza le lungput hlikhlek te a keng.

Mi pa khat thawng, sa pakhat thawng

Mifim, mi rum, mi ṭhawng pa khat nih mi an kilhkamh i mi hna an ngamh tuk.

Mi thlawhcia lo ah zu le zawng an i seh

Mi ṭuan cia le tuahcia mi ah zeidek vaa cuh i heh tiah buai, i siik.

Mi rum nih rum chin an duh

Rum le ngeih hi ka zaa cang ti a um kho lo. Duh a faak chin.

Mipi nih lam vaat, saza nih ṭum tu

Minung nih zulhmi phung le lam kan ngeih awk asi. Sa hmanh nih an ngei.

Mifim fim man ei cawk lo, mihrut hruh man cawi cawk lo

Fimnak le hruhnak nih man an ngei veve. Fim man cu thilṭha a si, hruh man cu harnak le ningzahnak tu a si.

Mimte fa thlau in

A phaknak paoh ah lak fa a hring; aa siang ngai te.

Mitcaw saipi dah bang

Keimah hmuhning a hman bik, a si bik ti lung ngeih.

Mit kho hmai khat

Mitka le hmai ka ah a um komi rumro hmuh lo

Mui ah mit dang, hlawn ah mit khat

Mi dawh kan timi cu aa dang cio ko nain hlawnthil tu ahcun kan hmuh ning aa khat ngai.

Muichia thlalang duh in

Muichia deuh paoh hi thlalang hram ah an i zeel deuh, an i zuum.

Mupi ar cawi in

Ngaihthleem in mi tongh hman, mi ralrin lo kar te ah va ti chih, va ṭhuat chih.

Muvanlai bang in

Harnak nih an tei bak lo. Na tuar kho taktak.

N

Na bia bawn hang tluk lo

Bia vaivuan le bia silo lawng na chim na hmang le zumh ding na si lo.

Na lung vom chu zat

Na lung a tam tuk. Zei na duh set zong theih khawh na si lo.

Na pu zawm hlah, na taw kua lai

Pi le pu, tar neh sawh cu a ṭha lo. Upat ṭihzah ding an si.

Nau lai ah mui chia

Ṭumchuk lai ah cun mithmai nih a theih.

Neemneem nih chawṭha hlawh

Mi lungneem le mi awka neem cu dawt an i hlawh. Lawmh an tong.

Neh hnu kawl ral dawi

A hlankan tein timhtuahnak ngei lo in thil a si hnu ah heh tiah i timhtuah.

Ngakṭah khua-awng tong lo

Ngakṭah cu chimtu rep an ngeih lo caah an vaivuan deuh, an lotlau deuh tawn.                                       

Ngakṭah zau le nuhmei thluang

Ngakṭah cu an tha thu deuh, nuhmei zong amah duh in a um.

Ngakṭah le fatun paamlo um hlah

Ngakṭah fa cu an vaivuan deuh, an tlawttlau deuh ko.

Ngakchia tlak hnu hlei donh timh

A dai thlang tukmi cu harnak an ton hnu lawng ah an lau, an lung fim.

Ngaikuang hmanh nih ka umnak li lian

Mah le chuahkehnak khua le ram cu kan tleihchan cio. Kan iduh cio ko.

Ngatai le a nu ton bang

Kum caang te lawng i i hmuh le i ton.

Ngalhriang thi kaw vomkhuai hnak faak

Thih le loh nikhua cun huatu tiah ruahmi hmanh khi an ngaih arak chia ve ko.

Ngalcar khawn le ṭate thih

Kan tonmi thil tuar a har tuk, a faak tuk hringhran ti nak khi a si.

Ningṭih voikhat, ningzah zungzaal

Ning ṭih nakin ningzah hi afak deuh. Ningzah cu mihmai khah asi ti lo.

Nuhmei ṭhit le va bu hlawm

Nuhmei ṭhit cu a ngeihmi dihlak zong i laak dih a si tinak.

Nupi ṭhit le samhri phoih

Nupi ṭhit cun dihmi le heumi atam ko. Kan zeizong kan iziat dih ko tinak.

Nute chuak kaw pate ca, pate chuak kaw nute ca

Kum khua a tlin cun nupi le va ngeih cu a herh ve hrim ko.

Nupi vuak keel, darkhuang cumh keel

Nupi le cu vuak pah ding an si ko tinak.

Nupi cia le rawl ṭhing lum

Nupi cia auh nanna cu an fawizaang deuh ko.

Nupi cia le para cia

Nupi cia cu vun ti luklak ah fawite in a ngah ko.

Nupi bia in bia tlu hlah, siapi ki in lam tlo hlah

Nu pawl bia cu biapi tuk ah lak ding a si lo. Pa bia hi a biapi ko.

Nupi ruahnak tikhur ral pet hlah

Nu pawl khuaruahnak cu a rak bi, a puanlau deuh ko.

Nupi ṭha le loram ṭha

Nupi ṭha le fel nih cun inn lo an ser. Rumnak an chuahpi.

Nupi chia le kedan teet

Nupi chia cu a tuan an har ko, vun hlonh awk ah le an paamhmai fawn.

Nupi ṭha nih rualza pum, nupi chia nih rualza ṭhen

Nupi ṭha ngeih cu chungkhat cingla rualchan he i dawt, i tlaihchan a si.

Nu lai kung khih

Zei kan ton te lai ti hi khuazing nih arak kan khiah piak cia ko cang.

Nung na khuaceu hmuh

Tar tuk le derthawm tuk ko zong ah nun te hnem cu a sunglawi tuk.

Nu vaak bia he kir, vok vaak thal he kir

Lenvah ṭhawntuk cu bia chokvai theih deuh le mi he hna isik deuh asi.

Nu chimh ngai lo, zubui lam thlang ril

Nu le pa chimhbia ngaih lo cu khua-awng ton lonak asi. Harnak tonnak asi. 

Nu zuun thlum le pa hawng kawng

Nu le hi fale thlum-alh zia an thiam deuh caah fale zong nih an tlaihchan deuh hna. Pa hi kan koktlong deuh.

Nu cingcih lo, pa muangmuah lo

Nu le pa nih ṭha te chimhrelh lomi fale cu an nun zia aa dawh lo deuh.

Nuhmei lo tuah in

Lo bite ah thlaici phun zakip thlak le tuh  hman khi.

Nu le va bia zel awng in lan

Nu le va i siiknak bia a si zong ah, a biapimi biathli thup a si zong ah midang sin ah chim le phuan ding a si lo.

Nu phun le fazai

A phunzai tukmi fanu cu a nu bang a phunzai ve ko lai.

Nuva ṭhen le hreiha baoh

Ruahlopi le zei huaha lo te ah nu le va i ṭhen khawh a si.

Nupi tlokciar le nikhua ceen

Ngol hngal lo in a tlokciar peng ko. A kaa a dai lo. A nuam lo tuk.

Nupi lum lak hlah, sei chi alum lak hlah

Nupi le seichia cu santlaihnak le ṭhathnemnak an ngei peng.

P

Paam lung ping, ngeih lung awng

Sifah cangah cun Lung nih theih ko zongah itheihter lo asi. Ngeih cangah cun Lung nih atheih mipaoh tuah khawh asi.

Pasal pakhat tonlo le thingsei phurhkhat tlinhlo um hlah

Nu caah pasal tonlo ti a um lo. Mah tawkzawn i theih paoh ahcun.

Palak zan rawl kawl

Chun ah um sawh riangmang i zan ah heh tiah a vaakmi, rian aṭuanmi

Pahnawm thin le faruah thawh

An thin hun a fawi taktak nain chikkhat ah an thin a dam colh.

Pa te le sapherh nu te le antlak

Pa fa hnem cu nu nak cun tha le zaang an ngei deuh cingcing ko.

Pate thin le bel ti tlok

Pate pawl cu an thin a hun ahcun a tlawh bak in an tlok ko.

Pasal biachimnak beo hlah, sakhi tehnak beo hlah

Bia chim aa thap lo mi, a nal tukmi.

Pasal rawlṭam lo lian tum, nupi rawlṭam bel lian khiing

Pa nih loram rian aa hlinh, nu nih innchung hnoksak a tlaih ve.

Pasal ral van, nupi ral van

I ṭhit-umh hnuah kan zia le sining aa thleng kho tuk. A van thu a si.

Pangtar tong lo sa

Mi nih zei ah rel lo mi. A bia zong lak piak duh lo mi. Mi nih hnonmi le hrialmi.

Paam lai ah belh tho

Sifah lai ahcun harnak phunkip nih mi a tlun hnawh.

Pa le uico

Pa cu an hur deuh. Nuamhnak caah nukip an kawmh duh ko hna.

Pa phu dai hlah, mai sa dai hlah

Lungriak thinriak bia taktak cu philh thai khawh a si lo.

Paam lei vai puan aih

Har tuk vansan ah bukbau chung khumh thilpuan ṭhaṭha i hruk.

Pawl lak thlak kah in

Kan theihmi hi bia vaivuan men, ruahdamh i chim menmi asi ko hih.

Paw te khim kaw hna te ngam

Pawcawmnak khim Rawl ngeih cu Hna angam.

Peleek inn thar lawm in

Tharhlam lio ah luhchuah ngai i a hnu i mi pal duh ti lo.

Phete le vompi bang in

Ceitak takin ideh le ihlen.

Phihlik kheng tlang vel in

Tawifiang tein chim ko ding, aherh lomi Bia dang pipi tam tukin chim hmasa khi.

Puanbu tang zanghlih

A thli thupin thil tuah hman; mi um lo karah an thang chiatlen

Pulthi nih sarthi hram

Thih ciocio ko hmanh ah sarthih cu afak khunin tuar asi.

R

Riaklaang va bang in

Umnak rep ngei lo in kan vak kan vai ko.

Rualchan ṭha le lungpher ṭha

Rualchan ṭha ngeih cu hna a ngam. Lung a dai.

Rul nih ka mei ka laam hna kaw huainak ah hmang ning

Mi nih hi tihin hung ka ti te hna ai kun, cei in phomh te hna ning tiah mi bawh.

Rul bang zirh thiam kan si ri lo

Chan khat te lawng kan nung lai. Hohmanh chan kan i nolh kho lai lo.

Rul hnu e ral hmai e

Voikhat kan ton cang hnu cun kan ṭih tuk cang, kan rim cikcek.

Rul le rul an ke an i hmu

Mi zir le mi zir cu an zia an i thei  veve.

Ruaha tanbo hngak in

Ṭihnung le tuksum a si ti thei ko nain zaamtak le hrial zong theih lo.

Rua kawp cheu bang an i cheu

Faphir ciammam, an zei le an zong in an i lo tuk

Rualnau hawh le la kung tuk

Lengno zaa thar cu vun hawhdai ah mi kheuh le mi huah an hmang tuk.

Rawlṭhing lum le biaṭhing phorh

Liam cia Bia le Hla vun ruah cun Zun ṭhing an thar ṭhan, Lung aleng tuk.

Ruahpi paiper khat lo

Ruah thamtham cu i donh ter ding a si lo cuh.

S

Sa thah hlan chawl phah

Kan saduhthah mi kan tuah taktak hlan ah  heh tiah midang sin ah va chim len khi.

Saduhthah le el hlah tiah

Saduhthah hi cu a ṭuan tluk cun a har lo caah hei thah khawh thluahmah a si.

Sakhi ngal ah zei kawp hlah

Mah le mah i fak len nih zei va si hlah.

Sakhi zankhat thau in

A thau chikkhat, a der chikkhat a si ko.

Sahluk chu sian in  

Halmi paoh sian, neihmi paoh pek hmang

Sahuai thing khimh in

Ngawl hngal loin tuah hmun tuah peng.

Sakuh mai teu bang

A mui achia, a song-ang achia. Duh a nunnak pakhat hmanh a um lo.

Sapi a neh cung ah thi

Dirhmun fek kan ngeih awk a si. Kan lung a hmun awk a si.

Sakhi tlangza tan kaw, saphai a umhmun ah kual

Kan duhlo mi, kan ṭihmi kan hrial len ko bu ah kanton lengmang khi.

Saphu khua nih a dei phuat

Hnangam kan mu ruang ah caan nih a kan liam tak dih.

Saphu lei phah bang

A ṭha um te le zeicukha lo tein um ziar i a hnuah cei lakin mi tongh hman.

Sanglai innka ah dir

Kan chim, kan tuahmi hi kan cung ah a tlung tawn. Kan tuh bang in kan zun.

Saruak umnak ah langta um

Mi sual le mi ṭhalo cu salnak le ṭhatlonak hmun ah an um deuh ko

Sa seh rawt in rawt

Zaangfahnak le zawnruahnak um bak lo in ṭhuat chih, huai chih.

Sazuk bang khua dawh in

Ṭuanvo ngeihlem lo zong puaipi nikhua i hawisin va chuahlangh ve.

Saipi zor len hmanhseh cawpi tia tang

Nan sung len na in nan taang cingcing, na tar na in an ṭhawng cingcing ko rih hih.

Seihnam chinh ṭha, nun ṭhinh ṭha

Zia le za, umtu hoiher hi duh taktak ahcun i remh khawh, ṭhinh khawh tuk a si.

Siapi lungleeng, nupi tluangkhawng

Siapi le nupi cu Kum kua chung an Lung aleng kho. Khua an ngai peng.

Sia hnu dawn fungfek ing

A nehhnu cem paoh sual phawt le harnak tuar deuh a si.

Sik lo kal le khawh lo lawi

Nupi khuateh cak tukmi, kawh lem lo zongin mah lawiin ahung lawimi.

Sia ruah tuar in

Mi ti nak let lo te le chimrel lo tein i in peng.

Sual sual khat nih sual za kuai

Voikhat te kan sualpalh ruang mi nih lunghrinh le zumh lo thai a si.

Sumkhal hna corh in

Ka duh lo ka ti hnu ah cun ka hneek len ti hlah uh. Nan ka hneek kho hlei lai lo.

T

Tangkhong mi remh thiam

Khuasik ahcun nu le va an i kawp ṭhipṭhep.

Tar thih le ngau bawh

Tar cu an cak ngai ko rih rua ti lio ah ruahlo pi in thih khut an hmang.

Tar ah bia riak, thingtum ah mei riak

Tar cu an hmuhton a tam hrat caah an theihmi a tam deuh. Ruahnak hal phu an si.

Tar le ngakchia an i lo

Tar cu an lung a nenno. Un le nuar hna an hmang. An duh paoh an chim fawn.

Taw lawng chi le kaa lawng ang

A hur tuk mi nu, pa kip nih ṭhuat khawhmi.

Tenglam liang leh in

Kal duhnak hmun phak le caangka i kir colh.

Tenglam sai neh hmuh in

Mah tuahmi nehnang hmanh theih ti lo i midang puh.

Tenglam Cite thuh in

Thilri maw, tangka maw a tlau suallai tiah thuh i mah zong nih thuh theih ti lo khi.

Tenglam cangai khorh in

Ram leeng ka chuak lai ti i innpawng haukam ah vai hel duatdat.

Tenglam ngaikuang hlur in

Aa rup le rup lo, a a tlak maw tlak lo ti tuak lo i thil tuah.

Tenglam leiṭial zuam in

Tei khawh lo tuk dingmi va zuamcawh cu mah ceinak a si.

Tenglam tlamsak in

Mah nih ruahnak le thluak le pawngkam thil sining zoh pah lo le tuaktan pah lo rumro in chimmi le fialmi ning bak lawng in thil tuah khi.

Thai hlung mang manh in

Kan mang kan manh ning te in kan hngin ah kan ton taktak.

Thiingbual ni ah nu kawl hlah, furpi ni ah lo haal hlah

Leng zohnak le thilthuam zoh men in nupi kawl ding a si lo. An lungput le an ziaza tu in zoh ding an si.

Thantlang holh le sanawng khai

Biafiang chim duh colh lo in a herhlo bia dangdang chim len.

Thangaw meheh tum bang

A hur tuk mi, nu lo in a um kho bak lo mi.

Tharthak mi duah in

Zeirek lo ah bia faakfaak in mi ti hman.

Thlahu le vaangpa

Upat le hmaizahnak kan in pek.

Thereng chai chaih bang

Dup tiah thawngpang le rihawh a daih khi.

Thereng fa hrin in

A fakhat nak ah nau cung in a thi colh.

Thing hnip na, zuan dum na

A ṭha aipat tiah nan ka nehsawh, nan ka nemnuut.

Thihnak lam tawi, nunnak lam sau

A rang tuk duh, i hnawh tuk cu a ṭha lo. Lungsau tein um a ṭha.

Thihchin arbawm thlai

Thih le loh chinchap ah harnak le lungetheihnak dang nih phak.

Thih hnu pangpar ṭhi oih

Nun lio le dam lio vial ah i dawt hleng ṭung lo i thih hnu tu ah an caah tangka tampi dih in thanser, lungdonh le an ruak ni ah an ṭhatnak kong lawng chim le rel tuk khi.

Thinghmui san caan, ram san caan

Kan sining kel in sipeng khawh asi lo. Caan sinah kan ithleng ve tawn.

Thingtum leh long, nu helh long

Ngiar lengmang le i hneek chih ah cun tuah khawh lomi a um theng lo.

Thilrit cung ah kuakpeng hmanh rit

Kan thil a rih lio ah thil dang vun i chap cu a har tuk.

Thing kawi le thing kawi aa rem

Lungput le ziaza aa lo mi cu an i kawm kho deuh tawn.

Thing kawi le rua kawi an i rem

Zia aa khatmi cu an i rem, an i kom kho deuh.

Thlitu lak voih voih

Aho zei rel piak ṭung lo ah vaa chim seek len.

Tilian meisul va zuam cawh hlah

Ti le mei kong ah na ral va ṭha tuk hlah, naa chuah sual ko lai.

Ti kan tha, rawl kan zaang

Ti lo le rawl lo ngaingai cun zei van hri kan sih kho lo.

Tilim le bawi hrin

A lung a neem i mi zawn a ruatmi.

Ti le nga bang in

An i kom tuk, aa ṭhen kho ding an si lo.

Ti nawi hmanh a hngah har

Thil hmete nih a kan buai khawh, a buai ah cun a daih hngah a hau.

Ti thiam ti in paam, mei ngamh mei in paam

Kan ngamhtuk mi le zei i kan rel lo ngaimi hin harnak kan tong tawn.

Ti thur zei nih tleeng hlah

Zeidang cu tiin tlengh, kholh le ṭawl khawh asi. Ti cu tlengh angah lo.

Tin sih thei lo

Mi mitau le mi khuahoi zong zoh lo, mi hrut pei a rak si ko hi, a leih a thei lo

Tlaisun nu-ei tuar in

Fa-ei a hmuthiam lomi nu-ei pawl, fale a tuahtao tukmi pawl.

Tluang ka tluang, lai ka lai

Mah le khua khat mite cu kan ibomh, kan ichanh deuh ding asi ko.

Tlukceu le keucheu

An pahnih in an i tluk bak ko. Aho a ṭhahlei le a thiam hlei an um lo.

Tu thlum fa al

Tar hna caah tu le fa cu an sunglawi tuk. Cu caah lor lak in an dawt tawn hna.

Tupa ṭha le hriamnam ṭha

Tu pa ṭha  cu mi an kilhkamh, bochan awk an tlak

Ṭ

Ṭate le thlamte

Ṭa le cu zei an va si ko hmanh ah mi hna an ngamh. Kan kan humzual.

Ṭah lak ah nihchuak

Ngaihchiatnak, thinhannak ton lio cuahmah ah ningzah nak hna von ton chinchap.

Ṭeek tla le khuari bang

Lak hruakin nan thawngpang cu a tur in a tur ko hi teh.

Ṭekṭek saipi doh in

Zeitluk mirum le miṭhawng zong ṭih lo in dir-onh ngam.

Ṭian lai zan le thawh lai kuh

A dongh lai ah hin anuam khunin theih asi. Ṭhen lai kan siang hngin lo.

Ṭhahnem ka kawl, paam chin ka tong

Zeital a ṭhahnem hnga maw? ti nalak ah sungh le zatlak lehlam ton.

Ṭhahpi chu hngah in

Leeng chuak lo in innchung ah aa erh peng ko.

Ṭhuro hmur remh in

Kan remh deuh, kan ṭamh deuh..kan hrawh chin, a chia chin.

Ṭuannak kut tawi, einak baan sau

Ṭuan vial i ziaphel ngang, ei vial ah a cuh in i cuh.

Ṭuan tlau ei chuak

Ṭuan caan vial ah na mui a de lo, ei caan chuah ah cun na hung chuak ve fawn.

Ṭumbut le hleihlak

A iṭhen kho lomi, i huat ral awk a ṭha bak lomi chungkhat.

U

Ui nih ka zawm kaw ar nih ka eek

Mi nih neek cio hna tiah anangmah tiang i mi va neek ve cu dah ngai.

Uico hmanh nih rual hngal

Chungkhat, cingla rualchan theihchan hi a ṭha.

Ui hrut khur huahin

Thluak hmang ikpaak lo in heh tiah thuah thlorh in tuah, ti thlorh in ti.

Ui khuang le ar bo in

A lettalam in nangmah lehlam na thin a va hung chapbei, zah hngal lo.

Uico vaak long, saruh tong

Kan kawl long, kan ṭuan long ahcun thilṭha zeital cu kan hmuhton deuh ve ko lai.

Uico lam hnokin

Dawnkhantu le mi hnahnok a si peng.

Uico saruh hamin

Tuahkhawh lo ding, ei khawh lo ding i ham, mi dang sianh lo.

Uico lo kal in

Zei ngai tuah mi um ṭung lo in vaa thawh sawsawh ve men.

Uico tlanghlawh thawh in

A hmun cu va phak ve ṭung i ṭuan ah i ziaphel.

Uite le ngakchia

Hngakchia cu an duhnak a tuah piakmi paoh kha an ngamh colhhna.

Uite eek chuak ko na lo

Ingeih tuk lawmmam nakah um thiam lo in i tholhvaih, siahelh tuk.

Uico bo nih mi seh hlah

Mi ralchia cu an i hrocer tawn ve na in mi an ti taktak ngam lo.

Ui le me an si ko

Ihuat tuk, i remlo tuk,  i hmuhthiam lo tuk.

Upa le khuafa

Lungthin pical a ngei, aa suum kho, aa hneek kho cingcing.

Umpu ṭhalo zu thawt in

Ruahnak leng in a ṭha tukmi, biachim a thiammi, kawmh a nuammi.

Um lokar zang fil hman

Mi umlo kar i an kong ceih, an thangchiat, cong-oih.

U ting nau zo

Aa tluk tein, aa raul tein i phawtzamh cio.

Ui nih a fir aa phuhrung

Thil diklo kan tuah tik ah kan i phuhrung i kan mithmai ah a lang tawn.

Utlak cho cuh in

I der sonh tuk hlah. I zuam chih ve.

Utlak hmanh nih ka hawi phar zawng

Hawi sining le mi nun kan i hrawm khawh ve awk a si.

Unau ṭha le liangdan ṭha

Sullam: U le nau cu harnak aa hrawm ding ka si.

V

Vaa chuan rawl tuh in

Pek or le ṭhenh to kan si ko. Kan or cu a va no ngai chapbei.

Vaabu hlawm in hlawm

Pakhat hmanh taanglo, a zei le zong in laak dih.

Vanchia zawn ah ralra

Vanchia zawn ahcun zei le zeidek a chuak khun.

Vaanriang cio te a si ko

A puarhrang tuk. A naih naih ngam ding si lo. A tlak bak in mi a tlak.

Vaarlungtleng bia a pelh ai

Kan nupi hal lio bia le thu vialte cu a pelh dih ne, a vaivuan dih.

Vaipa amah hmun ah laam

Zeihmanh kan ṭhangcho hlei lo, kanmah ning peng kan si ko.

Vai baar lote bang in

A tuah lote i lawh ter, zei poi salam lo in um.

Vaking bang keimah te cawng thai na

Zei ka suallo bu ah a ka ti hram, a ka ngiar chih peng.

Vanha nih nam an ser i anmah thahnak ah cang

Kanmah thuah cia le ser cia lila nih harnak, thihnak a kan phak ter tawn.

Vawrvok zumput tla bang in

A luntuk le a lehpek in i nuamh cu ningzah huahnak a si.

Vanzuang rawlṭaam bang

Nan awn-au tuk, hna nan chet tuk mineng nan thla, dai deuh tuah hnik uh.

Vanzuang daamti liah in

Tlawmtuk lawng pei na ei hi, tam deuh in ei hme, a cute lawng ei cu.

Vapual nupa bang in

Aa daw taktak mi, zohchunhtlak nu va an si.

Vazuun le thliahniar va bawi bang in

Miṭhi le lalang zulkhaltu he naa zi peng ko.

Vokpi bu sual bang in

Thilri vialte phahnul in a um, kekar thlaknak hmanh a ṭha lo.

Vokpi ti kholh in

Mah le mah i zumh ngai. Ka fel, ka ṭha, ka thiang tiah i ruah.

Vokpi hmai i lungvar thlak

A man a tammi le a sunglawi tukmi thil zei i rel lo, sawksam men,

Vokpi hmanh nih a einak kuang hngak

Rawl hrawn tikah na khim le cangka in va ṭin colh hlah. Um ta rih.

Vom nih ka mi seh maw faak deuh ka voih

A ka tukṭhuat mi nak in a bia a faak deuh, a celh in celh ding a si lo.

Vom nih a thau aa hraankan

Sualpalhnak i phuhrun ruang ah rak i hrocer len.

Vomkhuai thi kaw ngalhriang hnaakfaak

Phunkhat theng si lo zongah mah khuami thih ahcun ngaih a chia.

Vompi sathu tlaan bang

Atu le tu na veh lelek ko, zei ko hme naa chiah.

Vompi zuri bang

Thi thlup in aa hngilh ko, zei hmanh a thei ti lo.

Vulvau tuah hra ṭhen

Ṭhal ah cun nu le va zong an i daithlanh deuh, i ṭhen zong a tam.

Z

Zan khat mit chinh ton ah

Ruahlopi khin hei thi sual ko usih law…zeitin?

Zawng para thlei in

Mah duh ning paoh in thil rak tuah le bia rak chim cio. Khuakhan cia lo in thil tuah.

Zawng zang tlaih in

Thil pakhat, ruahnak pakhat i tlaih peng, i hruhpi chih.

Zawngte tikhur hngah in

Hmundang ah i ṭhialkam bak lo in umnak hmun ah um peng.

Zawng sin ah ngau kaang

Mi sual le mi ṭhalo ruang ah mi ṭha le mifel zong sual phawt le thangchiat a huah.

Zawnglu le thir fiim

A mit a fiim tuk mi, thil tlau hmuh a cak tukmi

Zawng nih amah tawkheng hmu lo in mi tawkheng a sawi

Mah sining i hmu lo in midang va soi hman khi

Zawhte mei luah in

Lenvahnak in lawi hngal ti lo in va ṭoh beh.

Zawhte phol na lo

Um sikseek ngei lo in mi va hnurtat peng, va tuai peng.

Zawhte ek phum bang

Palhnak an ka theih sual lai tiah thuh zokzok a hmangmi. Pheh a hmang tukmi.

Zawltling le Nganbawm bang

An i duh ning a fek tuk, thihtiang biakam an leet lo.

Zokhua holh le mizaw zoh

An holh a neem, an hmurka a panh i mizaw zohnak ah aa rem tuk.

Zu zawng hmai zah in

Minung te hnem cu zei bantuk kan va si zong ah kan i hmai zah ko

Zanlei umpawng par in

Chikhat te lawng a nguhmi thil, duak tiah lung vun thawh i i let ṭhan

Zubui tanthum kei vo kua

Mah i hmuh nak ah a uak ngai, a ngan ngai in i hmuh. Zei te hei si fawn lo.

Zubui thingpar kai ter

Huam lo tuk, duh lo e ralchiat tukah biasi phai peng. Bia huahalo kha biapi ngaiah a ichuah.

Zubui mei can te

Caan tawi te lawng, a nai tuk cang, chikkhatte a si ko cang.

Zute thi kaw rawl vaang ah, vate thi kaw rawl vaang ah

Kan ei-paw kan kawlnak ah hin harnak phunkip le thihloh tiang kan ton tawn.

Zu mei zuh in kaa zuuk  

A thlite in ka lawi taak hna, kei cu kaa ngol ziar.

Zu hlun le hawi hlun

Hawikom ṭhing hi an rak sunglawi tuk.