Remnak a Sermi

Mi le mi karah Remnak a Sermi cu

Lung lawmmi nan va sihna dah!

Pathian nih ka Fa tiah a in tihna lai. [Mat. 5:9]

Judahmi pakhat le pakhat an iton tikah „Shalom“ tiah an ti i cu an ibiakchonhnak a Sullam cu na cungah Daihnak um ko seh, ti asi. Cu Holh cu kannih sin zongah hin ahung phan ve i a Phakning hi Ralkap holhmi asi caah „Salam“ ti tikah hin atam bik kan Ruahnak cun Kut ihler riangmangin Salam ichinh, Ralkap nih an tuah tawnning khi asi. Sihmansehlaw khikhi cu a Sullam aniam biknaktu arak si. Kannih Laimi nih cu bantukin ichonhbiaknak i hmanmi Bia hi kan ngeih lo caah cu Bia he a inaih bikmi cu „na dam maw?“ kan iti hi asi. Bawi Jesuh nih „na dam maw“ a Titu cu Lung lawmmi nan va sihna dah, ati ti usihlaw a Sullam cu kan kheng deuh hnga lo. Judahmi nih Salam an rak ti tikah hin Daihnak ti lawng zong cu asi dih ve lo. Daihnak ti tikah hin Hnahnawhnak le Luritnak aum lo tinak deuhtu hi sikaw cucacun Hnahnawhnak um lo ti lawng hi cu Salam ti atling lo. Hnahnawhnak um lo [absence of trouble] zong asi hleiah na cungah Ṭhatnak tlung koseh ti zong hi asi ve. Cun hi Ṭhatnak hmanh zongin biapi deuh a simi cu „Remnak“ tihi asi i Bawi Jesuh nih achim duhmi cu mi le mi karah „remnak Sertu“ [peace maker]deuhhna hi an si.

Cubantuk „Remnak“ aser mihna cu Pathian i Fa kha nan si tiah a tihna. Pathian i Fa tihi a Sullam tlawm tein kan hun chim rih hmanh lai. Hebru mipawl nih an Holh hin thil kong chimtu Biafang [adjectives] hi tam tukin an hmang tukhna lo, an Holh hin cu bantuk Biafang cu atlawm caah asi kho. Tahchunh nakah Laiholh i „anih cu midai asi“, kan timi hi annih nicun „anih cu daihnak Fapa asi,“ an ti hnga. Cu bantukin Barnabas cu hnemhnak Fapa, hnangamnak Fapa asi, an ti tikah anih cu mihna a Ngamhtu, mi a Hnemtu an ti duhnak asi. Cucacun Pathian i Fapa ti tikah hin Pathian tuah bantukin a tuahmi tinak asi i Pathian tuahmi cu Remnak asi caah remnak Rian cu Pathian i Rian taktak asi. Pathian i Rian cu Remnak asi sicun Pathian dohtu Rian cu rem lonak asi. Mi acheu khat cu a zungzalin Hnahnawhnak le rem lonak a Chuahtertu [trouble maker] kan si zungzal. Sihmansehlaw Mibu chungah hin cubantuk mi lawng cu rak um asi ve lo i Remnak le Daihnak chuahtertu asi mihna zong an rak um ve. Khat le khat an ihngalhthiam lonak arak Remhtu, an ilunghrinhnak arak fianh i arak Dihtertu, an ihuatnak arak thlum ṭhantertu mihna Pathian i Rian kha arak ṭuantu an si taktak.

Voikhat Japanral lioah khan Kalapa pakhat Japan Ralkap nicun Kawlram chungah an tlaih i Thong chungah an khumh. A ngeihmi thil vialte kha an chuh dih i va tampi hlah kaw a pawngte acun an heichiahhna. Japan Officer pakhat cu arung lut i a thilri kha a zohhna tikah Cauk pakhat ahmuh. Cu Cauk cu alak i azoh i Kalaca (Hindi) cu pakhat hmanh arel khona lo le a thiamna loin Baibal Ca asi tikha cu ahngalh. Cu tikah Kalapa cu Japan Holh incun achonh hnek i Kalapa nih khan zeihmanh atheih lo caah an ichim kho lo. Cu tikah Baibal Ca cu a ilak i a Kut dongin a Ṭang cungah Vailamtahnak kha asuai i a chimmi Bia cu Krifa hi na si maw tinak kha asi. Kalapa nicun ka si ti nakah a Lu kha asuk tikah Japan Ralbawipa nicun a thil cu alak dihhna hnuah apek ṭhan i Innka kha ahun piak i chuak tiah a Kut dongin a hmuhsak. Cun achuah pah lioah cun a Japan Ralbawifung kha apek i cu Fung cu Kalapa nicun athih tiangin a ichiah. Chim duhmi cu hngalh lonak Hor thukpi cung i kainak Hlei a Sertu cu Krih kha asi i Ral le Ral remhtu mihna cu Krih asi. Cu Rian cu Krifami i kan Rian hi asi i cucacun Krifa ti kan Sinak zong hi asi ve.

Mahhi Rian hi Rallio chung lawngah aum lo, Holh zong a ithei bak lomi Miphun dang le Miphun dang karlak lawng zongah aum lo, nifate kan Nunnak, Khuasak le Tintuk, Minung pakhat le pakhat kan ihawikomh nakah hin kan ton le hmuh lemangmi asi. Vawlei cungah hin thil khuaruahhar ngai a simi cu „Daihnak le Remnak“ tuahtu pawlhna hi mi nih an duh hnain an rem bakhna lo i anmah hi Daihnak le Remnak tuahtu si ko hmanhhna sehlaw anmah hi Hremnak le Harnak ingmi an si tawn. Kan Bawipa Jesuh Krih cu „Remnak Bawi“ ti asi. Sinain Kalvari Tlang cungah Vailamtahnak kha aing ko. Siangbawipa Judson cu Remnak tuah awkah Kawlram chungah ara. Sihmansehlaw a hmuhmi le comi cu Thongthlaknak, Rawl loin Hremnak te pawlhna asi tawn. Voikhat hoihna cu Thong saupi atlak hnuah Kawl Siangpahrang cu Khua dangah kal ka duh i Pathian i Phung va chimhhna ka duh tiah Nawl ahal. Kawl Siangpahrang nih a Hronak cu, „Khi Khua hrawngah khin Phung chimtu Saya dang cu zeizat hmanh va kalhna sehlaw ka zeihmanh apoi lo. Sihmansehlaw nangmah kal cu ka duh lo. Ka mihna hi na Chimmi zum le zul dingah hin Mihrut an sithlu lo. Sihmansehlaw kha Kuthmape hein akhat mihna kha cu an celhhna lai lo,“ ati. Daihnak le Remnak sertu Kut cu Vailam i Thing cungah Thir an khenh chih chel, Hri zongin fak tuk an hren rihhna caah Hmape lawng tein an khah chel asi tawn.

Harnak hrial lemang hi „Daihnak le Remnak“ ser asi lo, ralchiat sawsawh asi. Daihnak hmuh tihi Ram lakah va kal riangmang i mah lawngin va um i mizeihmanh nih hnahnawh loin va um khi asi lo. Cubantuk cu zeihe dah a ilawh ticun Tiva aluan duh ti lo i a idil mi he a ilo. Cu bantukin luan aduh ti lomi cu a Donghnak acun athu tawn. Cu bantuk ṭhiam ṭhiamin kannih nih „Remnak le Daihnak“ asi tiin kan timi zong hi mah Pumphiar ca i acan sual tikah cun thil ṭha asi nain athu khomi asi i voi tampi cu athu ko. Mei cu an alh i Thing atlum lemang lawngah an nung, Tiva cu aluan lemang lawngah athiang, cu bantukin Krifami Ziaza zong hi a Minung i Hawi ca a ihman lemang lawngah anung, athiang i „Remnak le Daihnak“ aum kho. Remnak ser hi a fawite tiah ruat sual hlah usih. Kan Bawipa Jesuh cu hi Rian nihhin a Lu ahloh. Krifami tam pihna zong hi Rian nihhin Harnak rel cawk lo a inter rihhna hleiah an Lu tiang zongin a hlohhna; kannih zong hi, hi Rian nihhin a kan hal tawnmi atlawm deuh hleiin aniam deuh hlei lai lo.

Note: Hihi tleicia Rev. Van Bik ṭialmi "Bingbir Par" chungin lakmi asi. Cun hika zawn hi tleicia Pu Hrang Nawl nih arak ka ruah, cucu Bawi Jesuh Krih nih arak cawnpiakmi Tlangpar cung Cawnpiaknak donghlei Bia hi aherh zawnah "puar le hran, ralṭhat" zong ahau, ti asawh, tiah arak ka timi asi ṭheo lai.