|
|
||||
|
ZAANGFAHNAK A NGEIMI
Midang cungah Zaangfahnak a Ngeimi cu Lung lawmmi nan va sihna dah! Pathian nih a in zaangfahhna lai. [Mat. 5:7]
Midang cungah Zaangfahnak ngeih hi Biakam thar chungah a Hram thawkin a Donghnak tiang Suihri bangin a izammi asi. Hi Zaangfahnak timi Bia hi Biakam hlun chung zongah a ummi Bia asi i „a fekmi Dawtnak“ Pathian i Dawtnak fek ti lemangin leh asi. Mah Biafang hi voi 150 leng bakte Biakam hlun chungah kan hmuh. Zaangfahnak cu Pathian i Dawtnak fek asi caah Pathian nih Minung a kan Zaangfahnak hi a ithleng lemang khomi thil asi lo. Cu bantukin Pathian nih Minung i kan cungah Zaangfahnak angeih caah Minung zong nih kan minung Hawi cungah Zaangfahnak kan ngeih ve awk asi. Bawi Jesuh Krih an hngalh lonak Hmun i Zaangfahnak tlawmzia hi Khuaruahhar asi. Africaram micheu nih, Faphir hi Vanchiatnak asi tiah an ruah caah Faphir kha an ngeih sicun an thahhna, Vawlei sermi Um chungah an sanhhna i Cakei nih rak eihnaseh tiah an hlonh lakmen ko hna. Grik mifim bikmi Aristotle an timi Pa hmanh nih, Sal cu thilri sawsawh an si tiah arak ti. Sal cu a Bawipa nih aduh sicun athah khawh, azorh khawh, ahrem khawh, aduh paoh tein atuah khawh. Rom Bawi pakhat nih a Zu dinnak Hrai kha a khuaisual caah a Salpa cu athah. Zu dinnak Hrai hmanh Minung asi vemi Sal nih atluk lo. Pathian i Zaangfahnak hngalh lonak Ram le Hmun cun, Zaangfahnak aum hrihrim lo. Kannih Laimi lak zongah Krih i Zaangfahnak kan hngalh rih lonak hmunah cun, kan Holh lila hmanh Dawtnak le Zaangfahnak timi Biafang hi an um rih lo. Biakam thar nih fek tein a kan chimh lemangmi Bia cu Ngaihthiamnak hmuh nakah mi ngaihthiam aherh tihi asi. Jesuh nih Ngaihthiamnak angei lomi Sal kong achim i adongh nakah a timi Bia cu, „Midang i an Sualthurnak kha nan ngaihthiam duhhna lo sicun Van cungah ummi nan Pa zong nih nan Sualthurnak kha a in ngaithiam ve duhhna lai lo,“ tihi asi [Mat. 11:26]. Bawi Jesuh nih a kan cawnpiakmi Thlacamnak cu, „Mi nih kan cung i an sual tikah kan ngaihthiam khawhhna bangin kan Sualnak zong kha kan ngaithiam ve tuah!“ ti asi. Cuticun Biakam thar Cawnpiakning hi midang cung zongah Zaangfahnak a Ngeimi nih Zaangfahnak kha an hmuh ve lai, tihi asi ko. Zaangfahnak ti tikah a Sullam cu hivial lawng hi asi rih lo. A dang aum rih. Cucu midang Lungthin le Cuar chungah luh khawh i aruah ningin ruah ve i ahmuh ningin hmuh piak khawh kha asi. Hi zawnah hin Bawi Jesuh kong a Fianternak caah kan hun chim hmanh lai. A thihnak Ni hnihthum te a ibat tikah Bethani khuaah akal i aduh bikmi cu dai tein idinh kha asi. Kha tikah Pi Martha nih Jesuh cu a dawt i upat tawnmi a Bawipa asi caah an ngeihmi lakah aṭha le athaw bikmi kha chuanpiak le pek kha aduh. Kurung, karang tiah acawl acang, a ituai a ihmal, a Ing zong apuang pah i Jesuh nih nem tein a sikmi cu Martha ei le din lawng hi biapi asi lo dah kaw, atu i ka herh bikmi hicu ei le din nakhmanh zongin daite [quiet] um i idinh ziar [rest and relax] hi dah kaw asi, ati. Pi Martha nih Jesuh cu adawt ko. Sihmansehlaw a Dawtning kha Jesuh i herh ningin asi lo. Hibantuk Dawtnak hi kan Laimi lak zongah hin tampi aum ve ko. Kan dawt mihna caah arem le aṭha le anuam siloin kanmah Siaremning paoh menin kan dawthna i kan dawt mihna caah khan thil har a simi tampi aum. Hizawn hi kan ruat setbal lai lo i cucacun Krifa kan si caah aruah zong ruah ve awk kan si cang. Kannih nih kan zaangfah mihna chungah khan kan luh khawh sicun kan zaangfah hnanak a Let zain aṭha chin lai. Cun hibantukin Zaangfahnak kan ngeih sicun Ngaihthiamnak kha afawi deuh. Mipa maw Minu nih zeica dah ati ningin ati i atuah ningin atuah hi a kong [a reason] aum zungzal tihi kan philh ṭheo sual tawnmi asi. Cu a kong cu kannih nih kan hngalh sicun zeica dah khiti khin aum hnga tikha kan ngaihthiam khawh deuh suaumau ko lai. Zeica dah khiti khin aruah ti tikah a Ruahning arak ipalhhrim zong asi kho ve, a Pum tlin lo Bia zong asi kho ve ṭhiam, a ichuah pimi thil ruang zongah asi kho. Cucu kannih kan hngalh piak kha ahau i Franmi Phung thlukah, „Hngalh dih cu ngaihthiam dihnak asi,“ [to know all is to forgive all] an timi cu a hmanngai ngaimi asi ko. Kannih nih kan hngal dih kho bal lai lo. Sihmansehlaw kan izuam ve sicun hngalh khawh tawk cu kan hngalh khawh ve ko lai. Zaangfah tihi a ngaingai ticun, tuar i, in i tipei asi cu! Cu tuar i, in i timi a Langhnak asan nakbik cu Bawi Jesuh cungah khan asi. Pathian cu Minung i kan Cuar chung hrihrim apei Jesuh hrimin alut i Minung pakhat bangin arat i Minung i kan Mit zongin thil cu ahmuh ve i kan Lung thinin thil cu aruah ve i kan Sualthurnak le Ṭahhramnak vialte chungah cun aluh cu! Cucu peimaw Zaangfahnak ti lemangmi cu asi cu! Kan Sining asi ve cu kan si ningin zaangfah a kan duh caah asi. England ram Siangpahrangnu Queen Victoria cu a Pasal [Prince Albert] nih arak thihtak i Lung leng ngaiin aum. Cu hnu tlawmpal cun an Hawikom ṭha ngaimi pakhat cu a Pasal nih a thihtak ve i nikhat cu Queen Victoria cu cunu sinah cun zei Thawng thanh hmasa lo piin ava leng. Cu Nu cu Ihkhun [Couch] cungah khan arak zau i Queen Victoria arung luh ahmuh tikah khan thawh a izal. Cu tikah Queen Victoria nih, „Tho hlah, Nihin cu Siangpahrang Bawinu lenin ka in leng lo, a Pasal nih a thihtak Minu nih a Hawinu zong a Pasal nih a thihtak ve Minu lenin peimaw ka in len ko cu,“ ati. Pathian cu kan sinah Rumra [majestic] ngei ngai le ṭih awk le a therin rak therpiak awkin arat ṭung lo, kan Minung hawi pakhat inpei arat cu! Cucu Zaangfahnak cu asi. Cucu Zaangfahnak Minung i a cangmi cu asi. Cu bantuk Zaangfahnak, mi cungah a ngeimi lawng nih Zaangfahnak cu an hmuh ve lai. Thil khuaruahhar ngai a simi cu midang chungah kan Hmanthlak hi kan ihmu lemang. Zeirel loin kan um piakhna sicun zeirel loin an kan um ve ko. An cungah Zaangfahnak le Dawtnak kan ngeih sicun an kan dawt ve ko. Cucu Zaangfahnak timi cu asi. Alexandria khuami Clement nih Gnostics taktak nicun; „Pathian sikha acawng lemang,“ arak ti. midang cungah Zaangfahnak ngeih a hmangmi midang ruah ningin ruah a izuam i midang hmuh ningin hmuh a izuammi cu Lung lawmmi nan va sihna dah! Pathian nih Jesuh Krih sinin a tuahmi cu cu thengte cu asi i cu thengte cu Pathian nih a in pekhna lai.
|
||||