Rev. Dr. David Van Bik

MUPI NIH A BU AHNINH BANGIN

 

Mupi nih a Bu kha ahninh i

A Fano kha avun zuan hnawhhna i

A Thla kha avun isamh i

A Thla cungah a futter dihhna i

Azuan pihna bantukin

BAWIPA nicun a hruaihna [Deut 32:11]

Hla le Awmawi (musik) hi aṭha bikmi cawnpiaknak Lam cu an rak sive i philh kho hlah usih tinak caah aṭha bikmi Lam pakhat (method) cu Hla hi arak si. Kan ngakchiat deuh lio ahin Paul khualtlawnnak Khua vialte kha Hla in an rak kan chimh, i cuih Hla thiam acun a Khuamin vialte kha hngalh peng an si ko.

Cubantuk Tuahning hi hlan piin rak tuah mihna asi ṭheu lai i philhhna hlaseh tinak ca Lam ṭha bikmi pakhat arak si caah Moses zong nihin a Rovuihbia kha Israelmi hnacu Hla in achiah takhna, »Hi Hla a Bia dongh tiangin a chimhhna« [Deut 31:30], ti kan hmuh.

Deutonomy Dal 32 hi Moses nih Pathian a Thangṭhatnak le zeibantuk Pathian dah asi ti a Fianternak le cuih Pathian le Israel mihna kha zeitiin dah an i Pehtlaihning asi tinak kha asi; cun Dal 33 hi Israelmi Moses nih Thlachuah apek hnanak kong kha asi.

Kan Caang thimmi hi Moses nih zeitiin Pathian nih Israelmi azoh khenhhna ti a Chimnak kha asi bik i hi chung ahin Muisam fiang ngaimi pakhat ahman i cucu Mupi asi. Vunrel rihhna hmanh usih:

Mupi nih a Bu kha ahninh i

A Fano kha avun zuan hnawhhna i

A Thla kha avun isamh i

A Thla cungah a futter dihhna i

Azuan pihna bantukin

BAWIPA nicun a hruaihna [Deut 32:11]

Saupi Baibal cawng le ruat mihna chim tawnmi acun Baibal chung ahin Tahṭhimnak le Muisam bakin tamcem Cawnpiaknak asi caah zeitik hmanah Baibal i Cawnpiaknak ahlunh khawh lonak hi asi, an ti. Kannih Laimi zong hi Muisam le Tahṭhimnak hi kan hmang ve ngai i »Pithlung Inn thar lomhin« ti le »Nupa chimmi Bia ngailo cu Zubui bangin Lam thlangah an ril« heiti tehna hi kan ngei. Hibantukte te hi Laimi kan um chung paoh le kan Holh hman asi chung paoh acun an um zungzal ve ko lai i kan um ti lo le kan Holh aloh lehlam acun um tilo asi ve ko hnga. Cucacun nithaizing i sawm ka in duh mihna cu, Kanaanram chungah alut dengmang cangmi Israelmi hnanih anmah Hruaitu simi an Pathian kha zeitiin dah an hmuh tikha, Israel mihna Mit in zoh le hmuh ve izuam hnikhna usih, tihi asi.

Minung nihin pumpakin siseh, phunin siseh nunnak Lam chung i kan kal lio ahin aphun phunin tonmi thilhna, kha aphun phunin tonmi thilhna khan Hrilhfiahning cu an idang cio. Atlang piin chim acun tonmi thilhna i Hrilhfiahnak khan Biaknak Phung ti ciomi hi an sihna i hngalh cio bantukin Biaknak Phung cu adang dangin an um i cuih hnacu kha thil nunnak Lam i tonmi Hrilhfiahning cio kha an si. Tahṭhimnak ah Buddhist Phung nih kha tonmi thilhna a Hrilhfiahning cu Karma asi i atu i na Simi hi hlanin na rak Simi ruangah asi i hmailei na silai ding hi atu i na Simi ruangah asi, ti asi; chim duh micu atu lio a Sining kha amah nih zeihmanh a ituah khawhmi aum lo, hlan i arak Sining nikhan auk dih, cubantuk ṭhiam ṭhiamin hmailei a silai ding zong kha zeihmanh amah nih a ituah khawhmi aum lo, atu i a Sining nihin a siter ko lai, tihi asi ko. Chim duh micu Israelmi zong nihin an tonmi Nunnak lampi kha Hrilhfiahning an ngei, i cuih an Hrilhfiahning cu kan Baibal i Biakam Hlun chung ahin kan hmuhhna i cuih Biakam Hlun chung chuakmi Biakam Thar asi caah krifami Hrilhfiahning tam bik micu Biakam Hlun chung i a rak um ciami hi an si. Hi thilhna Fianternak caah, Abraham zumhnak thilhna kha vun ihrawm vein amah bangin zumh ve awk asi tikha i Cawnpiakmi cu asi. Abraham le Moses nih an Zumhnak le Palhnak aum Caan kha um hmansehlaw Pathian nih a hruaihna ko tikha Zumhnak tlangpi cu asi i cucacun Bawi Jesuh ahung chuah tik zong akhan Bawi Jesuh cu Moses pahnihnak, Adam pahnihnak, ti hmanah Biakam Tharmi ṭialtu hnanih khan an hun ti ngam i cunih cun a langhter duh micu Abraham le Moses an Tlinlonak kha Jesuh akhan ahung tling tikha asi. Cucacun Biakam Tharmi ṭialtu hnanih Bawi Jesuh cu Moses bantuk asi tikha an ngamh ko i Moses bantukin Tlangpar cungah akai ve i Nawlbia Tharmi kha a pekhna, an ti. Krifami kan Biakam tharmi Bawi Jesuh nih a kan pekmi cu Tlangpar cung Cawnpiaknak timi hi asi i cucu Moses nih Israelmi apek mihna Nawlbia pahra bantuk kha asi ve.

Hihe a ipeh tlaiin ruah aherh ko rua timi acun Laimi kan Tuanbia le Nunlam chung Kalnak ahin zeitin dah thil Hrilhfiahning a sive tikha asi. Cucacun Laimi kan Tuanbia tawi tein vun chimta ka duh:

Phun le Hnam leiin Phun hmete, mitlawmte cu kan sihna, thong zathum le thong zali lakkar hrawng lawng kan sihna,

Holh leiin arum ngaimi kan sihna, Minung thong zathum hrawng ca ahin Holh 46 hrawng kan ngeihna i cucu Minung 6523 ah Holh pakhat lengmang khan a sihnga; cubantukin tuak acun Kawlte hi million 40 hrawng va sihna kaw, Holh 6154 an ngeihna hnga, Rumning a idang cio ti usilaw,

Cathiamnak le Fimnak leiin 1900 tiangah Min ṭial thiammi hmanh rak um asi lo,

Biaknak leiah Rai arak Biami cu kan sihna. Biaknak cu Ṭihnak le Hlennak lawng ngawtte arak si. Amah belte Dr. East tining acun Tulukram i kan rak um lio ahin zeimaw tiin Nestorian krifami Phung he kan rak itong sualhnga dek maw, cucu Hlawnceu pawl i Rai an rak thawi hi Biakam Hlun chung Levimi raithawi hein an ilo ngai, cun Lushai pawl nihin capcar Kût timi an ngeihna i Lanhtaktho hein a ilo ngai heiti bantuk, sinain a sitak tak Tikhawhnak cu zeihmanh ngeih asi lo,

Cun Ngeinak leiah Caw hleihnih, Sia pahra, Vok paruk, Kaom peh thong khat ngeih acun Vawlei cungah arum bikmi siin iruah asi; kan Vawlei hi arak bi ngai ko rua; Ruakhua, Saikah, Ruabuk, Fungkah, Thangzang, Sihhmuh hrawng lawng khi asi ko rua, Thau le Tikir hmanh hi an itel rua lo.

Kha kan nunnak Lampi akhan Pathian nih ahun kan ton ve tikah duhsah tein Lamcho kan hun panh ve.

Cun Laimi phun lak ahin Lai a iti mipawl hi mahle Khua le Ram atlaih channgai i Hmun dang kal le pem zong aduh lo mipawl an sihna. Hihi Ṭhatnak tampi aum ko lai i Baunak zong aum ko lai. Thahṭhimnak ah a luancia Kum 50 hrawngah khan heiti ko usihlaw, Tlangpi tlangval pawl hi Falam ah Fang an va zuar tawn i Zamualkhua lu tiang, Lentlang an vung liam ruamah akhin cun Tlangpi lei cu an vun cuan ta i an ṭap tawn, an ti. Cucu a Khan in tuak acun Khan 32 hrawng lawng asi. Keimah tehna zong hi 1939 in 1942 tiang Falam i Ca kan rak cawn ahin, Sianginn khar lai hi kan rak ingaih tuk i Sianginn khar asi ti acun zanlei Suimilam pathum hnuin kan rak ithawh i Lungpi hoihna ah kan rak riak tawn. Ka heichim duhmi cu mah khua Tlaihchannak le Ngaihnak le Duhnak cu kan ngeitak tak ko. Cucu aṭha, aṭha lo, kan ti kho lai lo, sinain khattelei kapin kan zoh ve cu aherh cang ko tiah ka ruah.

Japanral thian, Kum 1945 akhan Laipawl zong hi Kawlrawn pem hram avun ithawk ve. Thil Umtuning hngalh arak silo micu acaih lei i aṭhawng ngai mihna hi apem lomi an si i acaih lem lo mihna tu hi apem khunmi an si. Cun kan Laimi Lungput rengte ahin Mipem hi nautat ziar an rak sihna i »mipem sathlai« ti an sihna. Cuzong nicun maw pem hoihna hi arak donh deuh hnga zeidek, pem hi kan rak iharh ngai ko.

Cun keimah Lungput hrim zong ahin, Hla pakhat i, »Brighten the corner where you are,« (Na Umnak kha va ceuter tuah) timi khimaw ka ilungphorh hnga zeidik, mah Umnak corner te ceuter hi mi i an ceuter cangmi Hmun i vai nomh ve nakin kan Ṭuanvo asi deuh tiin ka Lung ah aum. Cucu atu zong ahin ka zumh rih ko i palh le palh lo lehlam tucu Tuanbia nih afian terte ko lai, rak ipalh diam zong asi kho ko. Cun mivialte hi keimah ruah ningin an si dih awk asi ti zong asi lem lo.

A zeisi hmanah, thil Umtuning cu ruahlo ningpi piin a ithleng lengmang ko i hmailei zongah a ithleng lengmang rih ko lai. Ruahning in a ithlen lo caah a i Thlenning hi aṭha lo tibel palh asi ko hnga. Tahṭhimak thil a ithleng bikmi pa khatin hun chim ka duh i cucu LBC hi asi. Hi Insein i 1951-1955 i Baibal ka rak cawn lio ahin hika Hmun le Hma ahin LBC a umte lai ticu apel pawite hmanh ka rak ruat phan lo. Sinain atu acun aum ko i a um komi hi ka rak Ruahning asi lo caah aṭha lo tiin ruah acun zeitiin dek asi hnga, heiruat cio ko hnik ulaw, keimah maw apalh hnga LBC dik apalh hnga.

Cun pahnih nakah kan Krifabu chung thil Umtuning hi zoh aherh ngai tiah ka ruah. Krifabu cu kan hung ṭhang deuh lengmang ve i Minung zong cu ahung tam deuh lengmang ve. Hitik ahin mi acheu khat cacun Bu nganpi i um hi aṭha i anuam ko, sihmansehlaw Pathian Rianṭuannak ca ahin Bu hme deuhin um i fel deuh acun Rianhma akal deuh lai tiah Ruahnak ahung si; sinain acheu khat venih ṭhen tipaoh paoh kha Satan Rianṭuannak ah ruah i aṭha lo ti rumro asi ve, kha nikhan a kan tuai ngai i atu hi anaih zong anaih tuk caah zeidah aṭha deuh ti zong cu hmuh khawh asi rih lem lai lo, Tuanbia tunih alang terte ko lai. Ssinain Krifabu cu ahun iṭhen ko i atu tiang acun hmet deuh i fel deuh kha ṭhat deuh dawh cu asi. Cun Association kong zongah cu bantuk ṭhiam incun asi. Kum 1948 tiang acun Laitlang dihlak ca ahin Association pakhat lawng arak um i a Min cu Chin Hills Baptist Association ti arak si. Thawhlawm vialte bur dih i cu burmi Thawhlawm chung incun Sayate le Pastorte vialte kha Lahkhah rak pek asi. Cucu arak ṭha ve ko, sinain atu acun Association tampi aum cang i Kalning ahin Holh le Phun deuhin Association hi kal dawh asi. Hizong hi atu acun anaih tuk rih caah a Sullam afiang kho rih lo, Tuanbia nih afian terte ko lai.

Cun Rianṭuannak leiah tlangval tam nawn hnacu Miram dangah Kuli hlawhin kal i mah Miphun le Holh aum lonak Hmun ah heh tiah Rian an va ṭuan. Kei ka i Lomhhnak bik ve cu, hi Tlangval pawlhna hi santlailo cu an um ko lai nain, atam deuh nicun, an Nu le Pa pawlhna kha an philhhna lo, an Krifabu pawlhna kha an philhhna lo i Phaisa le Thawhlawm an kuathna lengmang. Hihi Pathian hmaiah rimhmui Raithawinak a sihrim hrim ko lai, tiah ka zumh. Amah belte thil pakhat zoh duh lo zong i hrial khawh lomi cu Biaknak Phung hi sipuazi Tuahnak (commercialization of religion) ah hman i hizong hi aṭha, aṭha lo ti hlanah Tuanbia nih afian terte ko lai ti ko rih usih.

Cun tlawmpal in vun iṭhial usilaw, atu lio Laitlang le ahlei khunin Hakha-Thlantlang chung thil Umtuning hi cuan hmanh usilaw, aho hmanh nih rak ruah balmi an si lo; duh le duh lo ti lehlam acun chim thiam an si lo, sihamnselaw aruat khomi rak um hmanah aruat kho lomi keimah bantuk hi tampi nan um ve ko lai. Atu lio thil Umtuning hi a Sullam cu atu ko koah hincun hngalh khawh asi rih lo, kan inaih tuk rih, Thlalang neih tukin bih an chim alo ko. Kan hngalh zong hngalh lo zongah ruahhrim hrim awk aherh ko, tiah ka ruah micu: »Hi thil chungah hin Pathian hi a itel ko,« tihi asi. Mitam deuh nicun, cucu zeihme chim ahau, zapite hngalh hme asi ko cu an ti ko lai i ahman zong ahman ko lai, sinain Pathian a itel ko ti zumh hi afawi lo ngaimi asi, zumh ahar ngaimi arak si. Zeimaw ti hoihna khin, Mangmui heiti bantuk inmaw, siloah Langhnak heiti bantuk inmaw Aw hoihna inmaw Theihnak le Hmuhnak khi um kho sehlaw Santlailo pawlhna nihin zumh an ifoih deuh ko hnga, sinain cubantuk pawlhna cu zeihmanh an um ṭung lo i Dinlonak tu lehhna Teitu asi lengmang tikah cun zumh awk hi ahar ngaitak tak ko.

Cucaah kan Ram le Miphun cungah a tlungmi thil hi Pathian nih a kan hninh asi hnga maw? Cucu ruat cio hnik usih. Nannih Bu chungah aum i a Pi nih rawl apek lengmang mihna hi ihnin ve cang uh, a kan ti asi hnga maw? Profet Isiah tehna bantukin, »Hihi Bawipa chimmi Bia asi« (Thus saith the Lord) ti kho ve ning lawcu ka duh ngai hnga, sihmanselaw kha ti khan cun ka ti kho nemmam lo; keimah le keimah hmanh hi ka Ruahmi hi Palhnak asi hnga maw? thil dik asi maw? ti hmanh ka ihngal lo. Cucacun Hmanthlak akhan vung kir ta rih usihlaw: »Mupi nicun a Bu kha Thingpar parpahlek amaw Lungpang parpahlek amaw asak i cuka acun a Ti atit i a Fale kha an hung keuh i acawm dihhna. An hung ṭhang i nikhat cu a Bu kha amah lila nih khan ahninh ciammam i a Fale kha an thlikmatthlok loin an tla dihhna. An zuang bal rih lo, an Thla zong cu a fekfuan maw fekfuan rih lo tikha hnalh asi rih lo; sinain an umnak Bu cu avun hninh ciammam i an tla curmar ko; Vawlei i an phak acun a kekkuai dih i athi dih ding an sihna. An Thin aphang hringhran ko lai, an ṭih tuk hringhran ko lai i an Thin cu zute Lemnak um loin an ṭih ko lai.

Kannih zong hi cucu kan sihna hnga maw tihi ka ruat tawn. Iṭhial, ikam te hoihna le Khua dang le Ram dang i pemte hoihna hi kan ṭihngai ngai ko, kan tla suallai ti phan a umngai ngai i Ṭihmi le Thinphannak hi ahman tak takmi asi ko lai, sinain Mifim i an chim tawn ningah, Ṭihnak ngei lomi Ralṭhatnak cu hruh ralṭhat asi i Ṭihnak angei nain atuah mitu hi ralṭhat taktak cu asi ti asi caah Ṭihnak ngeih tiang lawng ahin hlamaw kan izat sual, tihi ka ruat tawn.

Cucacun ruah awk deuh asi rua ka Timi cu, Mupi nih a Bu kha avun hninh tikah le Vafano pawlhna an tlak curmar lio akhan, Vafano pawlhna nikhan cun aruah awk zeihmanh an rak hngal lo, sinain an Pi nikhan cun ahngalh ko. Ka Fale hi hninh lo incun Nutling le Patling an si kho bal lai lo ti zong ahngalh ko. An Thla zong hi corh cang ko hmansehlaw an hman lo acun zuan an thiam bal lai lo ti zong kha ahngalh ko. Cucacun avun hninh i an tlak curmar tik lawng akhan zuannak Thla hi kan ngei i Thla hi Zuannak caah an si tikha an vun hngal. An Thla cu ano rih, an Hmul zong atlam tling rih lo asi ko lai, sihmansehlaw a hninhhna, ahnek sakhna cu, an caah arak herhhrim hrimmi asi ko. Abraham kha Pathian nih akawh i na umnak Hmun hi chuahtak law ka in hmuhsak laimi Ram ah kal, ati tik akhan, Abraham nikhan khuazei ah kal awk asi tikha ahngal lo, tiah Baibal acun kan hmuh. Thil hi an hung um tik ahin khuazei dah an phak lai i zeiah dah an dongh lai ti hngalh cu ahar ngai ko lai i hngalh zong hi palh asi kho ko lai. Tuchan science Fimnak nih apalh bikmi pakhat cu »Ka hngalh dih« tihi asi i hngalh hi ralrin lo acun hngal khawh ngai asi. Hngalh nih ahrawh khawh lomi cu Pathian lawng asi i Pathian nicun ahngal dih ko nain ahngal bal lo.

Cucacun kan Hmanthlak akhan vung kir rih usihlaw:

A Fano kha avun zuan hnawhhna i

A Thla kha avun isamh i

A Thla cungah a futter dihhna i

A zuanpi dihhna, a ti.

A Fale cu an tangin azuan kanhhna i a Keng ah a citter dihhna. Zuan an thiam hlan lo cuticun a tuahhna. Culawng acun zuan an Thiamnak ding Lam arak si.

Hihi Israelmi hnanih kan Pathian nih a kan hruai ning asi tiin an zumhmi asi. Cun hi Muisam hi Miphun caah siseh, pumpak caah sisieh, thil Umkalning asi ngaimi asi ko; voikhat voihnih cu kan tla curmar ko, kan Thin aphang, kan Thla alau, kan Hnabei adong, sihmansehlaw a kan Hnintu hi Pathian, kan Pa asi, ti zumh hi kan Hnangamnak bik asi ko. Cunih achuah pimi cu, a kan Hnintu kha Bawipa asi acun, a kan Domhtu zong Bawipa asi. Deutonomy 33:27 ṭhiam ṭhiamah, kan umnak Hmun cu zungzal hmunmi Pathian asi i kan tangah a ummi Ban cu zungzal hmunmi Ban asi ti aum. Kan tong ko lai Harnak, awlokchawng le vansang auin kan um ko lai, sinain kan Hnangamnak bik, midang nih an ngeih ve lomi Hnangamnak cu, hithil vialte hi kan Pathian nih ahngalh dih ko, i kan zuan khawh nakding caah hninh zong kan herh Caan asi kho ko tihi asi. A sihrim hrim ticu aho hmannih kan chim kho bal lai lo, tiah ka zumh; sinain hi nakin aṭha deuhmi thil zeihmanh aum lo. Nifate kan Nunnak i Lomhnak siseh, Ngaihchiatnak siseh, ton zongah, cuṭhiam ṭhiam cu kan Hnangamnak taktak asi ko  — a kan domhtu Ban, ka Pathian Ban cu kan tangah aum ko tikha.

Kanmah Laimi lawng hi hlamaw hi bantukin Harnak atong i santlaih lo ruangah Pathian bochan lawng a iforh i Hawi duh ti lomi thil a icharmi kan sihna tihi ka ruat tawn. Sinain, ka Lunglomhnak cu ka palh ngaingai ti fiang deuh lengmang ka ihngalh ruang ahin asi. Hika ahin tuchan theologian mithang bikmi pakhat Reinhold Neibuhr chimmi tlawmte vun lak ka duh, zeicaticun amah zong nihin har kan timi hi har ati ve ko tikha alang ngaiin ka hmuh i ka ihnangampi ngai:

Minung nih Ṭhatnak tuah mihna asang bikhna hmanh ahin Tlamtlinlonak tampi aum ko. Cu Tlamtlinlonak an um tihmanh cu kanmah nih kan hngalh khawh takmi siloin, Pathian a Vel le Zaangfahnak thawng lawngin rak hngalh khawh cu asi. Cu zumhnak Dirhmun i dir lawngah Minung i Tuanbia chung Sullam um mihna hi hngalh khawh asi lai. Cucu zeidah asi ticun, Krifami nih Krih a Dawtnak hi kan Nunnak ah asang bikah chiah awk asi, tihi asi i cucacun midang ca i Ṭhatnak tuah kha kan itahnak Tlangrel asi awk, asi.

Krifami nih Zumhnak in hngalh micu; thil ṭha bik tuah mihna hmanh khi chung leiin Thûtnak le Tlamtlinlonak an ngei ko tihi asi i cu hngalh a Ṭhathnemnak cu kann duh mihna le saduhthah atlin khawh lo tik i lungdong loin umter hi asi. Cucacun herh bikmi cu Minung ṭhawnnak bik hmannih atuah khawh lomi le Tlam atlinh khawh lomi hi Pathian ṭhawnnak nih atuah khawh ti zumh hi asi i, cucu Minung i Tuanbia chung  Rianṭuannak ah aherh bikmi cu arak sihrim ko. Cucacun Minung thilti khawhnak irinh poah acun Minung thilti khawhnak kha Dongnak angei ti vun hmuh tikah Lung adong lengmang ko lai.

Reinholh Neibuhr nih achim duhmi hi Harnak ton tikah cu Harnak teikhawhnak Hriam ṭha bikmi cu Zumhnak hi asi, tihi asi ko i cu a Ṭhatnak bikcem cu kanmah zong nih ngeih khawh vemi arak sikha asi. Mingan an sihna ah, mihme an sihna ah, kan ibochan micu a ikhat. Cun cu Bochannak i hmanmi Hriamnam cu a ikhat — cucu Zumhnak hi asi.

Cucacun Zumhnak thlau deng tawn zongah ilak ṭhan usihlaw zum ṭhan ko usih. Vafano nicun an hngal lo nain an Pi nicun  an ca i aṭha bikmi kha zeidah asi ticu ahngalh i ahninh zong ahninh sekhna ko. Vawlei zong a teitu kan Bawipa Jesuh Krih ṭhiam ṭhiamah kan Hrampi cu aum ko, i amah nih Biaroriak a kan chiahtak micu: Vawlei nihin Harnak an pekhna lai, sihmansehlaw ṭih hlah u. Vawlei cu ka tei cang, a ti [Johan 16:33].  

Thlacamnak:

Dawtnak in zungzal a kan Zohkhenhtu le kan biakmi Khuazing le Pathian; Bawipa, nangmah nih na kan dawt i kanmah Laimiphun, miphun hmete zong nangmah an zummi Miphun ah na kan thim ve, nangmah Min aau pitu ah na kan hman ve caah na Min cu kan in thangṭhat i na cung ah kan ilawm ko.

Bawipa! a hleiin atu bantukin kan Ram le Miphun cungah Harnak, Ngaihchiatnak le Lungrethiahnak tampi atlun lio Caan zong ahin nangmah nih na kan um pi, i nangmah lila nih Lam na kan hruai lai ti na kan theihter ṭhan caah na Min kan in thangṭhat ko. A hleiin nihin kan theih mihna na Thawng ṭhami Bia nih: Atu lio kan cungah a lung mihna thil vialte le Harnak le Ngaihchiatnak vialte hi nangmah lila nih Miphun tlingmi kan si khawh venak hnga »Mupi nih a Bu ahninh bantukin« na kan hninh mi asi, tiah na kan theihter ṭhan caah na Min kan in thangṭhat ko.

Bawipa! Miphun hmete siko hmanh usihlaw rak kan hnin ve ko law, Vafano cu a Nu nih a hninhhna ruangah an Thla hman an hung thiam i a ṭhawngmi, a cakmi, vansang piin azuang khomi asi bang — kannih zong kanmah tein Thazaang ahmang thiammi, kanmah Kutke cungah kanmah tein adir thiammi le adir khomi hung kan siter hram ko. Nangmah sinah kan Zumhnak hi rak ikhahter law, cuticun kan Zumhnak a ikhahnak ruang ahin nangmah Min sunparter khomi Laimi si lawng siloin, kanmah chungah Rualremnak le Dindaihnak aum khawh venak hnga Thlachuah cu kan pe hram ko.

Bawipa! Kann Ram chungah kal takmi kan Nupa, Unau, Nifar, Cing le La vialte le kan Miphun vialte caah Thlaza kan cam. Nangmah nih na Thlachuah le na Vanni he rak um pihna law, nangmah sinin a rami Lunghnangamnak an hmuh cio nakhnga na sinah kan cam Thlaza.

Kann Ramcozah aṭhat lo ruangah khuaza Ram kipah atli zammi kan Miphun hawihna caah Thlaza kan cam. Akhun le a hleiin: Indiaram i aum mihna le Guam ah aphan mihna caah Thlaza kan cam. Bawipa, an Lungre theihnak, an Tuarharnak le Ngaihchiatnak vialte na theih dih! Nangmah lila nih Lam rak hruaihna law lungdaih Hnangamnak rak pe ko rihhna.

Culawng siloin, khuaza Ram kipah Pawcawmnak caah Rian a ṭuanmi kan Miphun simi kan Unau vialte ca zongah Thlaza kan cam. An Tuahṭuannak cungah Bawipa .... nangmah nih Hlawhthlinnak rak pe hram ko rihhna.

Cun Sianginn kaimi vialte sin zongah Bawipa, nang nih rak umpi rihhna law, an cawnmi Ca lawng siloin, nangmah cu kan Pathian hrimhrim hi Fimnak a Hrampi na Sining hi a tharin an Nunnak ah rak theihter hram ko rihhna.

Cuhleiah maw Bawipa! Kan Ram le Miphun caah an Fimnak, Nunnak le Sining vialte pein Rian aṭuan mihna na Fanu le Fapa pawlhna ca zongah Thlaza kan cam fawn. Bawipa, nangmah nih kan Miphun cu amah tein dir kho seh tiah na vun hninh lio Can ahin, mizei hlanah anmah hi hninh hmasa an silai ticu kan theih. Cutikah, lungdong lo tein an in khawh i lungsau le thinfual tein an cungah na khinh mihna Rian an ṭuan khawh cio nakhnga; Thazaang dermi Thazaang pe rihhna law, Lung dermi Lungṭhawnnak rak pe rihhna law, Fimthiamnak a herhmi Fimthiamnak rak pe hram ko rihhna. Anmah pawlhna thawngin kan Ram le Miphun chengpalang ah a tlami siloin, nangmah thawngin mahhna nihin kan Ram an khamh khawh nakhnga Thlachuah rak kan pe cio ko rihhna.

Cun Bawipa! Kan Ram chungah siseh, khuaza Ram kipah ummi kan Miphun hawihna sinah nangmah Min in Rian ṭuanmi Pastor vialte le nangmah Phunglam a kan Cawnpiaktu vialte pawlhna ca zongah Thlaza kan cam fawn. Nangmah nih na thimmi Fanu le Fapa cu an sihna. Cucacun nangmah lila nih rak thuam rihhna law, nangmah Min kha asang bikcem le a idawh bikin an aupi thawngin kan Miphun le Ram zong an cawi chin khomi an sicio nakhnga nang lila nih Thlachuahnak rak pe cio ko rihhna.

Bawipa! Kan Ram, kan Miphun le Krifabu caah Fanu le Fapa ṭha kan pe ko! Mifim le Mithiam kan pe hram ko, cun muidawh le samṭha zong kan pe law kan Ram le Miphun hi nangmah Min in Pangpar dawh bangin apar khawh ve nakhnga Thlachuah kan pe hram ko.

Bawipa kan in hal mihna hi nangmah Duhnak bangin rak siter ko. Kan in halthiam lomi le ahal awk kan in theih lomi zong tampi aum lai. Sihmansehlaw, kan mah Duhnak bangin siloin, nangmah Duhnak bangin rak siter ko. Hi Bia vialte cu kanmah vialte kan Sual tlanh awkah na rak thlahmi nafa Bawi Jesuh Krih Min pakhat lawng bochanin kan in hal, kan Pathian. Amen!

Bawipa Thlacamnak:

Vancung Khua ummi kannih kan Pa,

Na Min upat um cang ko seh,

Na Pennak tlung cang ko seh,

Vancung bantukin Lei cungah na Duhnak tling cang ko seh,

Pawcawmnak khimin nifa Rawl rung kan pe ko sawh,

Minih kan cung i an sual tikah kan ngaihthiam khawhhna bangin kan Sualnak kha kan ngaithiam ve tuah,

Sualforhnak chungah itel ve hngin loin, Ṭhatlonak vialte chungin kan kham tuah,

pennak Nawl le Lianngannak le Upatnak cu azungzal na cungah um camcin ko seh!